បទអត្ថាធិប្បាយ៖ ដំណើរកាន់តែរលូនឆ្ពោះទៅការស្តារឡើងវិញដ៏មហិមារបស់ប្រជាជាតិចិន

សមាជលើកទី២០របស់បក្សកុម្មុយនិស្តចិនដែលត្រូវបានបិទបញ្ចប់ក្រោមសម្លេងស្នូរទះដៃអបអរសាទរយ៉ាងលាន់រំពងពិភពលោកពីសំណាក់ប្រជាជនចិននិងប្រជាជននៅលើពិភពលោក សារលិខិតជូនពរមកពីបរទេសដែលមានប្រភពពីថ្នាក់ដឹកនាំ ពីតំណាងគណបក្សនយោបាយ ពីសង្គមស៊ីវិល ពីក្រុមបញ្ញាញាណជាន់ខ្ពស់ បានជ្រើសរើសគណៈកម្មាធិការអចិន្ត្រៃយ៍នៃការិយាល័យនយោបាយដែលមានសមាជិកចំនួនប្រាំពីររូបតំណាងឲ្យអំណាចនយោបាយកំពូលនៅក្នុងប្រទេសចិន។
ដោយប្រកាន់ខ្ជាប់នូវគោលបំណងដើមរបស់ខ្លួន និងដោយមានលោក ស៊ី ជីនភីង ជាស្នូល បក្សកុម្មុយនិស្តិចិនបាននិងកំពុងរក្សានិងបង្កើនឧត្តមានុភាពរបស់ខ្លួនហើយបានបន្តដំណើរយ៉ាងស្វាហាប់ឈានទៅមុខ ស្របតាមលទ្ធិម៉ាក្សនិយមរួមជាមួយនឹងស្ថានភាពប្រទេសចិននាពេលបច្ចុប្បន្ន ព្រមទាំងជំរុញឲ្យមាននវានុវត្តន៍ខាងផ្នែកទ្រឹស្ដីនិងខាងការអនុវត្តដោយសមាជលើកទី២០របស់បក្សកុម្មុយនិស្តចិនបានអនុម័តជាឯកច្ឆ័ន្ទបន្ថែមលទ្ធផលអភិវឌ្ឍថ្មីនៃគំនិតសង្គមនិយមលក្ខណៈពិសេសចិនក្នុងយុគសម័យថ្មីរបស់លោក ស៊ី ជីនភីង ដែលនេះជាគោលដៅយុទ្ធសាស្ត្រនៃការអភិវឌ្ឍសេដ្ឋកិច្ចនិងសង្គមកិច្ចរបស់ប្រទេសចិនគិតដល់ឆ្នាំ២០៣៥ក្នុងការសម្រេចបាននូវទំនើបកម្មសង្គមនិយមជាមូលដ្ឋាន ហើយក្នុងពាក់កណ្តាលសតវត្សរ៍នេះមាគ៌ានៃកសាងប្រទេសចិនឱ្យក្លាយជាប្រទេសសង្គមនិយមទំនើបដ៏ខ្លាំងក្លា ពោលគឺសម្រេចបាន «គោលដៅតស៊ូមួយរយឆ្នាំទី២»។ ក្នុងន័យនេះជំរុញការស្តារភាពរុងរឿងដ៏មហិមារបស់ប្រជាជាតិចិនឡើងវិញតាមការធ្វើទំនើបកម្មបែបផែនចិន ជាភារកិច្ចសារវន្តដែលបក្សកុម្មុយនិស្តចិនបានដាក់ទិសដៅរបស់ខ្លួនប្រកបដោយត្រីវិស័យនយោបាយដែលគោរពបានយ៉ាងខ្ជាប់ខ្ជួននូវធម្មនុញ្ញរបស់អង្គការសហប្រជាជាតិ ហើយដែលលោក ស៊ី ជីនភីង បានប្រើពាក្យពេចន៍ដ៏សាមញ្ញតែពោរពេញដោយអត្ថន័យមហាសាលគឺ “ ពិបាកជាងគេ តែក៏អស្ចារ្យបំផុតដែរ” ក្នុងស្មារតីខិតខំប្រឹងប្រែងបន្ថែមទៀតក្នុងការទទួលដំណើរវិលត្រឡប់របស់កោះតៃវ៉ាន់មកកាន់មាតុភូមិរបស់ខ្លួនវិញ។
