វៀតណាម និងរុស្ស៊ី ចុះហត្ថលេខាលើកិច្ចព្រមព្រៀងស្តីពីថាមពលនុយក្លេអ៊ែរ
ហាណូយ៖ វៀតណាម និងរុស្ស៊ី កាលពីថ្ងៃអង្គារទី១៤មករា បានចុះហត្ថលេខាលើកិច្ចព្រមព្រៀងមួយ ស្តីពីថាមពលនុយក្លេអ៊ែរ និងកិច្ចព្រមព្រៀងសហប្រតិបត្តិការជាច្រើន ក្នុងអំឡុងទស្សនកិច្ចនៅរដ្ឋធានីហាណូយរបស់នាយករដ្ឋមន្ត្រីរុស្ស៊ី លោក មីខាល មីស៊ូស្ទីន។
នាយករដ្ឋមន្ត្រីរុស្ស៊ី លោក មីស៊ូស្ទីន បាននិយាយថា រុស្ស៊ីមានឆន្ទៈចូលរួមក្នុងការកសាងឧស្សាហកម្មថាមពលនុយក្លេអ៊ែររបស់វៀតណាម ខណៈលោកបានជួបពិភាក្សាជាមួយសមភាគីវៀតណាម លោក ផាម មិញជីញ នៅរដ្ឋធានីហាណូយកាលពីថ្ងៃអង្គារ។
វៀតណាម មានបំណងចាប់ផ្តើមកម្មវិធីថាមពលនុយក្លេអ៊ែររបស់ខ្លួនឡើងវិញ ក្រោយត្រូវបានផ្អាកអស់ជាច្រើនឆ្នាំ ខណៈប្រទេសភូមិផងរបងជាមួយកម្ពុជាមួយនេះកំពុងដុតដៃដុតជើងជំរុញការផលិតថាមពល ដើម្បីបំពេញតម្រូវការវិស័យឧស្សាហកម្មកំពុងរីកចម្រើន ដែលជាកត្តាជំរុញសេដ្ឋកិច្ចរបស់ខ្លួន។
រ៉ូសាតុម (Rosatom) សាជីវកម្មថាមពលអាតូមិករដ្ឋរបស់រុស្ស៊ី និងក្រុមហ៊ុនថាមពលរដ្ឋរបស់វៀតណាម EVN បានព្រមព្រៀងគ្នាក្នុងការជំរុញកិច្ចសហប្រតិបត្តិការក្នុងវិស័យនុយក្លេអ៊ែរ។ នេះបើយោងតាមឯកសាររួមដែលរាយបញ្ជីកិច្ចព្រមព្រៀងសហប្រតិបត្តិការដែលបានចុះហត្ថលេខារបស់ពួកគេ។ ខ្លឹមសារនៃកិច្ចព្រមព្រៀងនេះ មិនត្រូវបានចែករំលែកជាសាធារណៈនោះទេ។
គួរជម្រាបថា សហរដ្ឋអាម៉េរិកបានដាក់ទណ្ឌកម្មរាប់សិបលើក្រុមហ៊ុនបុត្រសម្ព័ន្ធរបស់ក្រុមហ៊ុនរ៉ូសាតុម និងមន្ត្រីជាន់ខ្ពស់របស់ក្រុមហ៊ុន។ វិធានការចុងក្រោយបំផុតត្រូវបានប្រកាសកាលពីសប្តាហ៍មុនដោយក្រសួងការបរទេសសហរដ្ឋអាម៉េរិក។ រ៉ូសាតុមបានពណ៌នាការដាក់ទណ្ឌកម្មរបស់សហរដ្ឋអាម៉េរិកប្រឆាំងនឹងមន្ត្រីកំពូលរបស់ខ្លួន ថាគ្មានមូលដ្ឋាន និងមិនស្របច្បាប់ និងទម្រង់នៃការប្រកួតប្រជែងមិនយុត្តិធម៌ពីរដ្ឋដែលមិនរាក់ទាក់។
រដ្ឋធានីមូស្គូ ក៏បានយល់ព្រមផ្ទេរនាវាស្រាវជ្រាវដែនសមុទ្ទទៅកាន់ប្រទេសវៀតណាមក្រោមកិច្ចព្រមព្រៀងដែលចុះហត្ថលេខាដោយក្រសួងការពារជាតិវៀតណាម និងក្រសួងវិទ្យាសាស្ត្ររុស្ស៊ី។ រដ្ឋាភិបាលវៀតណាម បានរៀបរាប់នៅលើគេហទំព័ររបស់ខ្លួនថា៖«ភាគីទាំងពីរនឹងពិនិត្យឡើងវិញ ពិភាក្សា និងស្វែងរកដំណោះស្រាយចំពោះការកំណត់ក្នុងកិច្ចសហប្រតិបត្តិការទ្វេភាគី ដោយយោងទៅលើកិច្ចព្រមព្រៀងដែលបានចុះហត្ថលេខាកាលពីថ្ងៃអង្គារ»។ មិនត្រឹមតែប៉ុណ្ណោះ ភាគីទាំង២ បានចុះហត្ថលេខាផងដែរកាលពីថ្ងៃអង្គារ គឺជាកិច្ចព្រមព្រៀងស្តីពីកិច្ចសហប្រតិបត្តិការលើសេដ្ឋកិច្ចឌីជីថល និងក្នុងការទំនាក់ទំនងឥតខ្សែ។
គួរបញ្ជាក់ថា ប្រទេសកុម្មុយនីស្ដវៀតណាមបន្តរក្សាទំនាក់ទំនងជិតស្និទ្ធជាមួយមហាអំណាចពិភពលោក ដោយពុំខ្វល់ពីរបបនយោបាយ។ ជាក់ស្តែងប្រទេសនេះ មានទំនាក់ទំនងស្អិតល្មួតជាមួយរដ្ឋធានីម៉ូស្គូ វ៉ាស៊ីនតោន និងប៉េកាំង។ យក្សកំណាចនុយក្លេអ៊ែររុស្ស៊ី គឺជាដៃគូជួញដូរយុទ្ធោបករណ៍មិនអាចខ្វះបានរបស់វៀតណាមជាយូរមកហើយ ហើយក្រុមហ៊ុនប្រេង និងឧស្ម័នរុស្ស៊ីប្រតិបត្តិការនៅក្នុងផ្នែករបស់វៀតណាមនៃសមុទ្ទចិនខាងត្បូង រួមទាំងនៅក្នុងតំបន់ដែលទាមទារដោយមហាយក្សចិនផងដែរ។ យ៉ាងណាមិញ ទណ្ឌកម្មរបស់លោកខាងលិចដែលដាក់លើរុស្ស៊ីសម្រាប់ប្រតិបត្តិការយោធារបស់ខ្លួននៅអ៊ុយក្រែន បានរារាំងប្រតិបត្តិការហិរញ្ញវត្ថុរវាងរដ្ឋធានីហាណូយ និងម៉ូស្គូ៕
