មូលដ្ឋានសុខាភិបាលឯកជន កម្រិត១(CPA1) និងកម្រិត២ (CPA2) ចូលរួមកិច្ចប្រជុំស្ដីពី “ការកែសម្រួលយន្តការនៃការទូទាត់ថ្លៃសេវាព្យាបាល និងថែទាំវេជ្ជសាស្រ្តរបស់មូលដ្ឋានសុខាភិបាលឯកជន ”
ភ្នំពេញ៖ នាព្រឹកថ្ងៃទី១៥ ខែមករា ឆ្នាំ២០២៥ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាងឯកឧត្តម ម៉េង ហុង ប្រតិភូរាជរដ្ឋាភិបាល ទទួលបន្ទុកជាអគ្គនាយក ប.ស.ស. បានអញ្ជើញដឹកនាំកិច្ចប្រជុំស្ដីពី “ការកែសម្រួលយន្តការនៃការទូទាត់ថ្លៃសេវាព្យាបាល និងថែទាំវេជ្ជសាស្រ្តរបស់មូលដ្ឋានសុខាភិបាលឯកជន” ជាមួយតំណាងមូលដ្ឋានសុខាភិបាលឯកជនកម្រិត១ (CPA1) ដែលជាដៃគូ ប.ស.ស. ចំនួន៣៤ មូលដ្ឋានសុខាភិបាល នៅសាលប្រជុំសុខដុមរមនា ស្នាក់ការកណ្តាល ប.ស.ស. រាជធានីភ្នំពេញ។
មានប្រសាសន៍ក្នុងកិច្ចប្រជុំ ឯកឧត្តមបណ្ឌិតអគ្គនាយករង ប.ស.ស. បានឱ្យដឹងថា ដើម្បីផ្សព្វផ្សាយព័ត៌មាននៃភាពចាំបាច់ក្នុងការកែសម្រួលអត្រាទូទាត់ថ្លៃព្យាបាល និងថែទាំវេជ្ជសាស្រ្ត និងពន្លឿននៃការទូទាត់ជូនមូលដ្ឋានសុខាភិបាលដែលជាដៃគូ ប.ស.ស. ឱ្យបានគ្រប់ជ្រុងជ្រោយ និងឆាប់រហ័ស ទាមទារឱ្យមូលដ្ឋានសុខាភិបាលទាំងអស់ចូលរួមអនុវត្ត និងយោគយល់អធ្យា ស្រ័យខ្ពស់ ពិសេសសូមរក្សាជំហរក្នុងការផ្ដល់សេវាជូនសមាជិក ប.ស.ស. ប្រកបដោយមនុស្សធម៌ ក្រមសីលធម៌ និងតម្លាភាព ក្នុងន័យដើម្បីបន្ដកិច្ចសហការជាមួយគ្នាបន្ដទៀត។
ជាមួយគ្នានេះ ឯកឧត្តមបណ្ឌិតអគ្គនាយករង ប.ស.ស. បានសំណូមពរដល់មូលដ្ឋានសុខាភិបាល ឬសមាជិក ប.ស.ស. ទាំងអស់ ប្រសិនបើសង្កេតឃើញមានភាពមិនប្រក្រតីណាមួយ ដែលកើតមានឡើង ឬមានភាពមិនពេញចិត្តត្រង់ចំណុចណាមួយ នៃការផ្ដល់សេវានានា លោកអ្នកអាចធ្វើការប្ដឹងមកកាន់បណ្តឹងអនាមិក របស់ក្រសួងការងារ និងបណ្ដុះបណ្ដាលវិជ្ជាជីវៈបាន ដើម្បីជាឧត្តមប្រយោជន៍រួមទាំងអស់គ្នា។
ដោយឡែកនៅរសៀលថ្ងៃដដែលនេះ ដែរ ឯកឧត្តមបណ្ឌិតអគ្គនាយករង ប.ស.ស. ក៏បានបន្ដដឹកនាំកិច្ចប្រជុំនេះជាមួយតំណាងមូលដ្ឋានសុខាភិបាលឯកជនកម្រិត២ (CPA2) ដែលជាដៃគូ ប.ស.ស. ចំនួន២៣ បន្ថែមទៀត សរុបចំនួន៥៧ មូលដ្ឋានសុខាភិបាល នៅសាលប្រជុំមេត្តា ស្នាក់ការកណ្តាល ប.ស.ស. រាជធានីភ្នំពេញផងដែរ ៕
