អង្គភាពប្រឆាំងអំពើពុករលួយ ប្រារព្ធពិធីអបអរសាទរទិវាជ័យជម្នះ ៧ មករា
ភ្នំពេញ៖ ការប្រារព្ធពិធីអបអរសាទរទិវាជ័យជម្នះលើរបបប្រល័យពូជសាសន៍ (៧ មករា ១៩៧៩ – ៧ មករា ២០២៥) ប្រព្រឹត្តទៅ នៅអង្គភាពប្រឆាំងអំពើពុករលួយ ហៅកាត់ថា អ.ប.ព. នារសៀលថ្ងៃទី៦ ខែមករា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់ ឯកឧត្តម តុប សំ ប្រធានក្រុមប្រឹក្សាជាតិប្រឆាំងអំពើពុករលួយ កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្រ្តី ប្រធាន អ.ប.ព. និងលោកជំទាវ ចិន ច័ន្ទមុនី ឧបការី និងជាប្រធានក្រុមប្រឹក្សាវិន័យ និងត្រួតពិនិត្យផ្ទៃក្នុង អ.ប.ព.ដើម្បីរម្លឹកខួបលើកទី៤៦ ថ្ងៃ៧ មករា ជាថ្ងៃមហាជ័យជម្នះជាប្រវត្តិសាស្រ្តរបស់ប្រជាជនកម្ពុជា ដែលបានផ្តួលរំលំរបបប្រល័យពូជសាសន៍ ប៉ុល ពត សង្រ្គោះជាតិ និងអាយុជីវិតប្រជាជនពីរណ្តៅមរណៈបានទាន់ពេលវេលា និងបានបើកឡើងនូវទំព័រសករាជថ្មីរបស់កម្ពុជា គឺ ឯករាជ្យ សន្តិភាព សេរីភាព ប្រជាធិបតេយ្យ និងវឌ្ឍនភាពសង្គម។
កិត្តិនីតិកោសលបណ្ឌិត ឱម យ៉ិនទៀង បានមានប្រសាសន៍ថា «៧ មករា ជាថ្ងៃដែលកម្ពុជារស់ឡើងវិញ និងជាថ្ងៃនៃការបង្ហាញនូវ ស្មារតី និងទឹកចិត្តទាំងអស់គ្នាក្នុងទិវាដ៏ឧត្តុង្គឧត្តមនេះ»។
កិត្តិនីតិកោសលបណ្ឌិត ក៏បានបញ្ជាក់ថា ក្នុងឱកាសជាមួយគ្នានេះ ចំពេលដែលព្រះមហាក្សត្រនៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី សម្រចផ្តល់ជូន គ្រឿងឥស្សរិយយស និងមេដាយ ជូនគ្រូពេទ្យស្ម័គ្រចិត្តមន្ទីរពេទ្យព្រះអង្គឌួង តំណាងក្រុមហ៊ុនសាន់ដេរ ក្រុមហ៊ុន ថោន គ្រុប និងថ្នាក់ដឹកនាំ និងមន្រ្តីរាជការ នៃ អ.ប.ព. សរុបប្រមាណ ៣៩៤ រូប ដែលកន្លងមកបានលះបង់ កម្លាំងកាយ ចិត្ត ប្រាជ្ញា ស្មារតី ក្នុងការចូលរួមបម្រើផលប្រយោជន៍ជាតិ និងប្រជាជន។
ស្មារតី ៧មករា សច្ចធម៌ប្រវត្តិសាស្រ្ត និងការគោរពដឹងគុណ ចំពោះឥស្សរជនគ្រប់ៗរូប ដែលបានយកជីវិតធ្វើជាដើមទុន ក្នុងការស្វែងរកសន្តិភាព និងសេចក្តីសុខ សេចក្តីចម្រើនជូនជាតិ និងប្រជាជន រស់នៅក្រោមពន្លឺនៃសន្តិភាពដ៏យូរអង្វែង ក្រោមការដឹកនាំដ៏ប៉ិនប្រសព្វ ឈ្លាសវៃប្រកបដោយគតិបណ្ឌិតរបស់ សម្តេចតេជោ ហ៊ុន សែន ដែលជាអគ្គមគ្គទេសក៍ឯកនៃសន្តិភាព និងជាមហាវីរបុរសជាតិប្រចាំសតវត្សរ៍របស់កម្ពុជា ស្ថិតក្នុងបេះដូងប្រជាជនកម្ពុជាគ្រប់ស្រទាប់។
ជាក់ស្តែង រាជរដ្ឋាភិបាលនីតិកាលទី៧ កំពុងបន្តជំរុញអនុវត្តបេសកកម្មដ៏ឧត្តុង្គឧត្តមជាប្រវត្តិសាស្រ្តរបស់ខ្លួន ដោយមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី បានដឹកនាំនាវាកម្ពុជាធ្វើដំណើរប្រកបដោយភាពស្វាហាប់លើគន្លងវិជ្ជមាន សម្រេចបានសមិទ្ធផលធំៗថ្មីៗជាច្រើនថែមទៀតជូនជាតិ មាតុភូមិ នោះគឺការបន្តជ្រោងទង់រក្សាសុខសន្តិភាព ស្ថិរភាព និងការអភិវឌ្ឍសង្គម-សេដ្ឋកិច្ចជាមួយនឹងឆន្ទៈសម្រេចឱ្យបាននូវចក្ខុវិស័យ ជំរុញកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០ ដោយបានដាក់ចេញនូវ យុទ្ធសាស្រ្តបញ្ចកោណ ដើម្បី កំណើន ការងារ សមធម៌ ប្រសិទ្ធភាព និងចីរភាព ដោយកំណត់យកអាទិភាពគន្លឹះ៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា រួមជាមួយការបន្តផ្តោតសំខាន់លើការអនុវត្តអភិក្រម ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ សម្រាប់ឆ្លើយតបទៅនឹងតម្រូវការលើកកម្ពស់ផលិតភាពសេដ្ឋកិច្ចដែលជាគ្រឹះ និងមធ្យោបាយដ៏សំខាន់សម្រាប់ការឈានទៅសម្រេចបាននូវចក្ខុវិស័យកម្ពុជាឆ្នាំ២០៥០៕
