លោកជំទាវ ឡោក ខេង នាំយកទេយ្យទាន និងបច្ច័យប្រគេនព្រះសង្ឃគង់នៅវត្តទឹកជុំ ខេត្តកំពង់ឆ្នាំង
ភ្នំពេញ៖ នៅក្នុងឱកាសដែលបងប្អូនប្រជាពលរដ្ឋខ្មែរជាពុទ្ធបរិស័ទនៅទូទាំងប្រទេសដែលគោរពប្រតិបត្តិទំនៀមទម្លាប់ប្រកាន់ខ្ជាប់ប្រពៃណីព្រះពុទ្ធសាសនាហើយតែងតែធ្វើបុណ្យធ្វើទាននៅគ្រប់រដូវកាលនៃពិធីបុណ្យនីមួយៗនោះ សម្រាប់ឱកាសនៃពិធីបុណ្យកាន់បិណ្ឌបុណ្យភ្ជុំបិណ្ឌឆ្នាំ២០២២នេះ ដោយឡែក លោកជំទាវ ឡោក ខេង តំណាងរាស្ត្រមណ្ឌលរាជធានីភ្នំពេញ និងជាប្រធានគណៈកម្មការទី៨ នៃរដ្ឋសភា និងក្រុមគ្រួសារ បានអញ្ជើញចូលរួមក្នុងពិធីកាន់បិណ្ឌវេនទី១១ នៃពិធីបុណ្យភ្ជុំបិណ្ឌ នៅវត្តទឹកជុំ ខេត្តកំពង់ឆ្នាំង នាថ្ងៃ២១ ខែកញ្ញា ឆ្នាំ២០២២។
ក្នុងឱកាសនោះ លោកជំទាវ និងក្រុមគ្រួសារ បានបូជាទៀនធូប ផ្កាភ្ញី ចំពោះព្រះរតនត្រ័យ សមាទានសីល ធ្វើកិច្ចបទនមស្ការ ព្រមទាំងបាននាំយកនូវទេយ្យទាន បច្ច័យ គ្រឿងឧបភោគ បរិភោគ ភេសជ្ជៈវេរប្រគេនព្រះសង្ឃគង់នៅវត្តទឹកជុំ និងសូមជូនបុណ្យកុសលទាំងអស់ ដល់បងប្អូនប្រជាជនកម្ពុជាទាំងក្នុងប្រទេស និងក្រៅប្រទេស បងប្អូនញាតិមិត្តជិតឆ្ងាយរបស់លោកជំទាវ ជាពិសេស សម្តេចថ្នាក់ដឹកនាំ មន្ត្រីរាជការគ្រប់ជាន់ថ្នាក់ រួមទាំងមន្ត្រីថ្នាក់ក្រោមជាតិទាំងអស់ ដោយអំណាចនៃកុសលផលបុណ្យទាំងអស់នេះ សូមទទួលបាន នូវសុខភាពល្អបរិបូរណ៌ កម្លាំងពលំមាំមួន អាយុយឺនយូរ សុភមង្គលគ្រប់ក្រុមគ្រួសារ ប្រកបដោយ សច្ច: ខន្តី កតញ្ញូ មេត្តា ករុណា ឧបេក្ខា ។
ជាមួយនេះ លោកជំទាវបានឧទ្ទិសជូនដល់វិញ្ញាណក្ខន្ធបុព្វការីជន អ្នកស្នេហាជាតិគ្រប់ជំនាន់ សូមបានទៅកាន់ទីបរមសុខ សុគតិភព កុំបីឃ្លៀងឃ្លាតឡើយ និងសូមអោយជាតិមាតុភូមិកម្ពុជាទទួលបាននូវសុខសន្តិភាព ជានិច្ចនិរន្តរ៍ ៕
