លោកជំទាវ និន សាផុន អញ្ជើញជួបជុំមន្ត្រីទំនាក់ទំនងភ្ញៀវ និងមន្ត្រីការពារសន្តិសុខ ត្រៀមបម្រើការក្នុងមហាសន្និបាតអន្តរសភាអាស៊ាន លើកទី៤៣
ភ្នំពេញ៖ លោកជំទាវ និន សាផុន ប្រធានគណៈកម្មការទី៩ នៃរដ្ឋសភា និងជាប្រធានអនុគណៈកម្មការទី៣៖ ឡូជីស្ទីក ពិធីការ និងបដិសណ្ឋារកិច្ច នៃមហាសន្និបាតលើកទី៤៣ អន្តរសភាអាស៊ាន (អាយប៉ា AIPA) នាថ្ងៃទី៣១ ខែតុលា ឆ្នាំ២០២២ បានអញ្ជើញជាអធិបតីក្នុងកម្មវិធីជួបជុំមន្ត្រីទំនាក់ទំនងភ្ញៀវ (LO) មន្ត្រីការពារសន្តិសុខ (S0) និងកម្មវិធីបណ្ដុះបណ្ដាលមន្ត្រីទំនាក់ទំនងភ្ញៀវ (LO) ដើម្បីត្រៀមបម្រើការក្នុងមហាសន្និបាតអន្តរសភាអាស៊ាន-អាយប៉ា លើកទី៤៣ ដែលសភានៃព្រះរាជាណាចក្រកម្ពុជា នឹងធ្វើជាម្ចាស់ផ្ទះរៀបចំមហាសន្និបាតនេះ ចាប់ពីថ្ងៃទី២០ ដល់ថ្ងៃទី២៥ ខែវិច្ឆិកា ឆ្នាំ២០២២ ខាងមុខនេះ។
កម្មវិធីខាងលើនេះ មានការអញ្ជើញចូលរួមពីឯកឧត្តម លោកជំទាវ លោក លោកស្រី ជាតំណាងអនុគណៈកម្មការទី៥៖ សន្តិសុខ សណ្តាប់ធ្នាប់ និងសង្រ្គោះបឋម មន្ត្រីទំនាក់ទំនងភ្ញៀវ (LO) និងមន្រ្តីការពារសន្តិសុខ (SO) នៃមហាសន្និបាតអន្តរសភាអាស៊ាន។
