អង្គកឋិនទានសម្តេច ហេង សំរិន និងសម្តេចធម្មវិសុទ្ធវង្សា សៅ ទី ហេងសំរិន ដង្ហែទៅកាន់វត្តចំនួន៩ ក្នុងខេត្តត្បូងឃ្មុំ ព្រៃវែង និងខេត្តស្វាយរៀង

ភ្នំពេញ​៖ សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចធម្មវិសុទ្ធវង្សា សៅ ទី ហេង សំរិន ព្រមទាំងបុត្រា បុត្រី ចៅប្រុស ចៅស្រី មន្ត្រីអ្នកមុខ អ្នកការ បានមូលមតិគ្នាជាឯកច្ឆន្ទផ្តើមធ្វើអង្គ កឋិនទាន ដើម្បីដង្ហែទៅប្រគេនព្រះសង្ឃដែលគង់ចាំព្រះវស្សាអស់កាលត្រីមាសក្នុងព័ទ្ធសីមានៃវត្តចំនួន៩ ក្នុងខេត្តត្បូងឃ្មុំ ខេត្តព្រៃវែង និងខេត្តស្វាយរៀង នាព្រឹកថ្ងៃទី១២ ខែតុលា ឆ្នាំ២០២២នេះបន្ទាប់ពីបានធ្វើពិធីសូត្រមន្តចំរើនព្រះបរិត្ត និងសម្តែងធម្មវិសេសទេសនានៅភូមិគ្រឹះរបស់សម្តេចក្នុងរាជធានីភ្នំពេញ កាលពីរសៀលថ្ងៃទី១០ ខែតុលា ឆ្នាំ២០២២ ដោយការប្រារព្ធពិធីដង្ហែអង្គកឋិនទានរួមធ្វើឡើងនៅវត្តគីរីសុវណ្ណរាម ហៅវត្តថ្កូវ ស្ថិតក្នុងឃុំកក់ ស្រុកពញាក្រែក ខេត្តត្បូងឃ្មុំ យ៉ាងអធិកអធមកាលពីព្រឹកមិញនេះ។

វត្តទាំង៩នៅក្នុងខេត្តត្បូងឃ្មុំ ខេត្តព្រៃវែង និងខេត្តស្វាយរៀង ដែលសម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចធម្មវិសុទ្ធវង្សា សៅ ទី ហេង សំរិន ដង្ហែអង្គកឋិនទានចូលរួមមាន វត្តគីរីសុវណ្ណរាម វត្តជោតិវន្ត វត្តជោត្តិរតនរាម វត្តបុទមព្រឹក្ស វត្តតាសួស វត្តវិសប្បសិនារាម វត្តឥន្ទសាល វត្តព្រៃអង្គក្រៅ និងវត្តសិលារង្សី។ អង្គកឋិនទានដែលផ្តួចផ្តើមដោយ សម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សា សៅ ទី ហេងសំរិន មានការចូលរួមពីសំណាក់បងប្អូន កូនចៅសម្តេចទំាងទ្វេ រួមនឹងសមាជិក សមាជិការដ្ឋសភា ព្រឹទ្ធសភា រាជរដ្ឋាភិបាល ថ្នាក់ដឹកនាំ និងមន្រ្តីរាជការ នៃអគ្គលេខាធិការដ្ឋានរដ្ឋសភា ថ្នាក់ដឹកនាំក្រសួងស្ថាប័ន អាជ្ញាធរដែនដីជាច្រើនទៀត។

កឋិនទានបវេណីព្រះពុទ្ធសាសនា គឺជាឧត្ដមបុណ្យរបស់ពុទ្ធបរិស័ទ។ ពាក្យថា “កឋិន” ជាភាសាបាលីសំដៅយកក្របក្ដារ ដែលភិក្ខុសង្ឃសម័យបុរាណឥណ្ឌាប្រើសម្រាប់ដេរសំពត់ធ្វើជាស្បង់ចីវរ។ សំពត់ដែលបានរៀបចំតាក់តែងឡើងនោះមានឈ្មោះថា “សំពត់កឋិន”។

