ប្រធានក្រុមប្រឹក្សាជាតិកម្ពុជាដើម្បីស្រ្តី ដឹកនាំគណៈប្រតិភូ ចុះពិនិត្យស្ថានភាពទណ្ឌិត និងពិរុទ្ធជនជាស្រ្តី កំពុងជួបឃុំក្នុងពន្ធនាគារ

ភ្នំពេញ៖​ លោកជំទាវកិត្តិបណ្ឌិត អ៉ឹង កន្ថាផាវី ប្រធានក្រុមប្រឹក្សាជាតិកម្ពុជាដើម្បីស្រ្តី និងជារដ្ឋមន្រ្តីក្រសួងកិច្ចការនារី នៅព្រឹកថ្ងៃទី០៣ ខែតុលា ឆ្នាំ២០២២ បានដឹកនាំគណៈប្រតិភូអន្តរក្រសួង អញ្ជើញចុះពិនិត្យស្ថានភាពទណ្ឌិត និងពិរុទ្ធជនជាស្រ្តី កំពុងជួបឃុំក្នុងពន្ធនាគារ និងពិភាក្សាអំពីលទ្ធភាពដែលអាចជាមូលដ្ឋានក្នុងការផ្តល់សេវាពាក់ព័ន្ធ ក្នុងពន្ធនាគារ។

ក្នុងការចុះពិនិត្យនេះមានការចូលរួមពីសំណាក់លោក ញ៉ន សិទ្ធ អភិបាលរងខេត្តមណ្ឌលគិរី លោក ប្រធានស្ដីទីពន្ធនាគារខេត្ត លោកស្រី ម៉ាលី សុខនី ប្រធានមន្ទីរកិច្ចការនារីខេត្ត រួមទាំងមេធាវី និងមន្រ្តីនៃពន្ធនាគារជាច្រើនរូប ដែលប្រព្រឹត្តទៅនៅពន្ធនាគារខេត្តមណ្ឌលគិរី។

គោលបំណង ដើម្បីប្រមូលព័ត៌មាន ទិន្នន័យ សមិទ្ធផលនានា ដែលអាជ្ញាធរសមត្ថកិច្ចនៅថ្នាក់ក្រោមជាតិ និងមន្ទីរអង្គភាពពាក់ព័ន្ធ សម្រេចបានក្នុងការលើកកម្ពស់ ស្ថានភាព ជីវភាព ឋានៈតួនាទី និងសុខមាលភាពស្រ្តី ក្នុងការអនុវត្តច្បាប់ គោលនយោបាយជាតិ វិធានការ អនុសាសន៍ដ៏ខ្ពង់ខ្ពស់របស់ សម្តេចតេជោ នាយករដ្ឋមន្រ្តី និងអនុសញ្ញាអន្តរជាតិ (CEDAW) ដើម្បីចងក្រងរបាយការណ៍របស់ក្រុមប្រឹក្សាជាតិ ដើម្បីស្រ្តី ស្វែងយល់ពីបញ្ហាប្រឈម និងវិធានការទាំងឡាយក្នុងការដោះស្រាយបញ្ហាស្រ្តី ជាពិសេស ក្នុងអំឡុងពេលជួបវិបត្តិនៃជំងឺកូវីដ-១៩៕