សត្វខ្លាឃ្មុំ ទះកំភ្លៀងនិងចាប់ហែក បុរស២នាក់រងរបួសធ្ងន់
ភ្នំពេញ៖ សត្វខ្លាឃ្មុំមួយក្បាល ដេញទះកំភ្លៀង និងចាប់ហែកអោយរងរបួសបុរស២ នាក់ យ៉ាងទម្ងន់ ខណៈបុរសទាំងពីរនាក់នោះ បាននាំគ្នាដើរទៅដួសត្រី នៅក្នុងស្ទឹង ក៍បានពើបប្រទះនិងសត្វខ្លាឃ្មុំមួយក្បាល ដេញទះកម្លៀង និង ចាប់ហែកអោយរងរបួសជាទម្ងន់ ហើយត្រូវបានក្រុមគ្រួសារ ដឹកយកទៅសង្រ្គោះ នៅមន្ទីរពេទ្យភ្លាមៗ។
បុរស ២ នាក់ខាងលើ បាននាំគ្នាដើរទៅរកដួសត្រីនៅចំនុចស្ទឹងតាចាន់ ក្នុងភូមិឆាយលូក ឃុំអូរសោម ស្រុកវាលវែង ខេត្តពោធិសាត់ កាលពីវេលាម៉ោង ១២និង៤០នាទី ថ្ងៃទី ៤ ខែ កក្កដា ឆ្នាំ ២០២២។
បើតាមរបាយការណ៍របស់អធិការដ្ឋាននគរបាលស្រុកវាលវែងបានអោយដឹងថា ជនរងគ្រោះទាំង ២ នាក់ដែលត្រូវបានសត្វខ្លាឃ្មុំទះកម្លៀង និង ចាប់ហែកអោយរងរបួសធ្ងន់នោះមានឈ្មោះង៉ុយ ងឿន ភេទប្រុសអាយុ ៣៣ ឆ្នាំ និង ឈ្មោះភី ភក្តី ភេទប្រុសអាយុ ២៩ ឆ្នាំ (ជនរងគ្រោះទាំង ២ នាក់រស់នៅក្នុងភូមិឆាយលូក ឃុំអូរសោម ស្រុកវាលវែង ខេត្តពោធិសាត់)។
ប្រភពដដែល ក៍បានអោយដឹងទៀតថា រហូតមកទល់ពេលនេះជនរងគ្រោះទាំងពីរនាក់ គឺមានសុខភាព ជាធម្មតាឡើងវិញហើយ៕
