អង់គ្លេសនិង ប្រទេសសមាជិកអាស៊ាន សម្តែងការប្ដេជ្ញាចិត្តខ្ពស់ ក្នុងការបង្កើនពាណិជ្ជកម្មនិងវិនិយោគរវាងគ្នាទៅវិញទៅមក ដើម្បីជំរុញកំណើនសេដ្ឋកិច្ច

ភ្នំពេញ៖ ឯកឧត្តមបណ្ឌិត គង់ ភោគ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា និងជាអ្នកនាំពាក្យកិច្ចប្រជុំរដ្ឋមន្រ្តីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធ បានឱ្យដឹងថា ចក្រភពអង់គ្លេសនិង ប្រទេសសមាជិកអាស៊ាន បានសម្តែងការប្ដេជ្ញាចិត្តខ្ពស់ ក្នុងការបង្កើនពាណិជ្ជកម្មនិងវិនិយោគរវាងគ្នាទៅវិញទៅមក ដើម្បី ជំរុញកំណើនសេដ្ឋកិច្ចរវាងប្រទេសក្នុងតំបន់អាស៊ាននិងចក្រអង់គ្លេសឱ្យកាន់តែល្អប្រសើរ។

ឯកឧត្តមបណ្ឌិត គង់ ភោគ បន្តថា ក្នុងកិច្ចប្រជុំរដ្ឋមន្ត្រីការបរទេសអាស៊ានចក្រភពអង់គ្លេស បានអនុម័តផែនការសកម្មភាព ដើម្បីអនុវត្តភាពជាដៃគូសន្ទនាអាស៊ានចក្រភពអង់គ្លេស។

ឯកឧត្តម បានបញ្ជាក់ថា អង់គ្លេសគឺទើបតែក្លាយជាដៃគូសន្ទនាអាស៊ីអាគ្នេយ៍ ដូច្នេះរាល់ដៃគូសន្ទនាអាស៊ានទាំងអស់ គឺតែងតែមានផែនការសកម្មភាព ដើម្បីធ្វើការជាមួយគ្នា សហការគ្នា ឱ្យចេញជាលទ្ធផលអ្វីមួយ និងឱ្យឃើញជាផ្លែផ្កាអ្វីមួយក្នុងការសហការគ្នានេះ ។

ឯកឧត្តម បានបញ្ជាក់បន្ថែមថា កិច្ចប្រជុំអាស៊ាននឹងចក្រភពអង់គ្លេសលើកដំបូង ចាប់តាំងពីអង់គ្លេស ក្លាយទៅជាដៃគូសន្ទនារបស់អាស៊ានជាផ្លូវការ។ ឆ្នាំនេះអង់គ្លេសនឹងផ្ដល់អាហារូបករណ៍ បន្ថែម ជាផ្នែកមួយនៃការពង្រឹងទំនាក់ទំនងផ្នែកអប់រំ ហើយចក្រភពអង់គ្លេសនិងប្រទេសសមាជិកអាស៊ាន ក៏សម្ដែងពីការប្ដេជ្ញាចិត្តក៏ដូចជាចាប់អារម្មណ៍ខ្ពស់ ក្នុងការបង្កើនពាណិជ្ជកម្មនិងវិនិយោគរវាងគ្នាទៅវិញទៅមក ជំរុញកំណើនសេដ្ឋកិច្ចអាស៊ាន ជាពិសេសពាក់ព័ន្ធជាមួយនឹងសហគ្រាសមីក្រូធុនតូចនិងមធ្យម បញ្ហាថាមពល និងការពង្រឹងសេដ្ឋកិច្ចឌីជីថល និងកិច្ចសហប្រតិបត្តិការទៅលើវិស័យសុខភាពសាធារណៈ ជាពិសេសពាក់ព័ន្ធជាមួយនឹងការសហការគ្នា ដើម្បីគ្រប់គ្រងការរីករាលដាលនៃជំងឺកូវីដ១៩ ក៏ដូចជាការត្រៀមខ្លួនសម្រាប់ទប់ស្កាត់ការរីករាលដាលជំងឺឆ្លងផ្សេងទៀត ដែលនឹងអាចកើតមានទៅថ្ងៃអនាគត ហើយក៏មានការពិភាក្សាគ្នាទៅលើបញ្ហាការគ្រប់គ្រងគ្រោះមហន្តរាយ ក៏ដូចជាបញ្ហាបម្រែបម្រួលអាកាសធាតុផងដែរ។

គួរជម្រាបថា កាលពីកិច្ចប្រជុំរដ្ឋមន្រ្តីការបរទេសអាស៊ានលើកទី៥៤ ដែលបានធ្វើឡើងតាមប្រព័ន្ធវីដេអូ នៅប្រទេសប្រ៊ុណេដារូសាឡឹម រដ្ឋមន្រ្ដីការបរទេសអាស៊ានទាំងអស់ បានឯកភាពផ្តល់ឱ្យចក្រភពអង់គ្លេស នូវឋានៈជាដៃគូសន្ទនាទី១១ របស់អាស៊ាន។ ការចូលជាសមាជិករបស់ចក្រភពអង់គ្លេសនៅក្នុងតំបន់អាស៊ាននេះ គឺជាសញ្ញាវិជ្ជមានមួយដែលអាស៊ានអាចនឹងទទួលបានផលប្រយោជន៍ជាច្រើនលើគ្រប់វិស័យពីដៃគូសន្ទនាមួយនេះ ជាពិសេសវិស័យសេដ្ឋកិច្ច វប្បធម៌ ក៏ដូចជានយោបាយក្នុងតំបន់ផងដែរ៕