កុំព្យូទ័រយួរដៃ អំណោយរបស់សម្ដេចធិបតី ហ៊ុន ម៉ាណែត និងលោកជំទាវ តាមរយៈឯកឧត្តម ហេង សួរ រដ្ឋមន្ត្រីក្រសួងការងារ ត្រូវបានប្រគល់ជូនការិយាល័យជំនាញនៃបញ្ជាការដ្ឋានតំបន់ប្រតិបត្តិការសឹករងកំពង់ធំ

ភ្នំពេញ៖ នៅរសៀលថ្ងៃទី០៣ ខែមីនា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានប្រគល់កុំព្យូទ័រយកដៃចំនួន ៥គ្រឿង ដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី តាមរយៈឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ជូនថ្នាក់ដឹកនាំការិយាល័យជំនាញចំនួន ៥ នៃបញ្ជាការដ្ឋានតំបន់ប្រតិបត្តិការសឹករង រួមនិងក្រុមលេខាធិកាដ្ឋាននៃសមាគមអតីតយុទ្ធជនកម្ពុជា ខេត្តកំពង់ធំផងដែរ៕

ឧត្តមសេនីយ៍ទោ សោម ស៊ុន បានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចមហាបវរអធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី តាមរយៈឯកឧត្តម ហេង សួរ ដែលបានឧបត្ថម្ភកុំព្យូទ័រយួរដៃចំនួន ៥គ្រឿង ជូនដល់បញ្ជាការដ្ឋានតំបន់ប្រតិបត្តិការសឹករងកំពង់ធំ ដើម្បីបម្រើការងារជំនាញផ្សេងៗតាមភារកិច្ចរៀងៗខ្លួន ស្របតាមការអភិវឌ្ឍរីកចម្រើនក្នុងវិស័យឌីជីថល ក្នុងការបម្រើការងារតាមភារកិច្ចបានទាន់ពេលវេលា និងការរក្សាទុកដាក់ឯកសារបានល្អស្របតាមបច្ចេកវិទ្យាថ្មី ។

ឧត្តមសេនីយ៍ទោ សោម ស៊ុន បានណែនាំដល់ការីកុំព្យូទ័រ នៃការិយាល័យជំនាញនីមួយៗ ត្រូវប្រើប្រាស់ឲ្យបានត្រឹមត្រូវតាមលក្ខណៈបច្ចេកទេស ដោយត្រូវថែទាំឲ្យបានល្អ ស្របតាមការណែនាំរបស់មន្ត្រីជំនាញកុំព្យូទ័រ ដើម្បីធានាការប្រើប្រាស់បានយូរអង្វែង និងប្រកបដោយប្រសិទ្ធភាពខ្ពស់ ។

នាយការិយាល័យ ស្ថាប័នជំនាញទាំងប្រាំ បានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវ , ឯកឧត្តម ហេង សួរ និងលោកជំទាវ ព្រមទាំងឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ដែលបានប្រគល់កុំព្យូទ័រសំរាប់ការិយាល័យជំនាញនីមួយៗ បានប្រើប្រាស់ក្នុងការបំពេញភារកិច្ច ប្រកបដោយប្រសិទ្ធភាព និងសូមគោរពជូនពរសម្ដេចលោកជំទាវបណ្ឌិត និងឯកឧត្តម លោកជំទាវ លោក លោកស្រីទាំងអស់ សូមទទួលបាននូវពុទ្ធពរទាំង ៤ប្រការកុំបីឃ្លាមឃ្លាតឡើយ៕