ឆ្នាំ២០២៤ គឺជាឆ្នាំបណ្តាសានៃបញ្ហាដ៏អាក្រក់បំផុតសម្រាប់ប្រទេសកូរ៉េខាងត្បូង
ឆ្នាំ២០២៤ គឺជាឆ្នាំបណ្តាសានៃបញ្ហាដ៏អាក្រក់បំផុតសម្រាប់ប្រទេសកូរ៉េខាងត្បូង ខណៈប្រទេសដែលធ្លាប់តែរុងរឿងមួយនេះបានធ្លាក់ចូលយ៉ាងជ្រៅទៅក្នុងជ្រោះវិបត្តិនៃភាពចលាចលនយោបាយ វិបត្តិសង្គម ប្រជាជនអស់ជំនឿលើមន្ត្រីដឹកនាំរដ្ឋាភិបាលរបស់ខ្លួន។ តើមានហេតុផលអ្វីខ្លះ..បានជា ឆ្នាំ២០២៤ ជាឆ្នាំបណ្តាសារបស់កូរ៉េខាងត្បូង..?
គេនៅចាំបានថា ចាប់តាំងពីខែកុម្ភៈ ឆ្នាំ២០២៤ ប្រទេសកូរ៉េខាងត្បូង ជួបនឹងវិបត្តិវេជ្ជសាស្ត្រ៖ ក្រោយរដ្ឋបាល លោក យូន ស៊ុកយ៉ុល ប្រកាសពីផែនការដើម្បីបង្កើនចំនួននៃការចូលរៀននៅសាលាវេជ្ជសាស្ត្រ ការណ៍នេះបានបង្កឱ្យមានការតវ៉ាយ៉ាងទូលំទូលាយពីសំណាក់សិស្សនិស្សិត និងអ្នកជំនាញវេជ្ជសាស្ត្រ ដោយពួកគេលើកហេតុផលថា នឹងបង្កើនការផ្គត់ផ្គង់លើសកម្រិត ការថយចុះគុណភាពនៃការថែទាំ និងការធ្លាក់ចុះនៃស្ថានភាពវិជ្ជាជីវៈវេជ្ជសាស្ត្រ។ បញ្ហានេះ បាននាំឱ្យកូរ៉េខាងត្បូងប្រឈមមុខនឹងការតវ៉ាពីបុគ្គលិកបម្រើការងារលើផ្នែកវេជ្ជសាស្ត្រយូរបំផុតមួយក្នុងពិភពលោក។ ជាក់ស្តែង វេជ្ជបណ្ឌិតវ័យក្មេងជាង១៤០០០នាក់ បានផ្ទុះការតវ៉ា ហើយវេជ្ជបណ្ឌិតជាង៦៤០០នាក់ បានដាក់ពាក្យលាលែងពីអាជីពជាគ្រូពេទ្យផងដែរ។
ចំណេរក្រោយមក វិបត្តិនយោបាយទ្រង់ទ្រាយធំ ក៏បានផុសឡើងក្រោយប្រធានាធិបតីកូរ៉េខាងត្បូង លោក យូន ស៊ុកយ៉ុល បានអនុម័តច្បាប់អាជ្ញាសឹក ដ៏គួរឱ្យភ្ញាក់ផ្អើលមួយ ខណៈច្បាប់អាជ្ញាសឹកនេះ មានអាយុត្រឹមតែ៦ម៉ោងប៉ុណ្ណោះ។ ការណ៍នេះ..នាំឱ្យប្រទេសកូរ៉េខាងត្បូង ធ្លាក់ទៅក្នុងជ្រោះចលាចលនៃវិបត្តិនយោបាយទូទាំងផ្ទៃប្រទេស។ ក្រោយមក លោកប្រធានាធិបតី ត្រូវបានបោះឆ្នោតព្យួរពីតំណែង និងថ្មីៗនេះ លោកត្រូវបានចេញដីការចាប់ខ្លួនពីតុលាការផងដែរ។
គួរជម្រាបផងដែរថា ចាប់តាំងពីការព្យួរតំណែងលោកប្រធានាធិបតីកូរ៉េខាងត្បូង ការតែងតាំងប្រធានាធិបតីស្តីទី បានកើតឡើងជាបន្តបន្ទាប់រហូតដល់ទៅ២រូប។ ប្រធានាធិបតីស្តីទី ទី១ គឺ លោក ហាន ដុកស៊ូ (Han Duck-soo) កាន់តំណែងបានត្រឹម១៣ថ្ងៃប៉ុណ្ណោះ (ចាប់ពីថ្ងៃទី១៤ ខែធ្នូ ដល់ថ្ងៃទី២៧ ខែធ្នូ ឆ្នាំ២០២៤)។ ក្រោយមកលោក ឆយ សាំងម៉ុក (Choi Sang-mok) ដែលជារដ្ឋមន្រ្តីហិរញ្ញវត្ថុបានកាន់តំណែងជាប្រធានាធិបតីស្តីទីកូរ៉េខាងត្បូងជំនួសលោក ហាន វិញម្ដង។ ការផ្លាសដ់ប្តូរថ្នាក់ដឹកនាំជាន់ខ្ពស់២នាក់ភ្លាមៗបែបនេះ ស-បញ្ជាក់ឱ្យឃើញថា ប្រទេសកូរ៉េខាងត្បូងកំពុងស្ថិតនៅក្នុងស្បៃអន្ធការនៃអស្ថិរភាពនយោបាយផ្ទៃក្នុងយ៉ាងធ្ងន់ធ្ងរ។
