ការជជែកដេញដោលប្រឆាំងនឹងលោកស្រីនាយករដ្ឋមន្ត្រី ផែថងថា ឈិនៈវ៉ាត់ ចាប់ផ្តើមដោយផ្តោតលើការចោទប្រកាន់ថា លោកស្រីខ្វះសមត្ថភាព គេចវេះមិនបង់ពន្ធ និងធ្វើតាមបញ្ជារបស់ឪពុក
បាងកក ៖ ការជជែកដេញដោលប្រឆាំងនឹងលោកស្រីនាយករដ្ឋមន្ត្រី ផែថងថា ឈិនៈវ៉ាត់ បានចាប់ផ្តើមកាលពីព្រឹកថ្ងៃចន្ទទី២៤មីនា ដោយផ្តោតលើការចោទប្រកាន់ថា លោកស្រីខ្វះសមត្ថភាព គេចវេះមិនបង់ពន្ធ និងធ្វើតាមបញ្ជារបស់ឪពុក។
ក្នុងអំឡុងការជជែកដេញដោលនេះ មេដឹកនាំគណបក្សផាឡាំង ប្រាឆារ៉ាត់ បានរិះគន់ចំពោះការធ្វើការរបស់លោកស្រីនាយករដ្ឋមន្ត្រី លើអនុស្សរណៈ នៃ ការ យោគយល់ គ្នា (MoU) ជាមួយប្រទេសកម្ពុជា ដែល លោក អះអាងថា បូរណភាពទឹកដីថៃអាចបាត់បង់ទៅកម្ពុជា។
លោក ណាត់ថៈភុង រឿងបញ្ញាវុទ្ធ មេដឹកនាំគណបក្សប្រជាជន ដែលជាបក្សប្រឆាំង បានបើកការជជែកដេញដោល ដោយបញ្ជាក់ថា គណបក្សប្រឆាំងមិនអាចជឿទុកចិត្តលើគោលនយោបាយរបស់រាជរដ្ឋាភិបាលឡើយ។
លោកប្រាប់សភាថា លោកស្រី ផែថងថាន ខ្វះចេតនាដោះស្រាយបញ្ហាជាតិ និងចំណេះដឹងដែលត្រូវការសម្រាប់ការគ្រប់គ្រងជាតិ។
លោកបរិយាយថា៖«បញ្ហាជាតិ រួមទាំងការបំពុលបរិយាកាស ថ្លៃអគ្គិសនីខ្ពស់ និងការកើនឡើងយ៉ាងគំហុកនៃវត្តមាន ត្រីទីឡាបយ៉ាខ្មៅនៅតែមិនអាចដោះស្រាយបាន ហើយគោលនយោបាយផ្តល់ប្រាក់១០ ០០០បាតរបស់រាជរដ្ឋាភិបាល បានបរាជ័យក្នុងការជំរុញសេដ្ឋកិច្ច»។
លោក ណាត់ថៈភុង បាន និយាយ សំដៅ ទៅលើការវិលត្រឡប់របស់ លោក ថាក់ស៊ីន ឈិនៈវ៉ាត់ ឪពុករបស់លោកស្រី ផែថងថានថា៖«យើងមានមេដឹកនាំក្រៅ ប្រព័ន្ធដែលធ្វើការនៅក្រៅវិមានរាជរដ្ឋាភិបាលដោយមិនចាំបាច់ទទួលខុសត្រូវ ព្រោះ គាត់ មិនស្ថិតក្រោមយន្តការត្រួតពិនិត្យណា មួយ»។
ទន្ទឹមនឹងនោះ មេដឹកនាំគណបក្សផាឡាំង ប្រាឆារ៉ាត់ លោក ប្រាវីត វង្ស ស៊ូវ៉ុន បានប្រាប់សភាថា នាយករដ្ឋមន្ត្រីបានបន្តគោលនយោបាយផ្តល់ប្រាក់១០០០០បាត ទោះបីជាធនាគារពិភពលោក និងមូលនិធិរូបិយវត្ថុអន្តរជាតិបានព្រមានថា វាមិនមានប្រសិទ្ធភាពក្នុងការជំរុញសេដ្ឋកិច្ចក៏ដោយ។
លោក ថា៖«គោលនយោបាយ កិច្ចការ បរទេស របស់ នាយក រដ្ឋមន្ត្រី ទាក់ទង នឹង អនុស្សរណៈ នៃការយោគយល់គ្នាឆ្នាំ ២០០១ ជាមួយកម្ពុជាបានធ្វើឱ្យធនធានសមុទ្ទនិង ទឹកដីថៃប្រឈមនឹងហានិភ័យ»។
បន្ថែមលើនេះ លោកក៏បានលើកឡើងថា ការគាំទ្ររបស់រាជរដ្ឋាភិបាលចំពោះកន្លែងកម្សាន្ត ដែលមានកាស៊ីណូស្របច្បាប់នឹងធ្វើឱ្យប៉ះពាល់ដល់ប្រទេស ធ្វើឱ្យប្រជាជនចុះខ្សោយ និងជំរុញសកម្មភាពខុសច្បាប់ រួមទាំងការលាងលុយកខ្វក់ផងដែរ។
គួរជម្រាបថា លោកស្រី ផែថងថាន វ័យ៣៨ឆ្នាំ បានឡើងកាន់តំណែងជានាយករដ្ឋមន្ត្រី កាលពីខែសីហាឆ្នាំមុន បន្ទាប់ពីសម្ព័ន្ធមិត្តនយោបាយរបស់លោកស្រី គឺលោក សេដ្ឋា ថាវីស៊ីន ត្រូវបានបណ្តេញចេញពីតំណែង ដោយតុលាការជុំវិញការរំលោភលើក្រមសីលធម៌។ លោកស្រី គឺ ជា សមាជិកទីបួន នៃត្រកូលឈិនៈវ៉ាត់ ដែលបានឡើងកាន់តំណែង កំពូលរបស់ប្រ ទេសក្បែរខាងកម្ពុជាយើងនេះ៕
