សំណង់អគារ ចាប់ពី៥ជាន់ឡើងទៅ នៅទូទាំងប្រទេសកម្ពុជា មានចំនួន ២៤៧២អគារ
ភ្នំពេញ៖ មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា សំណង់អគារចាប់ពី៥ជាន់ឡើងទៅ នៅទូទាំងប្រទេស មានចំនួន ២ ៤៧២អគារ ខណៈចាប់ពីពាក់កណ្តាលឆ្នាំ២០២០ ដល់ពាក់កណ្តាលឆ្នាំ២០២២ ទទួលបានវិនិយោគទុន មានទឹកប្រាក់ជាង ៦៦ពាន់លានដុល្លារអាម៉េរិក។
ឯកឧត្តម ថេង ច័ន្ទសង្វារ រដ្ឋលេខាធិការ និងអគ្គនាយកខុទ្ទកាល័យ ក្រសួងរៀបចំដែនដី នគរូបនីយកម្ម និងសំណង់ បានលើកឡើងនៅក្នុងសន្និសីទសារព័ត៌មាននាព្រឹកថ្ងៃទី២៤ ខែសីហា នៅទីស្តីការគណៈរដ្ឋមន្ត្រីថា រយៈពេល៥ឆ្នាំ ចុងក្រោយ នេះការវិនិយោគក្នុងវិស័យសំណង់មាន ១៩ ៣២២គម្រោង មានក្រឡាផ្ទៃសរុប៧១ ៤៥៩ ២៣៣ម៉ែត្រការ៉េ ទុនវិនិយោគចំនួន ៣១៤ ៦០៤លានដុល្លារអាម៉េរិក។
ឯកឧត្តមថា គិតចាប់ផ្តើមពីឆ្នាំ២០២០ ដល់ពាក់កណ្តាលឆ្នាំ២០២២នេះ ក្រសួងរៀបចំ ដែនដីនគរូបនីយកម្ម និងសំណង់ បានចេញលិខិតអនុញ្ញាតឱ្យសាងសង់សំណង់នៅទូទាំងប្រទេស មានចំនួន៥៧ ៥៩០គម្រោង មានផ្ទៃក្រឡាសំណង់ សរុប១ ៦៥៦ ៦២៣ ៨៩០ម៉ែត្រការ៉េ និងទុនវិនិយោគសរុប ៦៦ ២០៥លានដុល្លារ។
ពាក់ព័ន្ធនឹងការសាងសង់អគារវិញ ឯកឧត្តមរដ្ឋលេខាធិការបានគូសបញ្ជាក់ថា «គម្រោងអគារខ្ពស់ចាប់ពី៥ជាន់ឡើងទៅ នៅទូទាំងប្រទេសមានចំនួន ២ ៤៧២អគារ គម្រោង បុរីលំនៅឋាន និងលំនៅឋានមានលក្ខខណៈជាបុរីមាន ៤៨២គម្រោង ផ្តល់វិញ្ញាប័ណ្ណបត្រដល់ក្រុមហ៊ុនប្រកបអាជីវកម្មក្នុងវិស័យសំណង់មានចំនួន ៣ ២៤៤ក្រុមហ៊ុន ផ្តល់វិញ្ញាបនបត្រ ប្រកបវិជ្ជាជីវៈ សិក្សាគម្រោងប្លង់ ដល់អ្នកមានវិជ្ជាជីវៈចំនួន ៥៤២រូប ក្នុងនោះស្ថាបត្យករ ២៧០រូប បរទេស៥រូប វិស្វករ២៧២រូប បរទេស៦រូប និងផ្តល់អាជ្ញាប័ណ្ណត្រួតពិនិត្យ និងបញ្ជាក់សំណង់ចំនួន៣ក្រុមហ៊ុន»។
ឯកឧត្តមក៏បានឱ្យដឹងថា ស្ថាបត្យករដែលបានចុះបញ្ជីនៅគណៈស្ថាបត្យករកម្ពុជាមាន ចំនួន ១ ៤៥១រូប ក្រៅពីនេះក៏បានពង្រឹងសំណង់តាមប្រព័ន្ធអេឡិចត្រូនិក និងបណ្តុះបណ្តាលជំនាញដល់មន្ត្រីរាជធានី-ខេត្តផងដែរ៕ ប្រភពៈក្រសួងព័ត៌មាន
