នាយករដ្ឋមន្ត្រីថ្មីកាណាដា៖ ប្រធានាធិបតីសហរដ្ឋអាម៉េរិក លោក ដូណាល់ ត្រាំ ត្រូវតែបញ្ឈប់ការបញ្ចេញមតិអត់ប្រយោជន៍អំពីប្រទេសកាណាដា
អូតាវ៉ា៖ លោក ម៉ាក ខានី នាយករដ្ឋមន្ត្រីថ្មីរបស់កាណាដាបាននិយាយថា ប្រធានាធិបតីសហរដ្ឋអាម៉េរិក លោក ដូណាល់ ត្រាំ ត្រូវតែបញ្ឈប់ការបញ្ចេញមតិអត់ប្រយោជន៍អំពីប្រទេសកាណាដា មុនពេលប្រទេសទាំងពីរអាចចាប់ផ្តើមការពិភាក្សាកិច្ចការមួយចំនួននៃទំនាក់ទំនងនាពេលអនាគត។
លោកត្រាំដែលសន្យាថា នឹងដាក់ពន្ធ ប្រឆាំងការនាំចូលពីប្រទេស កាណាដា តែង តែ មានបំណងអូសទាញប្រទេសនេះឱ្យក្លាយជារដ្ឋ ទី៥១របស់សហរដ្ឋអាម៉េរិក។
លោក ខានី បានប្រាប់អ្នកយកព័ត៌មាននៅទីក្រុងឡុងដ៍ថា៖«ការបញ្ចេញមតិទាំងនោះគ្មានការគោរព គ្មានប្រយោជន៍ ហើយគួរតែត្រូវបញ្ចប់ជាមុន ពេលយើងចូលតុចរចាអំពីភាពជាដៃគូដ៏ទូលំទូលាយរបស់យើងជាមួយសហរដ្ឋអាម៉េរិក»។
លោក ខានី ស្បថចូលកាន់តំណែងកាលពីសប្តាហ៍មុន មិនទាន់បាននិយាយជាមួយលោក ត្រាំឡើយ ខណៈប្រធានាធិបតីសហរដ្ឋអាម៉េរិក បានរក្សាភាពស្ងៀមស្ងាត់អំពីការតែងតាំងនាយករដ្ឋមន្ត្រីថ្មីរូបនេះ។
លោក ខានី បាននិយាយថា ប្រទេសកាណាដាចង់បានការពិភាក្សា និងការចរចាដ៏ទូលំទូលាយបន្ថែមទៀតនៃទំនាក់ទំនងពាណិជ្ជកម្ម និងសន្តិសុខរួមរបស់ប្រទេសជិតខាងទាំងពីរ។
លោកបានកត់សម្គាល់យ៉ាងដូច្នេះថា៖«កាណាដានឹងចូលតុចរចា នៅពេលដែលអាម៉េរិកត្រៀមខ្លួនរួចរាល់»។ កាណាដា បានសងសឹកលើពន្ធរដ្ឋបាលរបស់លោក ត្រាំ ដោយដាក់ពន្ធលើការនាំចូល តម្លៃរាប់ពាន់លានដុល្លារអាម៉េរិក។ លោក ខានីថា រដ្ឋធានីអូតាវ៉ា នឹងចាត់វិធានការដែលខ្លួនគិតថា អាចប៉ះពាល់ដល់អាកប្បកិរិយារបស់សហរដ្ឋអាម៉េរិកប៉ុណ្ណោះ៕
