រដ្ឋបាលខេត្តពោធិ៍សាត់ បានរៀបចំកិច្ចប្រជុំលេខាធិការដ្ឋាន ត្រួតពិនិត្យគ្រឿងញៀនខេត្ត
ភ្នំពេញ៖ លោក ពៅ ពិសិដ្ឋ អភិបាលរងនៃគណៈអភិបាលខេត្ត និងជាប្រធានលេខាធិការដ្ឋាន តំណាងឯកឧត្តម ជាវ តាយ អភិបាលនៃគណៈអភិបាលខេត្តពោធិ៍សាត់ នាព្រឹកថ្ងៃទី០៣ ខែវិច្ឆិកា ឆ្នាំ២០២២នេះ បានរៀបចំកិច្ចប្រជុំលេខាធិការដ្ឋាន ត្រួតពិនិត្យគ្រឿងញៀនខេត្ត ។
កិច្ចប្រជុំនេះត្រូវបានធ្វើឡើងនៅសាលប្រជុំសាលាខេត្ត ដោយបានការអញ្ជើញចូលរួមពី លោក យ៉ែម តុលា ចៅក្រមស៊ើបសួរ តំណាងឯកឧត្តមប្រធានសាលាដំបូងខេត្ត, ឯកឧត្តម កូយ កាន់យ៉ា ព្រះរាជអាជ្ញា នៃអយ្យការអមសាលាដំបូងខេត្ត ព្រមទាំងអស់លោក លោកស្រី ជាសមាជិក សមាជិកា នៃលេខាធិការដ្ឋានត្រួតពិនិត្យគ្រឿងញៀនខេត្តជាច្រើនអ្នកទៀត។
ក្នុងកិច្ចប្រជុំនោះ មានរបