ទឹកធ្លាក់ភ្នំ៥៣ ជារមណីយដ្ឋានទេសចរណ៍ធម្មជាតិកែច្នៃមួយកន្លែងស្ថិតនៅស្រុកភ្នំព្រឹក ខេត្តបាត់ដំបង

បាត់ដំបង៖ ទឹកធ្លាក់ភ្នំ៥៣ ជារមណីយដ្ឋានទេសចរណ៍ធម្មជាតិកែច្នៃមួយកន្លែង ដែលបង្កើតឡើងក្នុងឆ្នាំ២០២០ ដែលមានទីតាំងស្ថិតនៅ ភូមិភ្នំព្រឹក ឃុំភ្នំព្រឹក ស្រុកភ្នំព្រឹក ខេត្តបាត់ដំបង នៅលើភ្នំព្រឹកតែម្តង ។

ភ្ញៀវទេសចរ អាចធ្វើដំណើរ ទៅទីនោះ ដោយធ្វើដំណើរចេញពីក្រុងបាត់ដំបង តាមផ្លូវជាតិលេខ០៥ ដល់ទីរួមស្រុកថ្មគោល ចំណុចរង្វង់មូលថ្មគោល បត់ឆ្វេងឆ្ពោះទៅកាន់ស្រុកបវេល ស្រុកកំរៀង និងស្រុកភ្នំព្រឹក ដែលមានចម្ងាយប្រមាណ ១៣២ គីឡូម៉ែត្រ។

មួយវិញទៀត ភ្ញៀវទេសចរ អាចធ្វើដំណើរកាត់តាមខេត្តប៉ៃលិន ដែលមានចម្ងាយប្រមាណ ១៥៥ គីឡូម៉ែត្រ តាមផ្លូវ ក្រវ៉ាត់ក្រុង ដល់ត្រង់ចំណុចភូមិភ្នំព្រឹក ឃុំភ្នំព្រឹក ស្រុកភ្នំព្រឹក ខេត្តបាត់ដំបង នឹងឃើញមានស្លាកសញ្ញាទឹកធ្លាក់ជ្រោះភ្នំ៥៣ នៅខាងឆ្វេងដៃ ចូលទៅដល់ទីតាំងភ្នំ៥៣ ត្រឹមតែជាង២គីឡូម៉ែត្រទៀតតែប៉ុណ្ណោះ។

នៅរមណីយដ្ឋាន មានសក្តានុពលទាក់ទាញទេសចរ ដូចជា៖ ទេសភាពលើភ្នំ ទឹកជ្រោះធម្មជាតិ ល្អាងភ្នំធម្មជាតិ សួនផ្កាចម្រុះ ចម្ការផ្លែឈើតាមផ្លូវ ដុំថ្មធម្មជាតិចម្រុះ ល។ល ហើយនៅរមណីយដ្ឋានក៍មានផ្តល់សេវាកម្មដូចជា៖ ម្ហូបអាហារ និងភេសជ្ជៈ សេវាបោះតង និងផ្ទះស្នាក់ តូបជួលអង្គុយលម្ហែ និងតូបលក់វត្ថុអនុស្សាវរីយ៍ផ្សេងៗ៕