ទាហាន៨នាក់ស្លាប់ និង៦នាក់របួសក្នុងគ្រោះថ្នាក់ចរាចរណ៍នៅភាគកណ្តាលប្រទេសហ្វីលីពីន
ម៉ានីល៖ យោធាហ្វីលីពីនបានអោយដឹងនៅថ្ងៃចន្ទ ទី១៧ ខែតុលានេះថា រថយន្តយោធាមួយគ្រឿងបានបុករថយន្តលាយស៊ីម៉ង់ត៍ដែលចតនៅក្នុងខេត្ត Masbate ភាគកណ្តាលនៃប្រទេសហ្វីលីពីន កាលពីយប់ថ្ងៃអាទិត្យ ដោយបានសម្លាប់ទាហាន ៨នាក់ និង៦នាក់ផ្សេងទៀតរងរបួស។
ឧត្តមសេនីយ Alex Luna នៃកងពលធំថ្មើរជើងទី ៩ របស់កងទ័ពបានអោយដឹងថា កងទ័ពកំពុងធ្វើដំណើរពីភាគខាងត្បូងពីទីក្រុង Masbate ទៅកាន់ទីស្នាក់ការរបស់ពួកគេក្នុងទីក្រុង Milagros នៅពេលដែលវាបានធ្លាក់កាលពីយប់ថ្ងៃអាទិត្យ។
លោកបានបន្ថែមថាក្នុងចំណោមអ្នកស្លាប់មាន៦នាក់ស្លាប់នៅនឹងកន្លែងនិង២នាក់ស្លាប់នៅមន្ទីរពេទ្យក្នុងស្រុក។
យោងតាមលោក Luna អ្នកបើកបរបានបាត់បង់ការគ្រប់គ្រងរថយន្តបន្ទាប់ពីខូចមុខងារ ហើយក្រោយមករថយន្តបានទៅបុករថយន្តលាយបេតុងដែលចតនៅលើផ្លូវ។
