មណ្ឌលកុមារកំព្រា សង្គ្រោះជនអស់សង្ឃឹមទី២ ស្រុកមង្គលបូរី ត្រូវទឹកជំនន់ជន់លិច កុមារកំព្រាប្រុស-ស្រី ១១៥នាក់ ត្រូវបានជម្លៀសទៅទីទួលមានសុវត្ថិភាព
ភ្នំពេញ៖ លោកវរសេនីយ៍ឯក ស៊ិន ណារ៉ាក់ អធិការនគរបាលស្រុកមង្គលបូរី បានឲ្យដឹងថា៖ មណ្ឌលកុមារកំព្រាសង្គ្រោះជនអស់សង្ឃឹមទី២ សាខាស្រុកមង្គលបូរី ដែលមានកុមារកំព្រាប្រុស-ស្រីសរុបចំនួន១១៥នាក់ គ្រប់គ្រងដោយអង្គការ RescueCambodai ស្ថិតក្នុងភូមិឬស្សីក្រោក ឃុំឬស្សីក្រោក ស្រុកមង្គលបូរី ត្រូវទឹកជំនន់ជន់លិច នៅវេលាម៉ោង៥និង៣០នាទីល្ងាច ថ្ងៃទី១១ ខែតុលា ឆ្នាំ២០២២នេះ ។
លោកអធិការបានបញ្ជាក់ថា ដើម្បីសង្រ្គោះកុមារទាំងនោះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានចាត់តាំងឲ្យលោកដឹកនាំមន្ត្រីនគរបាលក្រោមឱវាទជាច្រើននាក់ សហការជាមួយកម្លាំងសមត្ថកិច្ចពាក់ពន្ធ័ និងអាជ្ញាធរមូលដ្ឋាន ចុះជួយជម្លៀស កុមារកំព្រាប្រុស-ស្រី ចេញពីមណ្ឌល កុមារកំព្រា សង្គ្រោះជនអស់សង្ឃឹមទី២ ស្ថិតក្នុងភូមិឬស្សីក្រោក ឃុំឬស្សីក្រោក ស្រុកមង្គលបូរី កំពុងត្រូវបានរងការជន់លិចដោយទឹកជំនន់យ៉ាងគហុក ធ្វើឲ្យកុមារទាំងនោះមិនអាចស្នាក់នៅបាន ត្រូវបង្ខំចិត្តជម្លៀសទៅកាន់ទីទួលមានសុវត្ថិភាព នៅផ្សារបុរី២(ផ្សារចំការតាដោក) ស្ថិតក្នុងតាដោក ឃុំប្ញស្សីក្រោក ស្រុកមង្គលបូរី ៕
