មេបញ្ជាការ កងពលតូចថ្មើរជើងលេខ៥២ អញ្ជើញបិទវគ្គហ្វឹកហ្វឺនបំប៉នជំនាញ ក្បាច់គុនកងយោធពលខេមរភូមិន្ទ
ភ្នំពេញ៖ នៅទីបញ្ជាការកងពលតូចថ្មើរជើងលេខ៥២ នាព្រឹកថ្ងៃទី១៩ ខែកញ្ញា ឆ្នាំ២០២២នេះ បានរៀបចំពិធីបិទវគ្គហ្វឹកហ្វឺនបំប៉នជំនាញក្បាច់គុនកងយោធពលខេមរភូមិន្ទ ក្រោមអធិបតីភាព ឧត្តមសេនីយ៍ត្រី គុជ នាង មេបញ្ជាការ កងពលតូចថ្មើរជើងលេខ៥២ ។
ក្នុងរបាយការណ៍បិទវគ្គហ្វឹកហ្វឺនបានឱ្យដឹងថា៖ វគ្គហ្វឹកហ្វឺនបំប៉នជំនាញក្បាច់គុន កងយោធពលខេមរភូមិន្ទ របស់សិក្ខាកាមកងពលតូចថ្មើរជើងលេខ៥២នេះ មានចំនួនចូលរួមសរុប ៦២នាក់ ក្នុងនោះគ្រូយោធាចារ្យ ចំនួន ៨នាក់ បម្រើការ ចំនួន ៤នាក់ និងសិក្ខាកាម ចំនួន ៥០នាក់ ហ្វឹកហ្វឺនរយៈពេល ៤៥ថ្ងៃ ចាប់ពីថ្ងៃទី៣ ខែសីហា ឆ្នាំ២០២២ ដល់ថ្ងៃទី១៩ ខែកញ្ញា ឆ្នាំ២០២២ ជាលទ្ធផលក្នុងពេលបញ្ចប់វគ្គនេះ សិក្ខាកាមទទួលបាននិទ្ទេសល្អ ចំនួន ១៥នាក់ ល្អបង្គួរ ចំនួន ៣០នាក់ និងមធ្យម ចំនួន ៥នាក់។
ឧត្តមសេនីយ៍ត្រី គុជ នាង មេបញ្ជាការកងពលតូចថ្មើរជើងលេខ៥២ បានមានប្រសាសន៍ថា ការហ្វឹកហ្វឺនរៀនសូត្រជាអាទិភាពខ្ពស់ ដែលថ្នាក់លើបានយកចិត្តទុកដាក់ ក្នុងការបណ្ដុះបណ្ដាលនូវធនធានមនុស្ស ដើម្បីបង្កើនចំណេះដឹង សមត្ថភាពវិជ្ជាជីវៈ ដល់កងទ័ព ក្នុងជួរកងយោធពលខេមរភូមិន្ទ ដើម្បីអនុវត្តនូវតួនាទីភារកិច្ច ប្រកបដោយប្រសិទ្ធិភាពខ្ពស់ ក្នុងកិច្ចកាពារបូរណភាពទឹកដី។ មិនតែប៉ុណ្ណោះការប្រមូលផ្តុំហ្វឹកហ្វឺនរៀនសូត្រនៅនឹងកន្លែងនេះ ក៏ដូចជាការត្រៀមកម្លាំងសម្រាប់អន្តរាគមន៍ជួយសង្គ្រោះ ដល់ប្រជាពលរដ្ឋ ដែលរងគ្រោះមហន្តរាយផ្សេងៗ តាមបទបញ្ជារបស់ថ្នាក់លើ បានទាន់ពេលវេលាផងដែរ ។
លោកឧត្តមសេនីយ៍ត្រី គុជ នាង បានធ្វើការកោតសរសើរ ដល់បណ្ដាអង្គភាពចំណុះ ដែលបានខិតខំប្រឹងប្រែងអនុវត្តសម្រេចតាមបទបញ្ជា និងផែនការរបស់ថ្នាក់លើទទួលបានជោគជ័យ ហើយក៏សូមកោតសរសើរចំពោះសិក្ខាកាមក្នុងវគ្គហ្វឹកហ្វឺនទាំងអស់ ដែលបានខិតខំហ្វឹកហាត់ រៀនសូត្រជំនាញក្បាច់គុនកងយោធពលខេមរភូមិន្ទនេះ រហូតដល់បញ្ចប់វគ្គ ទទួលបានលទ្ធផលល្អប្រសើរគួរជាទីមោទន:។
លោកក៏បានផ្ដាំផ្ញើដល់សិក្ខាកាម ក្រោយបញ្ចប់វគ្គហ្វឹកហ្វឺននេះពេលត្រឡប់ចូលអង្គភាពខ្លួនវិញ ត្រូវយកចិត្តទុកដាក់ក្រើនរំលឹកអនុវត្តនូវចំណេះជំនាញដែលខ្លួនបានសិក្សារៀនសូត្រទាំងអស់នោះបន្ថែមទៀត ឱ្យបានស្ទាត់ជំនាញ និងមានប្រសិទ្ធភាពខ្ពស់ ក៏ដូចជាជួយបង្ហាត់បង្ហាញ ដល់អ្នកមិនចេះបន្ត និងសូមចៀសឱ្យផុតពីគ្រឿងញៀន ចូលរួមគោរពច្បាប់ចរាចរ លុបបំបាត់ល្បែងស៊ីសង និងចូលរួមអនុវត្តនូវវិធានការ ៣កុំ ៣ការពារ របស់ក្រសួងសុខាភិបាល ដើម្បីចៀសផុតពីជំងឺឆ្លងកូវីដ-១៩ ទាំងអស់គ្នា។
នាឱកាសនោះដែរ លោកមេបញ្ជាការ បានជូនកាដូជាថវិកា ដល់គ្រូក្បាច់គុនក្នុងឱកាសបុណ្យភ្ជំបិណ្ឌប្រពៃណីជាតិខ្មែរ ចំនួន ២នាក់ ថវិកា ចំនួន ៦០០.០០០រៀល ជាចុងក្រោយ លោកមេបញ្ជាការ ជូនពរដល់នាយទាហាន នាយទាហានរង ពលទាហាន ក្នុងកងពលតូចថ្មើរជើងលេខ៥២
សូមអនុវត្តសម្រេចបានគ្រប់ភារកិច្ច ដែលថ្នាក់លើប្រគល់ជូន និងសូមទទួលបាននូវពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