វរសេនីយ៍ត្រី ហ៊ឹម រ៉ែន ផ្សព្វផ្សាយផែនការអប់រំចិត្តសាស្ត្រឆ្នាំ២០២២ ជូនដល់នាយ-ពលទាហាន នៃកងកាពាព្រំដែនគោកលេខ៤០៣
ភ្នំពេញ៖ លោកវរសេនីយ៍ត្រី ហ៊ឹម រ៉ែន មេបញ្ជាការរង កងការពារព្រំដែនគោកលេខ៤០៣ នៅថ្ងៃទី១០ ខែសីហា ឆ្នាំ២០២២ បានអញ្ជើញផ្សព្វផ្សាយផែនការ និងអប់រំរៀនសូត្រការងារអប់រំចិត្តសាស្ត្រឆ្នាំ២០២២ ជូនដល់នាយទាហាន នាយទាហារង និងពលទាហាន នៅទីបញ្ជាការកងការពារព្រំដែនគោកលេខ៤០៣។
លោកវរសេនីយ៍ត្រី ហ៊ឹម រ៉ែន បានមានប្រសាសន៍ថា ការផ្សព្វផ្សាយនេះសំដៅឲ្យយោធិនកាន់តែយល់ច្បាស់ពីតួនាទី ភារកិច្ចរបស់កងយោធពលខេមរភូមិន្ទក្នុងដំណាក់កាលថ្មី និងដើម្បីពង្រឹងឆន្ទៈ មនសិការ ឧត្តមគតិស្នេហាជាតិ ក្នុងកិច្ចការពារជាតិ ការពារសន្តិភាពស្ថិរភាពនយោបាយនៅកម្ពុជា។ ផ្អែកតាមសភាពការណ៍បច្ចុប្បន្ននេះ ការងារពង្រឹងប្រៀបការពារជាតិ ការងារហ្វឹកហ្វឺនរៀនសូត្រ ការងារអប់រំចិត្តសាស្រ្ត ការងារបង្កបង្កើនផលត្រូវអនុវត្តជាប់ជាប្រចាំ ក្នុងនោះដែរត្រូវគោរព និងអនុវត្តនូវបទបញ្ជា សេចក្តីណែនាំ សារាចរ របស់អគ្គបញ្ជាការ មេបញ្ជាការ កងទ័ពជើងគោក មេបញ្ជាការយោធភូមិភាគទី៤ ហើយត្រូវហ៊ានពលិកម្មចំពោះជាតិ មាតុភូមិ និងប្រជាជន។
លោកវរសេនីយ៍ត្រី ហ៊ឹម រ៉ែន បានផ្តាំផ្ញើ និងក្រើនរំលឹកដល់នាយទាហាន នាយទាហានរង និងពលហានទាំងអស់ត្រូវគោរព និងអនុវត្តឲ្យបាននូវបទវិន័យ បទបញ្ជា និងលក្ខន្តិកៈទូទៅរបស់កងយោធពលខេមរភូមិន្ទ ពិសេសត្រូវបន្តអនុវត្តវិធានការនានារបស់ក្រសួងសុខាភិបាលស្តីពីការទប់ស្កាត់ការរីករាលដាលនៃជំងឺកូវីដ-១៩ ជំងឺអុតស្វា និងអនុសាសន៍ដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី ៣កុំ ៣ការពារ ជាប់ជាប្រចាំផងដែរ ៕
