ឯកឧត្តម ឈាង វុន ដឹកនាំកិច្ចប្រជុំពិនិត្យរៀបចំ សេចក្តីស្នើវិសោធនកម្ម បទបញ្ជាផ្ទៃក្នុងរដ្ឋសភា

ភ្នំពេញ៖ ឯកឧត្តម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា នាថ្ងៃទី៣១ ខែតុលា ឆ្នាំ២០២២ បានអញ្ជើញដឹកនាំកិច្ចប្រជុំពិនិត្យរៀបចំសេចក្តីស្នើវិសោធនកម្មបទបញ្ជាផ្ទៃក្នុងរដ្ឋសភា នៃព្រះរាជាណាចក្រកម្ពុជា ប្រការ ២ថ្មី (ពីរ) ប្រការ ៥ថ្មី (ពីរ) ប្រការ ១០ថ្មី (បី) ប្រការ១៦ និងប្រការ ៣៥ថ្មី នៃបទបញ្ជាផ្ទៃក្នុងដ្ឋសភា នៃព្រះរាជាណាចក្រកម្ពុជា។

បទបញ្ជាផ្ទៃក្នុងរដ្ឋសភា នៃព្រះរាជាណាចក្រកម្ពុជា ដែលបានប្រកាសអោយប្រើនៅថ្ងៃទី២៧ ខែតុលា ឆ្នាំ១៩៩៣ ត្រូវបានធ្វើវិសោធនកម្មជាបន្តបន្ទាប់ចំនួន១០លើក ក្នុងគោលបំណងអោយខ្លឹមសារមានសង្គតិភាព ទៅនឹងបទប្បញ្ញត្តិ នៃរដ្ឋធម្មនុញ្ញ និងច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិ ព្រមទាំងសមស្របតាមស្ថានភាពជាក់ស្តែង ធានាបាននូវនិរន្តភាពជាតិ និងធានាបាននូវកិច្ចដំណើរការជាប្រក្រតីរបស់ស្ថាប័នរដ្ឋសភា ព្រមទាំងស្របតាមគោលការណ៍បែងចែកអំណាចនយោបាយប្រជាធិបតេយ្យ សេរីពហុបក្ស និងរបបរាជានិយមអាស្រ័យរដ្ឋធម្មនុញ្ញ។

កិច្ចប្រជុំនេះមានការអញ្ជើញចូលរួមពីឯកឧត្តម លោកជំទាវ ជាសមាជិក សមាជិកាគណៈកម្មការជំនាញ នៃរដ្ឋសភា និងលោក លោកស្រីជាសមាជិក សមាជិកាគណៈកម្មការពិសេសចំពោះកិច្ច ៕