គណបក្សសេរីនិយម របស់នាយករដ្ឋមន្រ្តីកាណាដា នឹងជ្រើសរើសមេដឹកនាំថ្មី នៅថ្ងៃទី៩ មីនា មុនការបោះឆ្នោតឆ្នាំ២០២៥

អូតាវ៉ា៖ គណបក្សសេរីនិយមរបស់នាយករដ្ឋមន្រ្តីកាណាដា លោក ចាស្ទីន ទ្រូដូ (Justin Trudeau) បានប្រកាសកាលពីល្ងាចថ្ងៃព្រហស្បតិ៍ទី៩ ខែមករាថា ខ្លួននឹងជ្រើសរើសមេដឹកនាំថ្មីនៅថ្ងៃទី៩ ខែមីនា នៅមុនការបោះឆ្នោតឆ្នាំ២០២៥។

លោកនាយករដ្ឋមន្ត្រី ទ្រូដូ បានប្រកាសកាលពីថ្ងៃចន្ទថា លោកនឹងចុះចេញពីតំណែងនៅប៉ុន្មានខែខាងមុខនេះ បន្ទាប់ពីកាន់អំណាចរយៈពេលប្រាំបួនឆ្នាំ។ លោក ទ្រូដូ បាននិយាយថា លោកនឹងបន្តធ្វើជានាយករដ្ឋមន្ត្រី និងជាមេដឹកនាំគណបក្សសេរីនិយមរហូតដល់គណបក្សជ្រើសរើសប្រធានថ្មី។ ទន្ទឹមនឹងនោះ គណបក្សបានបញ្ជាក់នៅក្នុងសេចក្តីថ្លែងការណ៍មួយថា៖«គណបក្សសេរីនិយមកាណាដានឹងជ្រើសរើសមេដឹកនាំថ្មីនៅថ្ងៃទី៩ ខែមីនា ហើយត្រៀមខ្លួនដើម្បីប្រយុទ្ធនិងឈ្នះការបោះឆ្នោតឆ្នាំ២០២៥»។
ក្រុមប្រឹក្សាភិបាលជាតិរបស់គណបក្សនេះបានជួបប្រជុំគ្នាជាផ្លូវការនៅល្ងាចថ្ងៃព្រហស្បតិ៍ ដើម្បីពិភាក្សា និងគូសបញ្ជាក់អំពីច្បាប់ដំបូងនៃការប្រណាំងប្រជែងជ្រើសរើសថ្នាក់ដឹកនាំនាពេលខាងមុខ។ ការ​បោះឆ្នោត​ថ្នាក់​ដឹកនាំ​នឹង​បញ្ចប់​នៅ​ថ្ងៃ​ទី ៩ ខែ​មីនា ហើយ​មេដឹកនាំ​ថ្មី​នឹង​ត្រូវ​ប្រកាស​នៅ​ថ្ងៃ​ដដែល។

កាលបរិច្ឆេទបិទបញ្ចប់ការចុះឈ្មោះដើម្បីមានសិទ្ធិបោះឆ្នោតគឺថ្ងៃទី២៧ ខែមករា។ គណបក្សបានបន្ថែមថា ថ្លៃចុះឈ្មោះសម្រាប់បេក្ខជនដើម្បីចូលរួមការប្រណាំងប្រជែងដើម្បីក្លាយជាអ្នកដឹកនាំបក្សនឹងមានតម្លៃប្រមាណ២៤៣ ០០០ ដុល្លារ។

កាសែត The Globe and Mail បានរាយការណ៍កាលពីល្ងាចថ្ងៃព្រហស្បតិ៍ថា អតីតរដ្ឋមន្ត្រីហិរញ្ញវត្ថុ លោកស្រី គ្រីស្ទៀ ហ្វ្រីលែន (Chrystia Freeland) និងអតីតប្រធានធនាគារកណ្តាល ម៉ាក ខានី (Mark Carney) បានត្រៀមខ្លួនដើម្បីប្រជែងក្លាយជាមេដឹកនាំរបស់គណបក្សសេរីនិយម ខណៈដែលរដ្ឋមន្ត្រីការបរទេស មេឡានី ជូលី (Melanie Joly) និងរដ្ឋមន្ត្រីច្នៃប្រឌិត ហ្វ្រង់ស្វ័រ-ហ្វីលីព ឆាំប៉ាញ (François-Philippe Champagne) នៅតែមិនប្រាកដក្នុងចិត្តថាតើត្រូវចូលរួមក្នុងការប្រណាំងប្រជែងនេះឬយ៉ាងណា។

គួរបញ្ជាក់ថា ការបោះឆ្នោតនៅកាណាដាបន្ទាប់ត្រូវតែធ្វើឡើងយ៉ាងយូរត្រឹមថ្ងៃទី២០ ខែតុលា ហើយការស្ទង់មតិបង្ហាញថាអ្នកបោះឆ្នោតដែលមិនពេញចិត្តការកើនឡើងតម្លៃផ្ទះ និងទំនិញផ្សេងៗ ត្រូវបានកំណត់ដើម្បីជ្រើសរើសគណបក្សអភិរក្សនិយម។