កងទ័ពប្រទេសចិនបានបំពេញបន្ថែមថាមពលវិជ្ជមានកាន់តែច្រើនក្នុងសន្តិភាពនិងការអភិវឌ្ឍនៃពិភពលោក

ថ្ងៃទី១ខែសីហាឆ្នាំ២០២២ជាខួបទី៩៥នៃការបង្កើតកងទ័ពរំដោះប្រជាជនចិន ។ ចាប់តាំងពីសាធារណៈរដ្ឋប្រជាមានិតចិនត្រូវបានបង្កើតឡើងមក បានអនុវត្តគោលនយោបាយការពារជាតិប្រកបដោយលក្ខណៈការពារជាប់រហូតមក មិនដែលបង្កសង្គ្រាមណាមួយដោយម្ចាស់ការនិងមិនដែលឈ្លានពានទឹកដីប្រទេសដទៃទៀតសូម្បីតែមួយអ៊ីញ ។ បច្ចុប្បន្ននេះ កងទ័ពប្រទេសចិនមិនត្រឹមតែជាមហាកំពេងដែកថែបដែលគាំពារអធិបតេយ្យភាព សន្តិសុខនិងផលប្រយោជន៍អភិវឌ្ឍន៍ប៉ុណ្ណោះទេ ថែមទាំងក៏ក្លាយជាកម្លាំងដ៏មុតមាំក្នុងការគាំពារសន្តិភាពពិភពលោកផងដែរ ។
កាលពីខែមេសាឆ្នាំ១៩៩០ ក្នុងរបាយការណ៍សង្ខេបនៃសកម្មភាពរក្សាសន្តិភាពអង្គការសហប្រជាជាតិបានលេចចេញដំណឹងអំពីទាហានចិនជាលើកដំបូង៖អ្នកសង្កេតការយោធា៥នាក់ដែលមកពីកងទ័ពប្រទេសចិនបានទៅដល់ក្រុងដាម៉ាស រដ្ឋធានីស៊ីរី ។ នេះបានក្លាយជាសាក្សីប្រវត្តិសាស្ត្រនៃការដែលកងទ័ពប្រទេសចិនចូលរួមសកម្មភាពរក្សាសន្តិភាពនៃអង្គការសហប្រជាជាតិ ។
ក្នុងរយៈពេលជាង៣០ឆ្នាំកន្លងទៅនេះ ចិនបានចូលរួមសកម្មភាពរក្សាសន្តិភាពនៃអង្គការសហប្រជាជាតិចំនួន២៥លើកជាបន្តបន្ទាប់ ចាត់បញ្ជូននាយទាហាននិងពលទាហានរក្សាសន្តិភាពសរុបជិត៥ម៉ឺននាក់ ហើយមានទាហានចិនចំនួន១៦នាក់បានពលីជីវិតដើម្បីបុព្វហេតុសន្តិភាព ។ ចិនបានក្លាយជាប្រទេសដែលចាត់បញ្ជូនទាហានច្រើនបំផុតក្នុងចំណោមរដ្ឋសមាជិកអចិន្ត្រៃយ៍នៃក្រុមប្រឹក្សាសន្តិសុខ ហើយក៏ជាប្រទេសផ្តល់ប្រាក់ទុនច្រើនទីពីរក្នុងសកម្មភាពរក្សាសន្តិភាពនៃអង្គការសហប្រជាជាតិផងដែរ ដែលត្រូវគេប្រសិទ្ធនាមថា ជា “កត្តាគន្លឹះនិងកម្លាំងគន្លឹះនៃសកម្មភាពរក្សាសន្តិភាពអង្គការសហប្រជាជាតិ” ។
