បទអត្ថាធិប្បាយ៖ ភាគច្រើននៃអ្នកគាំទ្រភាពយន្តខ្មែរនៅតាមរោងភាពយន្តគឺជាយុវជន

ភ្នំពេញ៖ មន្ត្រីជំនាញ នៃក្រសួងវប្បធម៌ និងវិចិត្រសីល្បៈបានកត់សម្គាល់ថា ភាគច្រើន នៃអ្នកគាំទ្រភាពយន្តខ្មែរនៅតាមរោងភាពយន្តគឺជាយុវជនដែលអាយុចន្លោះពី១៥ដល់៣៥ឆ្នាំ។
លោកប៉ុក បូរក្ស ប្រធាននាយកដ្ឋានភាពយន្ត និងផ្សព្វផ្សាយវប្បធម៌ បានមានប្រសាសន៍ប្រាប់វិទ្យុមិត្តភាពកម្ពុជាចិនថា យុវជនបានចូលរួមយ៉ាងសំខាន់ក្នុងការគាំទ្រវិស័យភាពយន្តនៅកម្ពុជា ទាំងការទិញសំបុត្រចូលទស្សនានៅតាមរោងភាពយន្ត តាមAPP ទូរទស្សន៍ និងតាមរយៈបណ្តាញសង្គម។
សំឡេង៖ «ខ្ញុំអាចនិយាយបានថា បច្ចុប្បន្ននេះ ទាំងភាពយន្តខ្នាតវែង ភាពយន្តខ្នាតខ្លី និងភាពយន្តភាគដែលចាក់បញ្ចាំងនៅតាមកញ្ចក់ទូរទស្សន៍ គឺទស្សនិកជនដែលគាំទ្រវិស័យភាពយន្តនេះ គឺភាគច្រើននៃប្រជាជនយើងហ្នឹងជាយុវជននេះឯង។ តាមការសិក្សារបស់យើងឃើញថា យុវជនចន្លោះពី១៥ដល់៣៥ឆ្នាំគឺស្ទើរតែ៨០ភាគរយដែលបានចូលទៅទិញសំបុត្រទស្សនាភាពយន្តនៅតាមរោងភាពយន្ត។
លោកស្រី ឌីណាទីណេ ដែលជាអ្នកគាំទ្រវិស័យភាពយន្តកន្លងមកបានឱ្យដឹងថា ការចូលទៅទស្សនាភាពយន្តនៅក្នុងរោងភាពយន្តនេះគីចង់បង្កើនការយល់ដឹងចំណេះដឹងផ្សេងៗតាមរយៈសិល្បៈភាពយន្ត ការវិវត្តន៍នៃវិស័យនេះតាមសម័យកាល ខណៈដែលការទស្សនាភាពយន្តក៏បានជំរុញឱ្យយើងបំបាត់នូវការនឿយហត់ និងបង្កើនការសម្បាយរីករាយផងដែរ។
លោកស្រីបញ្ជាក់ថាការទស្សនាភាពយន្តនេះ ក្រៅពីការសប្បាយរីករាយ វាក៏ជាផ្នែកមួយជំរុញឱ្យ ផលិតករខ្មែរយើងមានកម្លាំងចិត្តខិតខំបង្កើតស្នាដៃថ្មីៗថែមទៀត។
លោកប៉ុក បូរក្សប្រធាននាយកដ្ឋានភាពយន្ត និងផ្សព្វផ្សាយវប្បធម៌ មានប្រសាសន៍បញ្ជាក់ថា
មុនពេលវិបត្តិកូវីដ១៩ គឺមានអ្នកចូលទស្សនានៅតាមរោងកុនមានជិត៤លាននាក់ក្នុងមួយឆ្នាំ។ ប៉ុន្តែបច្ចុប្បន្ននេះ ចំនួនរោងកុននៅមានចំនួនតិចភាគច្រើននៅតែទីក្រុង និងទីប្រជុំជនប៉ុណ្ណោះ ដូច្នេះក្រសួងនឹងជំរុញឱ្យមានច្រើនថែមទៀតនៅតាមបណ្តាខេត្ត។
ប្រធាននាយកដ្ឋានភាពយន្ត និងផ្សព្វផ្សាយវប្បធម៌ បានបញ្ជាក់ថា ក្រសួងតែងតែបង្កើតឱ្យមានវគ្គ បណ្តុះបណ្តាលវិស័យភាពយន្ត ដោយផ្តោតលើជំនាញចំណេះ ទាំងការសសេរ បច្ចេកទេសថត ការដឹកនាំរឿងដើម្បីជំរុញលើកទឹកចិត្ត និងបង្កើនសមត្ថភាពពួកគេដែលស្រលាញ់វិស័យភាពយន្ត ។
ជាមួយគ្នានេះ តាមរយៈសហភាពសព័ន្ធយុវជនកម្ពុជាវិស័យវប្បធម៌ និងវិចិត្រសិល្បៈ កំពុងរៀបចំកម្មវិធីមួយ គឺកម្មវិធីយុវជនគាំទ្រភាពយន្តខ្មែរ ដោយបានផ្តល់ឱកាសឱ្យយុវជនកម្ពុជាបានចូលទៅរោងភាពយន្តនានាបានមើលរឿងខ្មែរផ្សេងៗ។ ជំរុញឱ្យយុវជនចូលរួមចំណែកលើកកម្ពស់វិស័យភាពយន្តនេះផងនិងបង្កើនមចំនួនអ្នកទស្សនាថ្មីៗផងដែរព្រោះថា ការទាក់ទាញអ្នកទស្សនាថ្មីជារឿងសំខាន់ក្នុងការឱ្យពួកគាត់ចូលទស្សនានៅតាមភាពយន្តផ្ទាល់។ជាមួយគ្នានោះដែរក្រសួងវប្បធម៌ក៏បានបង្កើនកម្មវិធីមហោស្រពខ្នាតខ្លីកម្ពុជាផងដែរដោយបើកឱកាសឱ្យមហាជននិងយុវជនដែលមានស្នាដៃផលិតភាពយន្តបានចូលរួមប្រឡងប្រជែងយកពានរង្វាន់៕ អត្ថបទ៖ ដោយវិទ្យុមិត្តភាពកម្ពុជាចិន