ដោយពង្រឹងការចាត់ទុកសុខភាពរបស់ប្រជាជនក្នុងយុទ្ធសាស្រ្តជាតិជាអាទិភាព បក្សកុម្មុយនិស្តចិនដែលមានដើមកំណើតពីប្រជាជន ទទួលបានអំណាចពីប្រជាជន នឹងបន្តបេសកកម្មដ៏ថ្លៃថ្លារបស់ខ្លួន គ្រប់យ៉ាងគឺសម្រាប់ប្រជាជន ពឹងផ្អែកលើប្រជាជន ឲ្យតម្លៃទៅលើភាពអង់អាចរបស់ប្រជាជន បង្កើតនូវគំនិតថ្មី និងការច្នៃប្រឌិតផ្សេងៗ និងជំរុញបុព្វហេតុទៅមុខដើម្បីជាប្រយោជន៍ឲ្យប្រជាជន និងការគោរពជំហរជារបស់ប្រជាជនដោយធានាថាប្រជាជនចិនជាម្ចាស់របស់ប្រទេសចិន ។ ឧត្ដមគតិរបស់បក្សកុម្មុយនិស្តចិនជាឧត្តមគតិដ៏ខ្ពង់ខ្ពស់ ហើយជាភារកិច្ចបែបយុទ្ធសាស្រ្តដើម្បីរក្សាការប្តេជ្ញាចិត្តផ្នែកនយោបាយក្នុងការកសាងសង្គមមួយប្រកបដោយវិបុលភាពពេញលេញ និងដើម្បីស្តារភាពអស្ចារ្យឡើងវិញនៃប្រជាជាតិចិន។
ដោយប្រកាន់ខ្ជាប់នូវស្មារតីបើកចំហ ប្រទេសចិនបានត្រៀមខ្លួនយ៉ាងរឹងមាំនៅក្នុងកិច្ចប្រកៀកស្មារជាមួយបណ្តាប្រទេសទាំងអស់នៅក្នុងពិភពលោកដើម្បីបន្តផលិតនំខេកផលប្រយោជន៍ដែលទទួលបានពីការអភិវឌ្ឍ ។ លោក ស៊ី ជីនភីង អគ្គលេខាធិការបក្សកុម្មុយនីស្តចិនបានគូសបញ្ជាក់ថា ជានិច្ចកាលប្រទេសចិនតែងតែផ្សព្វផ្សាយគុណតម្លៃរួមរបស់មនុស្សជាតិ បន្តជំរុញការកសាងសហគមន៍រួមវាសនារបស់មនុស្សជាតិ ហើយសំដៅឆ្ពោះទៅកាន់អនាគតរួមវាសនា នោះប្រទេសចិននឹងបន្តបើកទ្វារចំហកាន់តែទូលំទូលាយ បង្កើតកាលានុវត្តភាពកាន់ធំ និងពង្រីកផលប្រយោជន៍កាន់តែច្រើន ដល់ពិភពលោកតាមរយៈគំនិតផ្តួចផ្តើមស្តីពីអភិវឌ្ឍសកល ។ លើសពីនេះស្មារតីពហុភាគីនិយមដែលចិនតែងបានប្រកានខ្ជាប់យ៉ាងម៉ឹងម៉ាត់កំពុងអត្ថិភាពជាគុណតម្លៃរួមរបស់មនុស្សជាតិដែលជាចំណែកដ៏សកម្មរបស់ប្រទេសចិនក្នុងការថែរក្សាសន្តិភាព វិវឌ្ឍនភាព យុត្តិធម៌ ប្រជាធិបតេយ្យ និងសេរីភាព ដើម្បីជំរុញកសាងសកលលោកដែលមានសន្តិភាពជានិរន្តរ៍ សន្តិសុខជាទូទៅ វិបុលភាពរួម បើកទូលាយនិងបរិយាបន្ន។

