ចិន អះអាងពីការគាំទ្រយ៉ាងពេញទំហឹងរបស់រដ្ឋធានីប៉េកាំង និងការផ្ដល់ជំនួយផ្នែកយោធាសម្រាប់ទ្វីបក្រីក្របំផុតរបស់ពិភពលោក
អាប៊ូហ្សា៖ រដ្ឋមន្ត្រីការបរទេសចិន លោក វ៉ាង យី កាលពីថ្ងៃព្រហស្បតិ៍ទី៩ ខែមករា បានអះអាងពីការគាំទ្រយ៉ាងពេញទំហឹងរបស់រដ្ឋធានីប៉េកាំង និងការផ្ដល់ជំនួយផ្នែកយោធាសម្រាប់ទ្វីបក្រីក្របំផុតរបស់ពិភពលោក ខណៈដែលលោកបានបិទបញ្ចប់ដំណើរទស្សនកិច្ចនៅទ្វីបអាហ្រ្វិករនៅប្រទេសនីហ្សេរីយ៉ា។
លោក វ៉ាង បានចាប់ផ្តើមដំណើរទស្សនកិច្ចនៅទ្វីបអាហ្រ្វិកកាលពីថ្ងៃទី៦ ខែមករា ដោយទៅទស្សនកិច្ចប្រទេសណាមីប៊ី សាធារណរដ្ឋកុងហ្គោ និងឆាដ មុនពេលធ្វើដំណើរទៅកាន់ប្រទេសនីហ្សេរីយ៉ា ជាកន្លែងដែលលោកបានជួបពិភាក្សាជាមួយប្រធានាធិបតីនីហ្សេរីយ៉ា បូឡា អាម៉េដ ទីនូប៊ូ (Bola Ahmed Tinubu) និងរដ្ឋមន្ត្រីការបរទេស យូស៊ូហ្វ ទូហ្គា (Yusuf Tuggar) នៅរដ្ឋធានីអាប៊ូហ្សា។ លោក វ៉ាង បាននិយាយបន្ទាប់ពីកិច្ចពិភាក្សាជាមួយលោក ទីនូប៊ូ ថា៖«ចិននឹងគាំទ្រយ៉ាងមុតមាំដល់ប្រជាជនអាហ្រ្វិកក្នុងការដោះស្រាយបញ្ហាអាហ្វ្រិកតាមរបៀបអាហ្វ្រិក»។ មិនត្រឹមតែប៉ុណ្ណោះ លោកបានសន្យាផ្តល់ជំនួយយោធាចំនួន១ ពាន់លានយ័នឬស្មើនឹងប្រមាណ១៣៦ លានដុល្លារដល់ទ្វីបអាហ្រ្វិក ហើយបាននិយាយថា ចិននឹងជួយបណ្តុះបណ្តាលទាហានចំនួន៦០០០ នាក់ និងមន្រ្តីប៉ូលិសចំនួន១០០០ នាក់នៅទូទាំងទ្វីប។
ដៃគូពាណិជ្ជកម្មដ៏សំខាន់មួយរបស់ចិននៅអនុតំបន់សាហារ៉ាអាហ្រ្វិក នីហ្សេរីយ៉ានាំចេញឧស្ម័ន និងប្រេងទៅកាន់រដ្ឋធានីប៉េកាំង ហើយនាំចូលផលិតផលចិនត្រឡប់ទៅវិញ។ ពាណិជ្ជកម្មរវាងប្រទេសទាំងពីរមានចំនួន២២,៦ ពាន់លានដុល្លារក្នុងឆ្នាំ២០២៣។ គួររំឭកថា ប្រធានាធិបតីចិនលោក ស៊ី ជីនពីង កាលពីខែកញ្ញាបានជួបជាមួយមេដឹកនាំអាហ្វ្រិកប្រហែល៥០ រួមទាំង លោក ទីនូប៊ូ នៅក្នុងកិច្ចប្រជុំកំពូលកិច្ចសហប្រតិបត្តិការចិននិងអាហ្វ្រិកក្នុងអំឡុងពេលដែលលោកបានសន្យាថានឹងផ្តល់ជំនួយចំនួន៥០ ពាន់លានដុល្លារក្នុងរយៈពេល៣ ឆ្នាំ។ ទាក់ទិននឹងទឹកប្រាក់ចំនួន៥០ ពាន់លានដុល្លារដែលបានសន្យាដោយរដ្ឋធានីប៉េកាំង លោក ទីនូប៊ូ បានលើកឡើងថា៖«តម្រូវការហេដ្ឋារចនាសម្ព័ន្ធរបស់ទ្វីបអាហ្រ្វិកនឹងតម្រូវឱ្យមានការប្តេជ្ញាចិត្តបន្ថែមទៀត ហើយបានអំពាវនាវឱ្យមានចំនួនទឹកប្រាក់ខ្ពស់ជាងនេះ»។
លោកបន្តថា៖«តម្រូវការហេដ្ឋារចនាសម្ព័ន្ធរបស់ទ្វីបអាហ្រ្វិកគឺធំជាងនេះទៅទៀត ហើយយើងចង់ផ្លាស់ទីយ៉ាងឆាប់រហ័សដូចសមភាគីផ្សេងទៀតរបស់យើង ហើយបានស្នើឱ្យប្រទេសចិនប្រើឥទ្ធិពលរបស់ខ្លួនសម្រាប់ប្រទេសនីហ្សេរីយ៉ាដើម្បីទទួលបានកៅអីអចិន្ត្រៃយ៍នៅក្រុមប្រឹក្សាសន្តិសុខអង្គការសហប្រជាជាតិ»។
ការប្រជែងគ្នាខាងភូមិសាស្ត្រនយោបាយរវាងមហាអំណាចពិភពលោកបានរះឡើងកាន់តែខ្លាំងឡើងចាប់តាំងពីរលកនៃរដ្ឋប្រហារយោធាបានផ្តួលរំលំមេដឹកនាំនៅក្នុងប្រទេសជាច្រើននៅអាហ្វ្រិកខាងលិចក្នុងប៉ុន្មានឆ្នាំថ្មីៗនេះ។ ប្រព័ន្ធផ្សព្វផ្សាយផ្លូវការរបស់ចិនបានរាយការណ៍ថា ចិនគឺជាដៃគូពាណិជ្ជកម្មកំពូលរបស់ទ្វីបអាហ្រ្វិក ជាមួយនឹងទំហំពាណិជ្ជកម្ម១៦៧,៨ ពាន់លានដុល្លារនៅក្នុងត្រីមាសទីមួយនៃឆ្នាំ២០២៤ ។ រដ្ឋធានីប៉េកាំងបានបញ្ជូនកម្មករ និងវិស្វកររាប់សែននាក់ទៅកាន់ទ្វីបអាហ្រ្វិក ហើយទទួលបានយុទ្ធសាស្ត្រចូលទៅកាន់ធនធានរ៉ែដ៏ធំរបស់ទ្វីបនេះ រួមមានទង់ដែង មាស និងលីចូម។ កម្ចីធនាគារសាធារណៈរបស់ចិនបានជួយប្រជាជាតិអាហ្រ្វិកផ្តល់ហិរញ្ញប្បទានដល់គម្រោងសាងសង់ និងកសាងហេដ្ឋារចនាសម្ព័ន្ធ ប៉ុន្តែមូលនិធិនេះបាននាំឱ្យប្រទេសមួយចំនួនធ្លាក់ខ្លួនជាប់បំណុលចិនវ័ណ្ឌក៕
