ឧបនាយករដ្ឋមន្ត្រី យឹម ឆៃលី អញ្ជើញជាអធិបតី ក្នុងពិធីប្រណាំងទូក “ង” ទូកខ្នាតអន្តរជាតិ នៅខេត្តកំពង់ចាម
ភ្នំពេញ៖ ឯកឧត្តម យឹម ឆៃលី ឧបនាយករដ្ឋមន្ត្រី ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ នៅថ្ងៃទី១០ ខែតុលា ឆ្នាំ២០២២ បាអញ្ជើញជាអធិបតីក្នុងពិធីប្រណាំងទូក “ង” ទូកខ្នាតអន្តរជាតិ បណ្ដែតប្រទីប អុជកាំជ្រួច និងតាំងពិព័រណ៍សមិទ្ធផល របស់រដ្ឋបាលក្រុង-ស្រុក មន្ទីរ-អង្គភាពជុំវិញខេត្ត និងពិព័រណ៍ភូមិមួយ ផលិតផលមួយ ខេត្តកំពង់ចាម។
ក្នុងពិធីដ៏សែនអធិកអធម សប្បាយរីករាយនេះ មានការអញ្ជើញចូលរួមជាភ្ញៀវកិត្តិយសពីសំណាក់ឯកឧត្តម លោកជំទាវ ជាថ្នាក់ដឹកនាំ មន្ត្រីរាជការ លោកឧកញា ភ្ញៀវជាតិ អន្តរជាតិ និងមានការចូលរួម របស់បង-ប្អូនប្រជាពលរដ្ឋយ៉ាងច្រើនកុះករផងដែរ ។
គណៈអធិបតីផ្តល់ពានរង្វាន់ ដល់ទូកដែលទទួលបានជ័យលាភី លេខ ១ ទូកវែង ឈ្មោះកៀនជ្រៃស្រីស្រស់ ទូកខ្លី ឈ្មោះ រំចេកសែនជ័យ ។
បន្ទាប់ពី ពិធីប្រណាំងទូក ង និងទូកខ្នាតអន្តរជាតិ បានបញ្ចប់នៅវេលាម៉ោង ១៧ :០០ ថ្ងៃទី ១០ ខែតុលា ឆ្នាំ ២០២២ គណៈអធិបតីបានរៀបចំពិធីប្រគល់ពានរង្វាន់ដល់ទូក ង និងទូកខ្នាតអន្តរជាតិ ដែលទទួលបានជ័យលាភីចាប់ចំណាត់ថ្នាក់លេខ១ ដល់ចំណាត់ថ្នាក់លេខ៣ ។
បើតាមគណៈកម្មការរៀបចំការប្រណាំងទូក ៖ ប្រភេទទូកខ្នាតអន្តរជាតិផែនលេខ ១ បានទៅលើទូកឈ្មោះ « រំចេកសែនជ័យ » និងទូកផែនលេខ ២ បានទៅលើទូកឈ្មោះ « រាជសីសែនជ័យ » និងទូកផែនលេខ ៣ បានទៅលើទូកឈ្មោះ « អាស្រមទួលចារ ខេមរាសែនជ័យបារមីកីឡាករ » ។
ចំណែកប្រភេទទូកវែង ផែនលេខ ១ បានទៅលើទូកឈ្មោះ « កៀនជ្រៃស្រីស្រស់ » និងទូកផែនលេខ ២ បានទៅលើទូកឈ្មោះ « ដីដុះសែនជ័យបារមីព្រះអង្គខ្មៅ » និងទូកផែនលេខ ៣ បានទៅលើទូកឈ្មោះ « រកាខ្នុរសែនជ័យសិរីឧត្តម » ។
ឯកឧត្តម អ៊ុន ចាន់ដា អភិបាលខេត្តកំពង់ចាម បានមានប្រសាសន៍ឲ្យដឹងថា លទ្ធផលរបស់ទូកដែលទទួលជ័យលាភី លេខ១ (ទូកខ្នាតអន្តរជាតិ) ទទួលបាននូវពានមួយ ថវិកា ២ លានរៀល , ជ័យលាភីលេខ ២ បានពានមួយ ថវិកា ១ លានប្រាំសែនរៀល , និងជ័យលាភីលេខ ៣ បានពានមួយថវិកា ១លានរៀល ចំពោះគ្រឿងឧបភោគបរិភោគ ក្នុង១ទូកៗ ទទួលបាន អង្ករ ៥០ គីឡូក្រាម មីចំនួន ៣ កេសតូច ទឹកក្រូចចំនួន ៣ កេស ទឹកសុទ្ធចំនួន ១០ យួរ ចេកអំបូងលឿង ១កេស និងស្រាបៀរចំនួន ៣ កេស ទឹកប្រទាលកន្ទុយក្រពើ ១ កេស ដូចៗគ្នា ។
