កម្ពុជាមិនមានបញ្ហាក្នុងការផ្គត់ផ្គង់គ្រាប់ស្វាយចន្ទីនោះឡើយ!

ភ្នំពេញ៖ ឯកឧត្តម ឃឹម ហ្វីណង់ អនុរដ្ឋលេខាធិការ និងជាមន្រ្តីអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា កម្ពុជាមិនមានបញ្ហាក្នុងការផ្គត់ផ្គង់គ្រាប់ស្វាយចន្ទីកែច្នៃទំហំ ៣ ០០០តោន ក្នុងមួយឆ្នាំនោះទេ។

តាមរយៈបណ្ដាញសង្គមហ្វេសប៊ុកផ្លូវការអ្នកនាំពាក្យ ក្រសួងកសិកម្មបានឱ្យដឹងថា ក្នុងឆ្នាំ២០២៤ យើងផលិត បាន គ្រាប់ស្វាយចន្ទីស្រស់ជិត៩០ ម៉ឺនតោន និងបាននាំចេញ គ្រាប់ ស្វាយចន្ទី កែច្នៃ រួចជាង ៣ម៉ឺនតោន។ កម្ពុជានៅសល់សមត្ថភាពកែច្នៃគ្រាប់ស្វាយចន្ទី យ៉ាងហោច ណាស់ ៥ម៉ឺន តោន ទៀត ដែលនៅមិនទាន់ប្រើប្រាស់ឱ្យអស់លទ្ធភាពនៅឡើយ ។ឯកឧត្តមសង្កត់ធ្ងន់ថា ” គ្មានហេតុផលអ្វីដែលត្រូវព្រួយបារម្ភពី ការ មិនអាច ផ្គត់ផ្គង់ បរិមាណត្រឹមតែ ៣០០០តោនក្នុង មួយឆ្នាំ”។

ការលើកឡើងរបស់អ្នកនាំពាក្យក្រសួងកសិកម្មជាការបំភ្លឺនិងកែតម្រូវឡើងវិញចំពោះព័ត៌មានចេញផ្សាយដោយវិទ្យុបារាំងអន្ដរជាតិ(RFI) ដែលបានដក ស្រង់ពាក្យ សម្ដីរបស់លោក អួន ស៊ីឡុត ប្រធានសមាគមស្វាយចន្ទីកម្ពុជានិយាយអំពី ការ ផ្គត់ផ្គង់គ្រាប់ស្វាយចន្ទី។
“សមត្ថភាពកែច្នៃគ្រាប់ស្វាយចន្ទីអាចនឹងត្រូវបានពង្រីកបានគ្រប់ពេល ប្រសិនបើ មាន ប្រសិន បើមានកិច្ចសន្យាធានា ទិញ ច្បាស់លាស់ក្នុងតម្លៃខ្ពស់ពីទីផ្សារ និងមាន ផ្តល់ប្រាក់កក់មុន៥០ភាគរយ ដូចដែលបានអះអាងពិតមែន(លោក អួន ស៊ីឡូត )”។

ឯកឧត្តមអ្នកនាំពាក្យបន្តថា ព័ត៌មានបែបនេះគួរតែត្រូវបានចែករំលែកដល់ អ្នកកែច្នៃទូទៅឱ្យបានទូលំទូលាយ មិនមែនលាក់បាំងមិនផ្សព្វផ្សាយ ហើយបែរជាលើកឡើងពីការខ្វះខាតការផ្គត់ផ្គង់ទៅវិញ។

អ្នកនាំពាក្យដដែលបន្ថែមថា មិនមានទិន្នន័យផ្លូវការណាមួយបង្ហាញថា ទិន្នផល គ្រាប់ស្វាយចន្ទីក្នុងឆ្នាំនេះមានការថយចុះ ដោយសារកត្តាអាកាសធាតុឡើយ។ ផ្ទុយទៅវិញការវាយតម្លៃបឋមបង្ហាញថា បរិមាណផលសរុបក្នុងឆ្នាំ២០២៥ អាចនឹង ស្ថិតនៅកម្រិតដដែល ឬមានការកើនឡើងបើធៀបនឹងឆ្នាំ២០២៤។ចំណែកការប្រជែងគ្នាទិញគ្រាប់ស្វាយចន្ទីកម្ពុជាពីឈ្មួញអន្តរជាតិមិនបណ្តាលឱ្យទិន្នផលនៃគ្រាប់ស្វាយចន្ទីធ្លាក់ចុះឡើយ៕