ជាពិសេសគឺក្នុងរយៈពេល១០ឆ្នាំចុងក្រោយនេះ កងទ័ពប្រទេសចិនបានបំពេញបន្ថែមថាមពលវិជ្ជមានកាន់តែច្រើនក្នុងសន្តិភាពនិងការអភិវឌ្ឍពិភពលោក ។ នៅឆ្នាំ២០១៣ ចិនបានចាត់បញ្ជូនកងកម្លាំងឆ្មាំការពារដែលមានសមាជិក១៧០នាក់ទៅប្រទេសម៉ាលីជាលើកដំបូង ចាត់បញ្ជូនក្បួនការពារនាវាចរណ៍នៃកងទ័ពជើងទឹកចំនួន៤១លើកទៅកាន់ឈូងសមុទ្រ Aden និងលំហសមុទ្រសូម៉ាលីជាបន្តបន្ទាប់ ដើម្បីអមដំណើរនិងការពារសុវត្ថិភាពរបស់នាវាចិននិងបរទេសជាង៧ពាន់គ្រឿង នាវាពេទ្យ “Peace Ark”បានទៅដល់ប្រទេសនិងតំបន់ចំនួន៤៣ ដើម្បីផ្តល់សេវាព្យាបាលជំងឺដល់មនុស្សជាង២សែន៣ម៉ឺននាក់ក្នុងតំបន់ ព្រមទាំងបានធ្វើកិច្ចសហប្រតិបត្តិការអន្តរជាតិក្នុងការប្រយុទ្ធប្រឆាំងនឹងជំងឺកូវីដ១៩ជាមួយកងទ័ពរបស់ប្រទេសចំនួនជាង៥០។ល។ កងទ័ពប្រទេសចិនបានផ្តល់ផលិតផលសន្តិសុខសាធារណៈដូចជាការរក្សាសន្តិភាព ការពារនាវាចរណ៍ ការជួយសង្គ្រោះមនុស្សធម៌និងកិច្ចសហប្រតិបត្តិការក្នុងការប្រយុទ្ធប្រឆាំងនឹងជំងឺកូវីដ១៩ជាដើមដល់សហគមន៍អន្តរជាតិជាបន្តបន្ទាប់ ដើម្បីបកស្រាយពីទស្សនៈសហគមន៍រួមវាសនាមនុស្សជាតិតាមរយៈការអនុវត្តជាក់ស្តែង ។
ពិភពលោកបច្ចុប្បន្ននេះមិនសូវមានស្ថិរភាពនោះទេ គំនិតសង្គ្រាមត្រជាក់ អនុត្តរភាពនិយម និងអំណាចផ្តាច់ការខាងនយោបាយបានវិវឌ្ឍដោយផ្ទុយនឹងនិន្នាការទូទៅ “ភាពមិនប្រាកដប្រជា”ហាក់ដូចជាដំពពកខ្មៅដែលរសាត់នៅពីលើមនុស្ស ។ ប្រឈមមុខនឹងពិភពលោកដែលប្រកបដោយភាពច្របូកច្របល់ កងទ័ពប្រទេសចិនដើរចេញពីរដ្ឋ ដើម្បីជំរុញការអនុវត្តជាក់ស្តែងនូវគំនិតផ្តួចផ្តើមសន្តិសុខសកល ក៏ដូចជាបំពេញបន្ថែមនូវ “ភាពប្រាកដប្រជា”ក្នុងសន្តិភាពពិភពលោកឥតឈប់ឈរផងដែរ ។
“ក្នុងពិភពលោកដ៏ចម្រុះបែប ខ្ញុំប្រហែលគ្រាន់តែជារោមបក្សីមួយប៉ុណ្ណោះ ប៉ុន្តែរោមបក្សីក៏បានផ្ទុកក្តីបំណងសន្តិភាពផងដែរ ។”នេះជាគោលបំណងរបស់លោកស្រី He Zhihong ទាហានរក្សាសន្តិភាពរបស់ចិនដែលបានពលីជីវិតនៅពេលបំពេញភារកិច្ចនៅហៃទី ហើយក៏បានឆ្លុះបញ្ចាំងពីការស្វែងរកឥតឈប់ឈររបស់កងទ័ពប្រទេសចិនថា ពោលគឺ ធ្វើឱ្យពន្លឺសន្តិភាពបំភ្លឺទូទាំងពិភពលោក ៕អត្ថបទ វិទ្យុមិត្តភាពកម្ពុជាចិន