មន្ត្រីអាមេរិក៖ វិបត្តិនយោបាយកាន់តែស៊ីជម្រៅនៅកូរ៉េខាងត្បូង មិនប៉ះពាល់ដល់ការត្រៀមលក្ខណៈយោធា ដែលឈរជើងក្នុងរដ្ឋអាស៊ីនោះទេ

វ៉ាស៊ីតោន​៖ មន្ត្រីអាម៉េរិកមួយរូបបាននិយាយកាលពីថ្ងៃសុក្រទី២៧ ខែធ្នូថា វិបត្តិនយោបាយកាន់តែស៊ីជម្រៅនៅក្នុងប្រទេសកូរ៉េខាងត្បូង មិនប៉ះពាល់ដល់ការត្រៀមលក្ខណៈយោធារបស់ទាហាន២៨៥០០នាក់ ដែលឈរជើងក្នុងរដ្ឋអាស៊ីនោះទេ ប៉ុន្តែរដ្ឋធានីវ៉ាស៊ីនតោន កំពុងតាមដានយ៉ាងដិតដល់នូវស្ថានភាពនេះ។

សភាកូរ៉េខាងត្បូង បានបោះឆ្នោតទម្លាក់តំណែងប្រធានាធិបតីស្តីទី លោក ហាន ដុកស៊ូ កាលពីថ្ងៃសុក្រ តិចជាងពីរសប្តាហ៍បន្ទាប់ពីការទម្លាក់តំណែងប្រធានាធិបតី យូន ស៊ុកយូល ជុំវិញការប្រកាសច្បាប់អាជ្ញាសឹករយៈពេលខ្លី ដែលធ្វើឱ្យប្រទេសនេះធ្លាក់ចូលទៅក្នុងភាពវឹកវរផ្នែកនយោបាយ។ រដ្ឋមន្ត្រីក្រសួងហិរញ្ញវត្ថុ លោក ឆយ សាំងម៉ុក (Choi Sang-mok) បានកាន់តំណែងជាប្រធានាធិបតីស្តីទី ខណៈសំណុំរឿងរបស់លោក យូន និងលោក ហាន កំពុងត្រូវបានពិចារណាដោយតុលាការធម្មនុញ្ញ។

សហរដ្ឋអាម៉េរិក​មាន​កងទ័ព​ឈរជើង​នៅ​កូរ៉េខាងត្បូង​ ជា​កេរដំណែល​នៃ​សង្គ្រាម​កូរ៉េ​ឆ្នាំ១៩៥០ ដល់១៩៥៣។ បន្ទាប់ពីការប្រកាសច្បាប់អាជ្ញាសឹកក្នុងខែនេះ សហរដ្ឋអាម៉េរិក និងកូរ៉េខាងត្បូង បានពន្យារពេលការធ្វើសមយុទ្ធយោធា ហើយរដ្ឋមន្ត្រីការពារជាតិអាម៉េរិក លោក ឡយ អូស្ទីន បានលុបចោលធ្វើដំណើរទស្សនកិច្ចទៅកាន់ប្រទេសកូរ៉េខាងត្បូង​ថែមទៀតផង។ មន្ត្រីអាម៉េរិកម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះ បាននិយាយថា ខណៈសហរដ្ឋអាម៉េរិកកំពុងតាមដានការវិវឌ្ឍចុងក្រោយបំផុតកាលពីថ្ងៃសុក្រនោះ មិនមានផលប៉ះពាល់ដល់ការត្រៀមខ្លួនខាងយោធានៅលើឧបទ្វីបកូរ៉េនោះទេ។ ទន្ទឹមនឹងនោះ អ្នកនាំពាក្យក្រសួងការបរទេសសហរដ្ឋអាម៉េរិក បានលើកឡើងថា កូរ៉េខាងត្បូងបានអនុវត្តតាមដោយសន្តិវិធីនូវដំណើរការដែលមានចែងក្នុងរដ្ឋធម្មនុញ្ញរបស់ខ្លួន ដោយបន្ថែមថា រដ្ឋធានីវ៉ាស៊ីនតោនត្រៀមខ្លួនជាស្រេច ដើម្បីធ្វើការជាមួយលោក ឆយ និងរដ្ឋាភិបាល។

ការដាក់ច្បាប់អាជ្ញាសឹកដែលមិននឹកស្មានដល់ និងចលាចលនយោបាយដែលកើតឡើងបានទាក់ទាញក្ដីបារម្ភពីសម្ព័ន្ធមិត្តសហរដ្ឋអាម៉េរិក និងអឺរ៉ុប ដែលបានមើលឃើញថា លោក យូន ជាដៃគូដ៏សំខាន់ក្នុងកិច្ចខិតខំប្រឹងប្រែងដើម្បីប្រឆាំងនឹងប្រទេសកុម្មុយនីស្ដទាំង៣ ចិន រុស្ស៊ី និងកូរ៉េខាងជើង។