នាយឧត្តមសេនីយ៍ គៀត ច័ន្ទថារិទ្ធ អញ្ជើញអមដំណើរចុះត្រួតពិនិត្យស្ពានយោលសម្រាប់ឆ្លងកាត់ពីឃុំកន្ទឺ១ មកឃុំកន្ទឺ២

ភ្នំពេញ៖ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកបាណន់ នាព្រឹកថ្ងៃអាទិត្យ ៦កើត ខែកត្កិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣០ ខែតុលា ឆ្នាំ២០២២ បានអញ្ជើញអមដំណើរ ឯកឧត្តម សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកបាណន់ ខេត្តបាត់ដំបង និងក្រុមការងារ អញ្ជើញចុះត្រួតពិនិត្យស្ពានយោលសម្រាប់ឆ្លងកាត់ពីឃុំកន្ទឺ១ មកឃុំកន្ទឺ២ ដែលបានរងការខូចខាតនាពេលកន្លងមក ។

ក្នុងការចុះត្រួតពិនិត្យនេះ ឯកឧត្តម សន្តិបណ្ឌិត សុខ ផល បានមានប្រសាសន៍សាកសួរសុខទុក្ខដល់ប្រជាពលរដ្ឋដែលរស់នៅអមសងខាងស្ពានយោលនេះ។ ឯកឧត្តម បានផ្ដាំផ្ញើឱ្យប្រជាពលរដ្ឋដែលបានប្រើប្រាស់ស្ពានយោលនេះ ចូលរួមថែរក្សាស្ពាននេះដើម្បីឱ្យប្រើប្រាស់បានយូរ។

ឯកឧត្តម សន្តិបណ្ឌិត បានឱ្យអាជ្ញាធរមូលដ្ឋាន ត្រូវព្យាយាមត្រួតពិនិត្យស្ពានឱ្យបានល្អ ជៀសវាងការដឹកលើសចំណុះ ត្រួតពិនិត្យខ្សែកាប ខ្សែយោងស្ពាន ជៀសវាងការមានគ្រោះថ្នាក់ជាយថាហេតុ ។

ឆ្លៀតក្នុងឱកាសនោះដែរ ឯកឧត្តម សន្តិបណ្ឌិត បានឧបត្ថម្ភថវិកាមួយចំនួនសម្រាប់ការជួសជុលស្ពាន និងការថែទាំស្ពាន ហើយឯកឧត្តម ក៏បានឧបត្ថម្ភថវិកាមួយចំនួន និងសារុង ដល់ប្រជាពលរដ្ឋដែលបានចូលរួមនាពេលនេះ ៕