ប្រេសិតអាម៉េរិក៖ លោក ដូណាល់ ត្រាំ ត្រូវបានគេរំពឹងថា នឹងជជែកពិភាក្សាជាមួយលោក ពូទីន នៅសប្តាហ៍នេះ ស្តីពីវិធីបញ្ចប់សង្រ្គាមរ៉ាំរ៉ៃនៅអ៊ុយក្រែន
វ៉ាស៊ីនតោន៖ ថ្លែងប្រាប់សារព័ត៌មាន CNN កាលពីថ្ងៃអាទិត្យទី១៦ ខែមីនា ប្រេសិតអាម៉េរិក លោក ស្ទីវ វិតខហ្វ បានបញ្ជាក់ថា ប្រធានាធិបតីអាម៉េរិក លោក ដូណាល់ ត្រាំ ត្រូវបានគេរំពឹងថា នឹងជជែកពិភាក្សាជាមួយសមភាគីរុស្ស៊ី លោក វ្ល៉ាឌីមៀ ពូទីន នៅសប្តាហ៍នេះស្តីពីវិធីបញ្ចប់សង្រ្គាមរ៉ាំរ៉ៃនៅអ៊ុយក្រែន។ លោក វិតខហ្វ បានលើកឡើងបែបនេះ បន្ទាប់ពីមានជំនួបវិជ្ជមានជាមួយលោក ពូទីន នៅមូស្គូ។
លោក វិតខហ្វ ដែលបានជួបជាមួយលោក ពូទីន កាលពីយប់ថ្ងៃព្រហស្បតិ៍ទី១៣ ខែមីនាបាននិយាយថា៖«ខ្ញុំរំពឹងថានឹងមានការហៅទូរសព្ទជាមួយប្រធានាធិបតីទាំងពីរនៅសប្តាហ៍នេះ ហើយយើងក៏កំពុងបន្តទំនាក់ទំនង និងសន្ទនាជាមួយអ៊ុយក្រែនផងដែរ ដោយបន្ថែមថាគាត់គិតថាការពិភាក្សារវាងលោក ត្រាំ និងលោក ពូទីន ពិតជាល្អ និងវិជ្ជមាន»។
លោក ត្រាំ កំពុងព្យាយាមលួងលោមលោក ពូទីន ឱ្យទទួលយកសំណើបទឈប់បាញ់រយៈពេល៣០ ថ្ងៃដែលអ៊ុយក្រែនបានទទួលយកកាលពីសប្តាហ៍មុន ខណៈដែលភាគីជម្លោះទាំងពីរបានបន្តវាយប្រហារតាមអាកាសដាក់គ្នាយ៉ាងខ្លាំងនៅប៉ុន្មានថ្ងៃចុងក្រោយនេះ។
លោក ត្រាំ បានរៀបរាប់នៅក្នុងការបង្ហោះប្រព័ន្ធផ្សព្វផ្សាយសង្គមកាលពីថ្ងៃសុក្រទី១៤ ខែមីនាថាមានឱកាសដ៏ល្អដែលសង្រ្គាមបង្ហូរឈាមដ៏អាក្រក់នេះអាចឈានដល់ទីបញ្ចប់។ មេដឹកនាំអាម៉េរិករូបនេះបានព្រមានថា បទឈប់បាញ់ត្រូវតែសម្រេច ដើម្បីបញ្ចៀសកុំឱ្យជម្លោះរវាងរដ្ឋធានីម៉ូស្គូ និងកៀវឈានដល់សង្រ្គាមលោកលើកទីបី។
លោក ត្រាំ ក៏ស្នើសុំលោក ពូទីន កុំសម្លាប់ទាហានអ៊ុយក្រែនរាប់ពាន់នាក់ដែលរុស្ស៊ីកំពុងវាយរុញច្រានចេញពីតំបន់ Kursk ។
លោក ពូទីន បានឆ្លើយតបវិញថា លោកនឹងគោរពសំណើរបស់លោក ត្រាំ ក្នុងការសង្គ្រោះជីវិតរបស់ទាហានអ៊ុយក្រែន ប្រសិនបើពួកគេទម្លាក់អាវុធចុះចាញ់។ ទន្ទឹមនឹងនោះ វិមានក្រឹមឡាំងក៏បានបញ្ជាក់កាលពីថ្ងៃសុក្រថា លោក ពូទីន បានផ្ញើសារទៅលោក ត្រាំ អំពីផែនការបទឈប់បាញ់តាមរយៈលោក វិតខហ្វ ដោយបង្ហាញពីសុទិដ្ឋិនិយមដោយប្រុងប្រយ័ត្នដែលកិច្ចព្រមព្រៀងមួយអាចត្រូវបានសម្រេចដើម្បីបញ្ចប់ជម្លោះ។
គួរជម្រាបជូនថា រដ្ឋមន្ត្រីការបរទេសសហរដ្ឋអាម៉េរិក លោក ម៉ាកូ រូប៊ីអូ បានសន្ទនាតាមទូរសព្ទជាមួយរដ្ឋមន្ត្រីការបរទេសរុស្ស៊ី លោក សឺហ្គឺ ឡាវរ៉ូវ អំពីជំហានបន្ទាប់ដើម្បីបិទបញ្ចប់សង្គ្រាមរុស្ស៊ីនៅអ៊ុយក្រែន។
អ្នកនាំពាក្យក្រសួងការបរទេសអាម៉េរិកបានឱ្យដឹងថា អ្នកការទូតកំពូលទាំងពីរ បានយល់ព្រមបន្តធ្វើការឆ្ពោះទៅរកការស្តារទំនាក់ទំនងរវាងសហរដ្ឋអាម៉រិក និងរុស្ស៊ីផងដែរ។ យ៉ាងណា អ្នកនាំពាក្យរូបនេះមិនបានផ្តល់ព័ត៌មានលម្អិតអំពីពេលវេលាជាក់ស្តែងដែលកិច្ចចរចារវាងសហរដ្ឋអាម៉េរិក និងរុស្ស៊ី ទទួលរៀបចំដោយអារ៉ាប៊ីសាអូឌីត នឹងចាប់ផ្តើមនោះទេ៕
