ចិន នឹង កាត់ តម្លៃ ប្រេងសាំង និង ម៉ាស៊ូត
ប៉េកាំង៖ទីភ្នាក់ងារចិនស៊ិនហួ ចេញផ្សាយនៅថ្ងៃពុធ ទី២១ ខែកញ្ញានេះ បានឲ្យដឹងថា ប្រទេសចិននឹងកាត់បន្ថយតម្លៃលក់រាយប្រេងសាំង និងប្រេងម៉ាស៊ូត ចាប់ពីថ្ងៃព្រហស្បតិ៍តទៅ នេះបើតាមអ្នករៀបចំផែនការសេដ្ឋកិច្ចកំពូលរបស់ប្រទេសបាននិយាយកាលពីថ្ងៃពុធ។
តម្លៃប្រេងសាំង និងប្រេងម៉ាស៊ូត នឹងត្រូវកាត់បន្ថយចំនួន ២៩០ យន់ (ប្រហែល ៤១,៧១ ដុល្លារអាមេរិក) ក្នុងមួយតោន និង ២៨០ យន់ក្នុងមួយតោន រៀងៗខ្លួន នេះបើយោងតាមគណៈកម្មការអភិវឌ្ឍន៍ និងកំណែទម្រង់ជាតិ។
នៅក្រោមយន្តការកំណត់តម្លៃបច្ចុប្បន្នរបស់ប្រទេសចិន ប្រសិនបើតម្លៃប្រេងឆៅអន្តរជាតិប្រែប្រួលលើសពី ៥០ យន់ក្នុងមួយតោន ហើយនៅតែស្ថិតក្នុងកម្រិតនោះសម្រាប់រយៈពេល ១០ ថ្ងៃធ្វើការ តម្លៃនៃផលិតផលប្រេងចម្រាញ់ដូចជាប្រេងសាំង និងប្រេងម៉ាស៊ូតក្នុងប្រទេសនឹងត្រូវកែតម្រូវទៅតាមនោះ។
ក្រុមហ៊ុនប្រេងធំជាងគេចំនួនបីរបស់ប្រទេសចិនគឺសាជីវកម្មប្រេងជាតិចិន សាជីវកម្មគីមីឥន្ធនៈចិន និងសាជីវកម្មប្រេងឈូងសមុទ្រជាតិចិនត្រូវបានដឹកនាំឱ្យរក្សាផលិតកម្មប្រេង និងសម្រួលការដឹកជញ្ជូនដើម្បីធានាការផ្គត់ផ្គង់ប្រកបដោយស្ថិរភាព។
