អភិបាលខេត្តតាកែវ ដឹកនាំកម្លាំងចម្រុះចុះបង្ក្រាប និងកាប់ដុតបំផ្លាញដំណាំកញ្ឆាខុសច្បាប់ ៧ទីតាំង នៅស្រុកគីរីវង់
ភ្នំពេញ៖ នៅថ្ងៃអាទិត្យ ទី២ ខែកុម្ភៈ ឆ្នាំ២០២៥នេះ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានដឹកនាំកម្លាំងចម្រុះ រួមមាន កម្លាំងនគបាល ទាហ៊ាន និងកងរាជអាវុធហត្ថ ចុះធ្វើការបង្រ្កាបនិងកាប់ដុតបំផ្លាញដំណាំកញ្ឆាខុសច្បាប់ ដែលក្រុមជនខិលខូចបានធ្វើការលួចដាំខុសច្បាប់នៅតាមជំរាលភ្នំបាយ៉ងកោរ ដែលស្ថិតនៅក្នុងឃុំព្រះបាទជាន់ជុំ ស្រុកគីរីវង់ ខេត្តតាកែវ។
នៅក្នុងការដឹកនាំកម្លាំងចុះបង្រ្កាប និងកាប់បំផ្លាញដំណាំកញ្ឆាខុសច្បាប់នេះពីសំណាក់ ឯកឧត្តម វ៉ី សំណាង អភិបាលខេត្តតាកែវ កម្លាំងចម្រុះបានធ្វើការកាប់ និងដុតបំផ្លាញទីតាំងដាំដំណាំកញ្ឆាខុសច្បាប់ចំនួន ៧ទីតាំង ដែលមានដើមកញ្ឆាជាង ៣ពាន់ដើម នៅលើផ្ទៃដីប្រមាណជាង ១ពាន់ម៉ែត្រការ៉េ ព្រមទាំងបានបំផ្លាញអាងទឹកសម្រាប់ស្រោចស្រពដំណាំកញ្ឆាចំនួន៦អាងទឹកថែមទៀតផង។
ក្នុងឱកាសនោះ ឯកឧត្តម វ៉ី សំណាង អភិបាលខេត្តតាកែវ ក៏បានធ្វើការណែនាំដល់សមត្ថកិច្ចជាពិសេសសមត្ថកិច្ចនៅមូលដ្ឋានធ្វើការតាមដានឃ្លាំមើលឱ្យបានញឹកញាប់ និងបន្តចុះពិនិត្យមើលដល់ទីតាំង ដើម្បីធ្វើយ៉ាងណាបង្រ្កាបឱ្យអស់នៅការលួចដាំដំណាំកញ្ឆាខុសច្បាប់នេះ នៅតាមជំរាលភ្នំបាយ៉ង់កោ ក្នុងស្រុកគីរីវង់។
ឯកឧត្តមអភិបាលខេត្តតាកែវ ក៏បានណែនាំដល់កម្លាំងចម្រុះទាំងអស់ត្រូវចុះបង្រ្កាបការលួចដាំដំណាំកញ្ឆាខុសច្បាប់នៅតាមជួភ្នំបាយ៉ងកោ ក្នុងស្រុកគីរីវង់ រៀងរាល់ ៣ខែម្ដង និងត្រូវធ្វើដូចភ្លៀងរលឹម សំដៅធ្វើយ៉ាងណាទប់ស្កាត់អោយបាននៅការលួចដាំដំណាំកញ្ឆាខុសច្បាប់នេះអោយអស់ ៕
