មនុស្សបីនាក់បានស្លាប់ក្នុងការបាញ់ប្រហារបន្ទាប់ពីជម្លោះគ្រួសារនៅភាគកណ្តាលប្រទេសអេស្ប៉ាញ
ម៉ាឌ្រីដ៖ ប៉ូលិសបានបញ្ជាក់ថា មនុស្ស៣នាក់បានស្លាប់ និង២នាក់រងរបួស បន្ទាប់ពីប៉ូលិសប្រដាប់អាវុធបានចូលអន្តរាគមន៍នៅក្នុងការបាញ់ប្រហារមួយ ដែលបង្កឡើងដោយការឈ្លោះប្រកែកគ្នារវាងបុរសម្នាក់ និងឪពុករបស់គាត់នៅភាគកណ្តាលប្រទេសអេស្ប៉ាញ កាលពីថ្ងៃពុធ (២៦ តុលា)។
អ្នកនាំពាក្យប៉ូលិសបានប្រាប់រ៉យទ័រថា ខ្មាន់កាំភ្លើង អ្នកជិតខាង និងប៉ូលីសម្នាក់ត្រូវបានបាញ់សម្លាប់នៅផ្ទះមួយនៅលើផ្លូវរវាងភូមិ Argamasilla de Calatrava និង Villamayor de Calatrava ក្បែរ Ciudad Real ចម្ងាយប្រហែល ២៣០ គីឡូម៉ែត្រភាគខាងត្បូងទីក្រុង Madrid ។
ឧបទ្ទវហេតុនេះផ្តើមចេញពីជម្លោះក្នុងគ្រួសាររវាងខ្មាន់កាំភ្លើងអាយុ ៥០ ឆ្នាំនិងឪពុករបស់គាត់អាយុ ៨១ ឆ្នាំ។ ពេលអ្នកជិតខាងព្យាយាមអន្តរាគមន៍ ខ្មាន់កាំភ្លើងក៏ចាប់ផ្តើមបាញ់។
ក្រុមប្រតិបត្តិការពិសេសមួយមកពី Ciudad Real ត្រូវបានគេហៅចេញ ហើយបានបាញ់សម្លាប់ខ្មាន់កាំភ្លើង។
ប៉ូលិសម្នាក់ទៀតត្រូវបានគេបាញ់ចំជើង ខណៈមន្ត្រីទី៣ម្នាក់រងរបួសដោយគ្រាប់កាំភ្លើង ហើយត្រូវបានគេបញ្ជូនទៅមន្ទីរពេទ្យ។ ប៉ូលិសបានបញ្ជាក់ថា ឪពុកបានរត់គេចខ្លួនដោយមានស្នាមរបួស។
ឧក្រិដ្ឋកម្ម ជាពិសេសអំពើហឹង្សាដោយកាំភ្លើង គឺកម្រមានណាស់នៅក្នុងប្រទេសអេស្ប៉ាញ។ យោងតាមរដ្ឋាភិបាលបានឱ្យដឹងថា អត្រាឧក្រិដ្ឋកម្មរបស់ប្រទេសនេះបានធ្លាក់ចុះ ១១ ភាគរយក្នុងឆ្នាំ ២០២១ ពីឆ្នាំ ២០១៩ ។
ដោយមិនរាប់បញ្ចូលឆ្នាំ ២០២០ នៅពេលដែលឧប្បត្តិហេតុនៃឧក្រិដ្ឋកម្មកម្រជាពិសេសដោយសារតែការចាក់សោរដែលបណ្តាលមកពីជំងឺរាតត្បាត អត្រាឧក្រិដ្ឋកម្មឆ្នាំ ២០២១ នៃឧប្បត្តិហេតុចំនួន ៤១.៤ ក្នុងមនុស្ស ១,០០០ នាក់គឺទាបបំផុតចាប់តាំងពីកំណត់ត្រាបានចាប់ផ្តើម។
