ឯកឧត្ដម ហង់ជួន ណារ៉ុន ចូលរួមសន្និសីទលើកទី៦ ថ្នាក់រដ្ឋមន្ត្រីអប់រំឧត្ដមសិក្សា និងការស្រាវជ្រាវនៃ ប្រទេសនិយាយភាសាបារាំង
ទីក្រុងគែរ៖ ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៦ តុលា បានដឹកនាំគណៈប្រតិភូក្រសួងអប់រំ យុវជន និងកីឡា ចូលរួមសន្និសីទលើកទី៦ ថ្នាក់រដ្ឋមន្ត្រីអប់រំឧត្ដមសិក្សា និងការស្រាវជ្រាវនៃប្រទេសនិយាយភាសាបារាំង។
សន្និសីទនេះ មានការចូលរួមពី ប្រធានទីភ្នាក់ងារសាកលវិទ្យាល័យប្រើប្រាស់ភាសាបារាំង សកលវិទ្យាធិការនៃទីភ្នាក់ងារសាកលវិទ្យាល័យប្រើប្រាស់ភាសាបារាំង រដ្ឋមន្ត្រីអប់រំឧត្ដមសិក្សា និងការស្រាវជ្រាវនៃប្រទេសនិយាយភាសាបារាំងមកពីប្រទេសមួយចំនួនទៀត។
ក្នុងសន្និសីទនេះ ឯកឧត្តមបណ្ឌិតសភាចារ្យ រដ្ឋមន្ត្រី បានផ្ដល់អនុសាសន៍លើចំណុចមួយចំនួនរួមមាន៖
១- ការដាក់ទីតាំងសកលវិទ្យាល័យ នៅក្នុងប្រទេសកំពុងអភិវឌ្ឍន៍ ឬការអភិវឌ្ឍកម្មវិធីសិក្សាដែល ទទួលបានសញ្ញាបត្រពីរ ជាមួយគ្រឹះស្ថានសិក្សាបារាំង
២- ការដាក់ទីតាំងសាលាបារាំងក្នុងប្រទេសកំពុងអភិវឌ្ឍន៍
៣- កិច្ចសហប្រតិបត្តិការជាមួយស្ថាប័ននិយាយភាសាបារាំង ដើម្បីជំរុញឱ្យមានចល័តភាពធនធានសំខាន់ៗក្នុងគោលបំណងបង្កើតឱ្យមាន ប្រព័ន្ធឌីជីថលសម្រាប់ពហុភាសានិយម ដែលជាកត្តាជំរុញឱ្យមានការសិក្សាភាសា
៤- កិច្ចសហប្រតិបត្តិការជាមួយស្ថាប័ននិយាយភាសាបារាំង ក្នុងការដាក់ឱ្យប្រើប្រាស់នូវខ្លឹមសារមេរៀនសម្រាប់គ្រូបង្រៀន និងអ្នកសិក្សា
៥- ការលើកកម្ពស់ការប្រើប្រាស់ភាសាបារាំងនៅក្នុងក្រុមហ៊ុននិយាយភាសាបារាំង៕