ដោយប្រកាន់ខ្ជាប់នូវការបន្តវេនហ្សេនអរិយធម៌វិបុលភាពមនុស្សជាតិ ប្រជាជាតិចិនបានបញ្ជាក់នូវទឡ្ហីករណ៍ជាច្រើននៃការប្រតិបត្តិតាមទស្សនៈរបស់ឡៅជឺ ខុងជឺ និងបណ្តាទស្សនវិទូចិនជាច្រើនក្នុងរយៈពេលជាង២៥០០ឆ្នាំកន្លងមកនេះ ។ ទស្សនៈដូចជា «យកការរាប់អានគ្នាដោយសន្តិភាពជាអាទិភាព» «ជួយអ្នកដទៃប្រកបដោយចិត្តធម៌» «បើមិនចង់ទទួលទង្វើណាមួយពីអ្នកដទៃ សូមកុំសាងទង្វើនោះទៅកាន់អ្នកដទៃ» ជាដើម បានបន្តពីមួយជំនាន់ទៅមួយជំនាន់នៅក្នុងប្រទេសចិន ហើយក៏បានចាក់ឫសគល់យ៉ាងជ្រៅនៅក្នុងស្មារតីប្រជាជនចិន និងបញ្ជាក់យ៉ាងច្បាស់តាមរយៈសកម្មភាពរបស់ប្រជាជនចិនទៀតផង។ តាមរយៈហ្សេននេះ ការធ្វើទំនើបកម្មតាមបែបផែនចិន គឺជាការធ្វើទំនើបកម្មដែលមិនត្រឹមផ្តល់ជូននូវជីវភាពរស់នៅរបស់ប្រជាជនប្រកបដោយវិបុលភាព ការចុះសម្រុងគ្នារវាងអរិយធម៌ខាងសម្ភារៈនិងអរិយធម៌ខាងវិញ្ញាណ ភាពសុខដុមរមនានៃការរួមរស់នៅជាមួយគ្នារវាងមនុស្សនិងធម្មជាតិ និងមាគ៌ាអភិវឌ្ឍន៍ដោយសន្តិភាពរបស់ប្រជាជនចិនប៉ុណ្ណោះទេ មនុស្សជាតិនៅលើពិភពលោកកំពុងភ្លក្សនិងទទួលបាននូវផ្លែផ្កានៃសមិទ្ធផលដ៏អស្ចារ្យនេះ។ សមាជលើកទី២០របស់បក្សកុម្មុយនីស្តចិនជាសក្ខីភាពបញ្ជាក់យ៉ាងប្រត្យក្សថា ប្រទេសចិនបាននិងកំពុងផ្តល់នូវកាលានុវត្តភាពអភិវឌ្ឍន៍ថ្មីដល់ពិភពលោកតាមរយៈការអភិវឌ្ឍថ្មីរបស់ប្រទេសចិន ជំរុញការកសាងសេដ្ឋកិច្ចបែបបើកទូលាយដូចដែលបានគូសបញ្ជាក់នៅក្នុងគំនិតផ្តួចផ្តើម «ខ្សែក្រវាត់និងផ្លូវ» ជាទឡ្ហីករណ៍ ។
ជារួម សមិទ្ធផលក្នុងទស្សវត្សរ៍កន្លងមកនេះដែលបានឆ្លុះបញ្ចាំងតាមរយៈសមាជលើកទី២០របស់បក្សកុម្មុយនីស្តចិន បានបង្កើតសមិទ្ធផលជាប្រវត្តិសាស្ត្រក្នុងការអភិវឌ្ឍសេដ្ឋកិច្ចនិងសង្គម ហើយជាការផ្លាស់ប្តូរយ៉ាងសំខាន់ៗនៅក្នុងជីវិតរបស់ប្រជាជនចិននិយាយដោយឡែក មនុស្សជាតិទូទៅនិយាយរួម ។ អង្គសមាជលើកទី២០របស់បក្សកុម្មុយនិស្តចិន បានផ្តល់ទំនុកចិត្តកាន់តែខ្លាំងលើលោក ស៊ី ជីនភីង ជាអគ្គលេខាធិការ ជាសញ្ញាបញ្ជាក់ថាប្រទេសចិនកំពុងចូលដល់យុគសម័យថ្មីនៅក្នុងមហាវិថីល្បឿនលឿនក្នុងការកសាងប្រទេសចិនតាមមាគ៌ាសង្គមនិយមទំនើបកម្មប្រកបដោយវិបុលភាពគ្រប់ជ្រុងជ្រោយ ក្នុងទិសដៅឆ្ពោះទៅសម្រេចបានយ៉ាងរលូននូវគោលដៅតស៊ូមួយរយឆ្នាំទី២ក្នុងការស្តារភាពអស្ចារ្យនៃប្រជាជាតិចិនឡើងវិញផងដែរ៕

ដោយបណ្ឌិត ជា មុនីឫទ្ធិ
ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន