ចិន កំពុងពង្រីកកម្លាំងនុយក្លេអ៊ែររបស់ខ្លួន បង្កើនសម្ពាធយោធាប្រឆាំងនឹងកោះតៃវ៉ាន់
វ៉ាស៊ីនតោន៖ ចិនបាននិងកំពុងពង្រីកកម្លាំងនុយក្លេអ៊ែររបស់ខ្លួន បង្កើនសម្ពាធយោធាប្រឆាំងនឹងកោះតៃវ៉ាន់ និងពង្រឹងទំនាក់ទំនងរបស់ខ្លួន កាន់តែជិតស្និទ្ធិជាមួយរុស្ស៊ីកាលពីឆ្នាំមុន។ នេះបើយោងតាមរបាយការណ៍របស់មន្ទីរបញ្ចកោណ ដែលបានចេញផ្សាយកាលពីពេលថ្មីៗ។
របាយការណ៍នេះ បានកត់សម្គាល់ផងដែរថា អំពើពុករលួយនៅក្នុងយោធារបស់ចិន អាចនឹងរំខានដល់វឌ្ឍនភាពរបស់បងធំប្រចាំតំបន់អាស៊ី ឆ្ពោះទៅរកគោលដៅទំនើបកម្មយោធាឆ្នាំ២០២៧។ ទោះជាយ៉ាងណាក៏ដោយ សហរដ្ឋអាម៉េរិកបានព្រមានថា រដ្ឋធានីប៉េកាំង កំពុងបោះជំហានឆ្ពោះទៅរកការអភិវឌ្ឍកម្លាំងនុយក្លេអ៊ែរ ដែលមានលក្ខណៈចម្រុះ និងទំនើបជាងមុន ខណៈចំនួនក្បាលគ្រាប់នុយក្លេអ៊ែរបានរក្សាកំណើនជាទៀងទាត់។
មន្ត្រីជាន់ខ្ពស់នៃក្រសួងការពារជាតិអាម៉េរិកម្នាក់ បាននិយាយថា រដ្ឋាភិបាលរដ្ឋធានីប៉េកាំងអាចនឹងផលិតអាវុធនុយក្លេអ៊ែរឱ្យបានកាន់តែច្រើន ដើម្បីដើរតាមគោលដៅ និងភាពចម្រុះនៃអាវុធនុយក្លេអ៊ែរ។ យ៉ាងណា អាម៉េរិកកំពុងជំរុញឱ្យចិនមានតម្លាភាពបន្ថែមទៀតអំពីកម្មវិធីនុយក្លេអ៊ែររបស់ខ្លួន។ យោងតាមរបាយការណ៍ដែលផ្តល់ការវាយតម្លៃប្រចាំឆ្នាំរបស់សហរដ្ឋអាម៉េរិកអំពីអំណាចយោធារបស់ចិន មហាយក្សចិនមានក្បាលគ្រាប់នុយក្លេអ៊ែរប្រតិបត្តិការច្រើនជាង៦០០គ្រាប់ គិតត្រឹមខែឧសភា ឆ្នាំ២០២៤ ហើយសហរដ្ឋអាម៉េរិករំពឹងថា ចិននឹងមានក្បាលគ្រាប់នុយក្លេអ៊ែរច្រើនជាង១០០០ គ្រាប់នៅឆ្នាំ២០៣០។
ជាការឆ្លើយតបនឹងរបាយការណ៍នោះ ស្ថានទូតចិនប្រចាំនៅសហរដ្ឋអាម៉េរិក បានប្រតិកម្មថា ចិនតែងតែប្រកាន់ខ្ជាប់យ៉ាងម៉ឺងម៉ាត់ចំពោះយុទ្ធសាស្ត្រស្វ័យការពារនុយក្លេអ៊ែរ អនុវត្តតាមគោលនយោបាយមិនប្រើអាវុធនុយក្លេអ៊ែរវាយប្រហារអ្នកដទៃមុន និងរក្សាសមត្ថភាពនុយក្លេអ៊ែររបស់ខ្លួននៅកម្រិតអប្បបរមា ដែលត្រូវការសម្រាប់សន្តិសុខជាតិ។ លោក លៀវ ប៉េងយូ (Liu Pengyu) អ្នកនាំពាក្យស្ថានទូតចិន បានអះអាងថា របាយការណ៍ប្រចាំឆ្នាំរបស់មន្ទីរបញ្ចកោណ គឺពោរពេញទៅដោយគំនិតសង្រ្គាមត្រជាក់ និងចិត្តគំនិតក្នុងការចង់ឈ្នះចាញ់។ ចិនប្រឆាំងយ៉ាងយ៉ាងដាច់អហង្កា! ទាក់ទិននឹងរុស្ស៊ី របាយការណ៍របស់មន្ទីរបញ្ចកោណបានរាយរាប់ថា ចិនបានគាំទ្រសង្គ្រាមរបស់រុស្ស៊ីប្រឆាំងនឹងអ៊ុយក្រែន និងបានលក់ឧបករណ៍ដែលជួយដល់ឧស្សាហកម្មការពាររុស្ស៊ី៕