ចំណែកឯ ទូកខ្នាតវែង ជ័យលាភីលេខ ១
ទទួលបាននូវពានមួយ ថវិកា ២ លានរៀល , ជ័យលាភីលេខ ២ បានពានមួយ ថវិកា ១ លានប្រាំសឺនរៀល , និងជ័យលាភីលេខ ៣ ទទួលបានពានមួយថវិកា ១ លានរៀល ចំពោះគ្រឿងឧបភោគបរិភោគ ក្នុង ១ទូកៗ ទទួលបាន អង្ករ ១០០ គីឡូក្រាម មីចំនួន ៥ កេសតូច ទឹកក្រូចចំនួន ៥ កេស ទឹកសុទ្ធចំនួន ២០ យួរ ចេកអំបូងលឿង ២កេស និងស្រាបៀរចំនួន ៥ កេស ទឹកប្រទាលកន្ទុយក្រពើ ២ កេស ដូចៗគ្នាផងដែរ ។ ដោយឡែកចំពោះទូក ដែលមិនទទួលបានជ័យលាភី ត្រូវបានទទួលប្រាក់ឧបត្ថម្ភលើកទឹកចិត្តក្នុង ១ទូក ថវិកា ៧០ ម៉ឺនរៀល បូករួមទាំងគ្រឿងឧបភោគបរិភោគ ដូចៗគ្នា ផងដែរ ។
សូមបញ្ជាក់ថា រដ្ឋបាលខេត្ត បានរៀបចំការតាំងពិព័រណ៍សមិទ្ធផល របស់រដ្ឋបាលក្រុង-ស្រុក មន្ទីរ-អង្គភាពជុំវិញខេត្ត និងពិព័រណ៍ភូមិមួយ ផលិតផលមួយ និងស្តង់ពិព័រណ៍ចំនួន ១០៥ ស្តង់ មានទាំងវិស័យរដ្ឋបាល និងវិស័យឯកជន ស្ថិតក្នុងសង្កាត់កំពង់ចាម ក្រុងកំពង់ចាម និងការប្រគុំតន្ត្រីមានរយៈពេល ៣ថ្ងៃ ចាប់ពីថ្ងៃទី០៩-១០-១១ ខែតុលា ឆ្នាំ២០២២។
ចំពោះពិធីប្រណាំងទូកទ្រង់ទ្រាយធំក្នុងខេត្តកំពង់ចាម ត្រូវបាន លោក អ៊ុន ចាន់ដា អភិបាលខេត្តកំពង់ចាម បានរៀបចំយ៉ាងហ្មត់ចត់ និអធិកអធមបំផុត ដែលមានប្រជាពលរដ្ឋភ្ញៀវជាតិ និងអន្តរជាតិយ៉ាងច្រើនកុះករ មកទស្សនាកំសាន្ត យ៉ាងសប្បាយរីករាយ។
ទន្ទឹមនិងនោះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត បានរៀបចំឲ្យអាជ្ញាធរ និងកងកម្លាំងសមត្ថកិច្ចគ្រប់លំដាប់ថ្នាក់ទាំងអស់បង្កើនការខិតខំយកចិត្តទុកដាក់ លើការរក្សាសន្តិសុខ សណ្តាប់ធ្នាប់ឲ្យបានល្អ និងចូលរួមសំអាតអនាម័យបរិស្ថាន ដោយតុបតែងលម្អ ឱ្យមានសោភ័ណភាពស្រស់បំព្រង នៅក្នុងក្រុងកំពង់ចាម ដើម្បីធ្វើយ៉ាងណា បង្កបរិយាកាសសប្បាយរីករាយ ជូនប្រជាពលរដ្ឋរបស់យើង ។ លុះដល់ពេលរាត្រី ក៏មានការរៀបចំបណ្ដែតប្រទីប និងអុចកាំជ្រួចយ៉ាងស្រស់បំព្រង ជូនទស្សនាផងដែរ ៕
