ឯកឧត្តមបណ្ឌិត ហេង សុផាន់ណារិទ្ធ អញ្ជើញបិទបញ្ចប់គម្រោង “លើកកម្ពស់កិច្ចគាំពារសង្គមនៅកម្ពុជា”

ភ្នំពេញ៖ នារសៀលថ្ងៃព្រហស្បតិ៍ ទី១៩ ខែធ្នូ ឆ្នាំ២០២៤នេះ ពិធីបិទបញ្ចប់គម្រោង “លើកកម្ពស់កិច្ចគាំពារសង្គមនៅកម្ពុជា”​ (Closing Event of the Project “Advancing Social Protection in Cambodia”) ត្រូវបានប្រារព្ធឡើងក្រោមអធិបតីភាព ឯកឧត្តមបណ្ឌិត ហេង សុផាន់ណារិទ្ធ អគ្គនាយករងបេឡាជាតិសន្តិសុខសង្គម តំណាង ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ដែលមានការអញ្ជើញចូលរួមពីតំណាងរាជរដ្ឋាភិបាល អង្គការសង្គមស៊ីវិល ដៃគូអភិវឌ្ឍន៍ និងភាគីពាក់ព័ន្ធសរុបប្រមាណជា ៨០នាក់។

ថ្លែងនៅក្នុងកម្មវិធីបិទបញ្ចប់គម្រោងនេះ ឯកឧត្តមបណ្ឌិត ហេង សុផាន់ណារិទ្ធ បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់អង្គការអន្តរជាតិខាងការងារ (ILO) សហភាពអឺរ៉ុប (EU) អង្គការយូនីសេហ្វ (UNICEF) ក្រសួង ស្ថាប័ន ដៃគូអភិវឌ្ឍន៍ និងភាគីពាក់ព័ន្ធ ដែលបានចូលរួមអនុវត្តគម្រោង “លើកកម្ពស់កិច្ចគាំពារសង្គមនៅកម្ពុជា” ប្រកបដោយភាពជោគជ័យ និងទទួលបានផ្លែផ្កាគួរជាទីមោទន។

ទន្ទឹមនឹងនេះ ឯកឧត្តមបណ្ឌិត ក៏បានលើកឡើងអំពីវឌ្ឍនភាពសំខាន់ៗនៃការអនុវត្តគម្រោង ចំនួន ៤រួមមាន៖ (១). ការពង្រីកវិសាលភាពគ្របដណ្ដប់គាំពារសង្គម, (២). ការពង្រឹងនិរន្តរភាពហិរញ្ញវត្ថុ, (៣) ការពង្រឹងការសម្របសម្រួលស្ថាប័ន និង(៤). គោលនយោបាយគាំពារសង្គមប្រកបដោយបរិយាបន្ន និងសមធម៌។

ជាមួយគ្នានេះផងដែរ ឯកឧត្តមបណ្ឌិត បានសង្ឃឹមយ៉ាងមុតមាំថា បើទោះបីជាគម្រោងនេះត្រូវបានបញ្ចប់ ប៉ុន្តែប្រព័ន្ធគាំពារសង្គមនៅកម្ពុជា នៅតែទទួលបានការបន្តគាំទ្រពីសភាពអឺរ៉ុប អង្គការ UNICEF ជាពិសេសអង្គការ ILO និងដៃគូអភិវឌ្ឍន៍ ដើម្បីរួមចំណែកដល់ការអនុវត្តប្រព័ន្ធគាំពារសង្គមបានគ្រប់ជ្រុងជ្រោយ និងឆ្ពោះទៅរកការគ្របដណ្ដប់សុខភាពជាសកលសម្រាប់ប្រជាជនកម្ពុជា ដែលស្របតាមយុទ្ធសាស្រ្តបញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជានីតិកាលទី៧ និងគោលនយោបាយជាតិ ព្រមទាំងផែនការសកម្មភាពរបស់ក្រសួងការងារ និងបណ្ដុះបណ្ដាលវិជ្ជាជីវៈ។

ក្នុងពិធីបិទបញ្ចប់គម្រោងនេះដែរ​ លោក​ អ៊ុក​ សំ​អូន​ ប្រធាននាយកដ្ឋានសេវាអតិថិជន​ និងទំនាក់ទំនងសាធារណៈ ក៏បានចូលរួមក្នុងកិច្ចពិភាក្សា​ ក្រោមប្រធានបទ​ “ការលេីកកម្ពស់នៅកម្ពុជា៖​ អ្វីជាជំហានបន្ទាប់?”​ ផងដែរ។

គួរបញ្ជាក់ផងដែរថា៖ គម្រោង “លើកកម្ពស់កិច្ចគាំពារសង្គមនៅកម្ពុជា” មានរយៈពេលអនុវត្តន៍ចំនួន ៤ឆ្នាំ (២០២១-២០២៤) ក្រោមការឧបត្ថម្ភគាំទ្រដោយសហភាពអឺរ៉ុប។ តាមរយៈពិធីបិទគម្រោងនេះ បានបង្ហាញពីវឌ្ឍនភាព និងសមិទ្ធផលនានា ក៏ដូចជាបញ្ហាប្រឈម សំណូមពរ និងទិសដៅការងារអនុវត្តបន្តផងដែរ ៕