ក្រសួងមហាផៃ្ទ បើកកិច្ចប្រជុំពិនិត្យនិងផ្ដល់យោបល់សេចក្ដីព្រាងអនុក្រឹត្យស្ដីពីឯកសណ្ឋាន សញ្ញាសម្គាល់ និងទង់នគរបាលជាតិកម្ពុជា
ភ្នំពេញ៖ នៅទីស្ដីការក្រសួងមហាផ្ទៃ នារសៀលថ្ងៃអង្គារ ទី០១ ខែមេសាឆ្នាំ២០២៥ ឯកឧត្តមសន្តិបណ្ឌិត ចាន់ អ៊ាន និងឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ បានអញ្ជើញជាសហប្រធានដឹកនាំកិច្ចប្រជុំពិនិត្យ និងផ្ដល់យោបល់សេចក្ដីព្រាងអនុក្រឹត្យស្ដីពីឯកសណ្ឋាន សញ្ញាសម្គាល់ និងទង់នគរបាលជាតិកម្ពុជា។
កិច្ចប្រជុំនេះក៏មានការអញ្ជើញចូលរួមពី ឯកឧត្តម អនុរដ្ឋលេខាធិការ អគ្គលេខាធិការរង អគ្គស្នងការរង អគ្គនាយករង ព្រមទាំងថ្នាក់ដឹកនាំចំណុះក្រសួងមហាផ្ទៃ ជាច្រើនរូបទៀតផងដែរ។
ឯកឧត្តមសន្តិបណ្ឌិត ចាន់ អ៊ាន បានមានប្រសាសន៍ស្វាគមន៍ និងលើកឡើងអំពីកម្មវត្ថុនៃកិច្ចប្រជុំនេះ ព្រមទាំងបានលើកឡើងពីសារបាននៃការរៀបចំសេចក្ដីព្រាងអនុក្រឹត្យស្ដីពីឯកសណ្ឋាន សញ្ញាសម្គាល់ និងទង់នគរបាលជាតិកម្ពុជា។
លោកឧត្តមសេនីយ៍ឯក មុនី វីរៈ អគ្គនាយករង នៃអគ្គនាយដ្ឋានធនធានមនុស្ស បានរាយការណ៍អំពីគោលបំណង និងដំណើរនៃការរៀបចំសេចក្ដីព្រាងអនុក្រឹត្យស្ដីពីឯកសណ្ឋាន សញ្ញាសម្គាល់ និងទង់នគរបាលជាតិកម្ពុជាគឺដើម្បីប្រមូលបទដ្ឋានគតិយុត្តិនានាដែលនៅដាច់ដោយឡែកសម្រាប់ធ្វើអនុក្រឹត្យតែមួយឱ្យស្របទៅតាមការអភិវឌ្ឍសេដកិច្ច និងសង្គម ជាពិសេសដើម្បីពង្រឹងវិន័យមន្ត្រីនគរបាលជាតិឱ្យកាន់តែប្រសើរឡើងទៀត ពីព្រោះឯកសណ្ឋាននគរបាលជាតិជាអត្តសញ្ញាណនគរជាតិយើង។
លោកបានបន្តទៀតថា ការរៀបចំសេចក្ដីព្រាងអនុក្រឹត្យនេះ ក៏ដើម្បីលើកកម្ពស់ប្រសិទ្ធភាពការងារ និងស្មារតីទទួលខុសត្រូវរបស់មន្ត្រីនគរបាលជាតិ ឱ្យឆ្លើយតបទៅនឹងការអភិវឌ្ឍសន្តិសុខក្នុងតំបន់ និងពិភពលោកក៏ដូចជាការរីកចម្រើនប្រទេសជាតិនាពេលបច្ចុប្បន្នផងដែរ។
លោកឧត្តមសេនីយ៍ឯក បានគូសបញ្ជាក់បន្ថែមទៀតថា នេះក៏ជាផ្នែកមួយដើម្បីលើកកម្ពស់មនសិការស្នេហាជាតិ របស់កងកម្លាំងឱ្យមានភក្តីភាពចំពោះ ជាតិ សាសនា ព្រះមហាក្សត្រ និងរាជរដ្ឋាភិបាល។ ជាងនេះទៅទៀត គឺដើម្បីពង្រឹងវិជ្ជាជីវៈ និងធ្វើទំនើបកម្មនៃកងកម្លាំងនគរបាលជាតិឱ្យស្របតាមស្ថានភាពជាក់ស្ដែង នៃការអភិវឌ្ឍរីកចម្រើនរបស់ប្រទេសជាតិ ក្នុងយុគ្គសម័យបច្ចេកវិទ្យាឌីជីថលផងដែរ។ បន្ថែមលេីសពីនេះក៏ជាមូលដ្ឋានគតិយុត្តនៅក្នុងការអនុវត្ត ការធានាបំពេញតួនាទីភារកិច្ចរបស់មន្ត្រីនគរបាលជាតិ តាមឋានានុក្រម ដោយការទទួលខុសត្រូវ និងប្រសិទ្ធភាពខ្ពស់ក្នុងការជំរុញ និងការកែទម្រង់អនុវត្តធនធានមនុស្សរបស់ក្រសួងមហាផ្ទៃ។
សូមបញ្ជាក់ផងដែរថា កិច្ចប្រជុំនេះមានគោលបំណងបន្តតាមដានត្រួតពិនិត្យ និងផ្ដល់យោបល់លើសេចក្ដីព្រាងអនុក្រឹត្យស្ដីពីឯកសណ្ឋាន សញ្ញាសម្គាល់ និងទង់នគរបាលជាតិកម្ពុជា និងជំរុញឱ្យមានការសម្រួលនូវចំណុចខ្លះៗ និងបំពេញបន្ថែមនូវចំណុចខ្វះខាត ធ្វើយ៉ាងណាឱ្យអនុក្រឹត្យនេះបានល្អប្រសើរបន្ថែមទៀត ៕ 