បុណ្យកឋិនជាពិធីបុណ្យមួយចាប់ផ្ដើមធ្វើបន្ទាប់ពីបុណ្យចេញវស្សា។ បុណ្យកឋិនតែងត្រូវបានដង្ហែចូលគ្រប់ទីអារាមទាំងអស់ ពុំមានទំនេរវត្ដណាមួយត្រូវបានខកខានឡើយ។ ដូច្នេះគេតែងតែឃើញក្បួនកឋិនទានតែងបានដង្ហែទៅកាន់ទីអារាមរៀងៗខ្លួន ចាប់ពីថ្ងៃ១រោច ខែអស្សុជ ដល់ថ្ងៃ១៥កើត ខែកត្តិក ហើយបើទីអារាមណាមួយមិនមានកឋិនហែចូលទេ ទីអារាមនោះក៏ត្រូវតែរៀបចំជាកឋិនជើងវត្តដែរ ហើយចំពោះអង្គកឋិនទានរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចធម្មវិសុទ្ធ វង្សា សៅ ទី ហេង សំរិន នាពេលនេះទទួលបានបច្ច័យសម្រាប់វត្តនីមួយៗចំនួន ៦០លានរៀល ព្រមទាំង គ្រឿងបរិក្ខាជាច្រើនមុខទៀត សរុបចំនួន៩វត្ត។

សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចធម្មវិសុទ្ធ វង្សា សៅ ទី ហេង សំរិន ព្រមទាំងបុត្រា បុត្រី ចៅប្រុស ចៅស្រី គឺជាពុទ្ធសានូបត្ថម្ភដ៏សកម្មចំពោះព្រះពុទ្ធសាសនា ដោយបានចំណាយថវិកាផ្ទាល់ខ្លួនជាបន្តបន្ទាប់ក្នុងការកសាងសមិទ្ធផលនានានៅតាមវត្តអារាម តម្កល់ទុកជា ប្រយោជន៍សម្រាប់វិស័យព្រះពុទ្ធសាសនានៅកម្ពុជាជាយូរអង្វែងតទៅ។

មានប្រសាសន៍លើកឡើងនាឱកាសនេះ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានគូសបញ្ជាក់ថា អាស្រ័យដោយពិភពលោកទាំងមូល ក៏ដូចជាកម្ពុជាផងដែរដែលបានញាំញីដោយម្ងឺកូវីត-១៩ ការធ្វើបុណ្យកឋិនទាននៅកម្ពុជាត្រូវបានអាក់ខានរយៈពេល៣ឆ្នាំមកហើយ តែដោយសារមាន ការខិតខំរបស់រាជរដ្ឋាភិបាលក្នុងការនាំយកវ៉ាក់សាំងមកចាក់ជូនប្រជាពលរដ្ឋនៅទូទាំងប្រទេស បានធ្វើ ឱ្យជម្ងឺដ៏កាចសាហាវមួយនេះ ត្រូវកាត់បន្ថយជាអតិបរមាទើបយើងមានឱកាសអាចធ្វើបុណ្យកឋិនទាននេះឡើងវិញ តួយ៉ាងនៅពេលនេះសម្តេចបានកសាងអង្គកឋិនទានសាមគ្គីមួយដើម្បីប្រមូលបច្ច័យវេរប្រគេនព្រះសង្ឃគង់ចាំព្រះវស្សានៅវត្តចំនួន៩ ក្នុងនោះក្នុងខេត្តត្បូងឃ្មុំចំនួន ៥វត្ត ខេត្តព្រៃវែងចំនួន ២វត្ត និងខេត្តស្វាយរៀងចំនួន ២វត្ត ដោយក្នុង១វត្តៗទទួលបានបច្ច័យសម្រាប់កសាង ៦០លានរៀល និងបច្ច័យសង្កត់ត្រ័យសរុប ២លានរៀល រួមទាំងគ្រឿងបរិក្ខាកឋិនជាច្រើនមុខផ្សេងទៀត។

ជាមួយគ្នានេះ សម្តេចបានថ្លែងអំណរគុណយ៉ាងជ្រាលជ្រៅបំផុតជូនចំពោះ ឯកឧត្តម លោកជំទាវ មន្ត្រីអ្នកមុខ អ្នកការ ដែលបានចូលរួមចំណែកក្នុងអង្គកឋិនទានរបស់សម្តេចនាពេលនេះ ដើម្បីដង្ហែយកមកវេរប្រគេនដល់ព្រះសង្ឃនាឱកាសនេះ ៕