អគ្គនាយកដ្ឋានគោលនយោបាយ និងយុទ្ធសាស្ត្រនៃក្រសួងបរិស្ថាន រៀបចំសិក្ខាសាលាត្រួតពិនិត្យលទ្ធផលការងារឆ្នាំ២០២២ និងទិសដៅការងារងារ ឆ្នាំ២០២៣
ភ្នំពេញ៖ អគ្គនាយកដ្ឋានគោលនយោបាយនិងយុទ្ធសាស្ត្រនៃក្រសួងបរិស្ថាន នៅថ្ងៃទី២៤ ខែតុលា ឆ្នាំ២០២២ បានរៀបចំសិក្ខាសាលាត្រួតពិនិត្យលទ្ធផលការងារឆ្នាំ២០២២ និងទិសដៅការងារងារឆ្នាំ២០២៣ ក្រោមអធិបតីភាពឯកឧត្តម ទិន ពន្លក រដ្ឋលេខាធិការក្រសួងបរិស្ថាន និងមានការអញ្ជើញចូលរួមពីឯកឧត្តម លោកជំទាវ លោក លោកស្រី តំណាងក្រសួង ស្ថាប័នពាក់ព័ន្ធ ដៃគូអភិវឌ្ឍន៍ និងអង្គការមិនមែនរដ្ឋាភិបាល ជាច្រើនរូបទៀត។
សិក្ខាសាលានេះ ធ្វើឡើងក្នុងគោលបំណងដើម្បីពិនិត្យពិភាក្សាលើកំណែទម្រង់ស៊ីជម្រៅអភិបាលកិច្ច ការជំរុញ ការឆ្លើយតបនឹងការប្រែប្រួលអាកាសធាតុ ការគ្រប់គ្រងជីវៈចម្រុះ ការអភិវឌ្ឍបៃតង និងការជំរុញការងារ វិទ្យាសាស្ត្រ បច្ចេកវិទ្យា និងនវានុវត្តន៍។
ក្នុងឱកាសនោះដែរ ឯកឧត្តម ទិន ពន្លក បានសម្តែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្ត្រីរាជការ នៃអគ្គនាយកដ្ឋានគោលនយោបាយនិងយុទ្ធសាស្ត បានរៀបចំសិក្ខាសាលានេះឡើងសំដៅលើកកម្ពស់ការងារគោលនយោបាយនិងយុទ្ធសាស្ត្រក្នុងវិស័យបរិស្ថាន និងការអភិវឌ្ឍប្រកបដោយចីរភាពនៅកម្ពុជាឱ្យកាន់តែល្អប្រសើរឡើង។
ឯកឧត្តម បានគូសបញ្ជាក់ឱ្យដឹងថា ក្រសួងបរិស្ថានមានបេសកកម្ម ចម្បងក្នុងការដឹកនាំ និងគ្រប់គ្រងកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការ អភិវឌ្ឍដោយចីរភាពសម្រាប់ជាឧត្តមប្រយោជន៍យូរអង្វែងរបស់ប្រជាជនកម្ពុជាគ្រប់រូបនិងគ្រប់ជំនាន់។ នៅក្នុងបរិបទនេះ អគ្គនាយកដ្ឋានគោលនយោបាយនិងយុទ្ធសាស្ត្រ ដែលបានបង្កើតឡើងក្នុងឆ្នាំ២០២១ ដោយបានកែសម្រួលពីអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព ដើម្បីបំពេញមុខងារជាសេនាធិការឱ្យ ក្រសួងបរិស្ថានក្នុងការរៀបចំ និងតាមដានការអនុវត្តគោលនយោបាយនិងយុទ្ធសាស្ត្រពាក់ព័ន្ធនឹងវិស័យបរិស្ថាន និងការអភិវឌ្ឍប្រកបដោយចីរភាព ជាពិសេស ដើម្បីរៀបចំគូសវាសការអភិវឌ្ឍគ្រប់វិស័យនៃសង្គម និងសេដ្ឋកិច្ចកម្ពុជា ឱ្យដើរតាមមាគ៌ាឆ្ពោះទៅរកអនាគតមួយប្រកបដោយវិបុលភាពជានិរន្ត សម្រាប់ប្រជាពលរដ្ឋគ្រប់រូប មានបរិស្ថានល្អ និងប្រព័ន្ធអេកូឡូស៊ីរឹងមាំ។
ឯកឧត្តម បានលើកឡើងទៀតថា សិក្ខាសាលាថ្ងៃនេះ យើងនឹងពិនិត្យពិភាក្សាទៅលើលទ្ធផលការងារ ដែលអគ្គនាយកដ្ឋានគោលនយោបាយនិងយុទ្ធសាស្ត្រសម្រេចបាន ក្នុងរយៈពេលមួយឆ្នាំ២០២២ បញ្ហាប្រឈមដែលបានជួបប្រទះ និងលើកទិសដៅការងារអនុវត្តឆ្នាំ២០២៣ និងឆ្នាំបន្តបន្ទាប់។ ផ្តើមចេញពីការចូលរួមចំណែក ការផ្តល់មតិយោបល់ និងការផ្លាស់ប្តូរបទពិសោធន៍ល្អៗ នឹងជំរុញឱ្យស្ថាប័នមួយនេះកាន់តែរឹងមាំប្រកបដោយធនធានគ្រប់គ្រាន់ក្នុងការគិតគូរ រៀបចំគោលនយោបាយនិងយុទ្ធសាស្ត្រនានា ដើម្បីបន្តគាំទ្រដល់វិស័យបរិស្ថាននិងការអភិវឌ្ឍប្រកបដោយចីរភាព៕