វិបត្តិវេជ្ជសាស្ត្រ វិបត្តិនយោបាយ និងវិបត្តិបន្ទាប់បន្សំមួយចំនួនទៀត បាននិងកំពុងនាំសេដ្ឋកិច្ចប្រទេសកូរ៉េខាងត្បូងដាំក្បាលចុះ និងប្រឈមនូវវិបត្តិសេដ្ឋកិច្ចនាពេលខាងមុខ។ គួរជម្រាបថា កូរ៉េខាងត្បូង ត្រូវបានគេស្គាល់ថា ជាប្រទេសមួយក្នុងចំណោមប្រទេសដែលទទួលបានជោគជ័យខាងសេដ្ឋកិច្ចបំផុតនៅលើពិភពលោក ជាមួយនឹងបច្ចេកវិទ្យាខ្ពស់។ យ៉ាងណា នៅទីបំផុតសេដ្ឋកិច្ចរបស់ប្រទេសកូរ៉េ ធ្លាក់ទៅក្នុងគន្លងដាំក្បាលចុះ ខុសពីទសវត្សរ៍មុនៗ។ សូមលម្អិតថា វិបត្តិប្រជាសាស្ត្រ (ប្រជាជនវ័យចំណាស់ច្រើន អត្រាកំណើតទាប) និងភាពជាប់គាំងក្នុងវិបត្តិនយោបាយអូសបន្លាយ គឺជាបុព្វហេតុចម្បងនៃការដាំក្បាលចុះនៃកំណើនសេដ្ឋកិច្ចរបស់ខ្លួន។ ទន្ទឹមនឹងការអនុម័តច្បាប់អាជ្ញាសឹករបស់លោក យូន ក៏បានធ្វើឱ្យទីផ្សាររបស់ប្រទេសសេដ្ឋកិច្ចធំជាងគេទីបួនរបស់អាស៊ីមួយនេះ ស្ថិតក្នុងភាពស្រពិចស្រពិល និងភាពងងឹតសូន្យសុងផងដែរ។
សោកនាដកម្មដ៏អាក្រក់បំផុតមួយ បានធ្លាក់ទៅលើស្មាកូរ៉េខាងត្បូងបន្ថែមទៀត ក្រោយប្រទេសនេះជួបឧបទ្ទវហេតុផ្លូវអាកាសដ៏សាហាវបំផុតមិនធ្លាប់មានក្នុងប្រវត្តិសាស្ត្ររបស់ខ្លួន ដោយមនុស្ស១៧៩នាក់ បានក្លាយចំណីមច្ចុរាជកាលពីថ្ងៃអាទិត្យទី២៩ ខែធ្នូ។ សោកនាដកម្មដ៏រន្ធត់មួយនេះ កើតឡើងបន្ទាប់ពីយន្តហោះ Jeju Air 7C2216 ម៉ូដែល Boeing 737-800 ម៉ាស៊ីនភ្លោះ បានអូសតួខ្លួនផ្ទាល់ទៅនឹងដី ហ៊ុយផ្សែង ជ្រុលទៅបុកជញ្ជាំងអាកាសយានដ្ឋានផ្ទុះឆេះមួយរំពេច។
ទឡ្ហីករណ៍ខាងលើ គឺជាការបញ្ជាក់យ៉ាងប្រត្យក្សថា ឆ្នាំ២០២៤ គឺជាឆ្នាំបណ្តាសារដ៏អាក្រក់បំផុតសម្រាប់ប្រទេសកូរ៉េខាងត្បូង ខណៈវិបត្តិធំៗទាំងអស់នេះ កំពុងដោតកម្លោចសេដ្ឋកិច្ច និងគោលនយោបាយការបរទេសរបស់ខ្លួនយ៉ាងខ្លាំងផងដែរ។ តើឆ្នាំ២០២៥នេះ កូរ៉េខាងត្បូង អាចរើខ្លួនចេញផុតពីភាពវឹកវរនៃជម្លោះនយោបាយដ៏អាក្រក់របស់ខ្លួននេះបានដែរឬទេ? ដ្បិតបច្ចុប្បន្ន ចរន្តនយោបាយផ្ទៃក្នុងត្រូវបានគេមើលឃើញថា កំពុងជួបការប្រេះឆាគ្នាកាន់តែខ្លាំងឡើង ដោយភាគីម្ខាងយកស្ថាប័នតុលាការប្រើជាអាវុធសម្រាប់សម្លាប់ដៃគូរបស់ខ្លួន ឯភាគីម្ខាងទៀតដែលជាអតីតប្រធានាធិបតី ក៏បានប្រកាសតស៊ូរហូតដល់ទីបញ្ចប់ផងដែរ.? ៕
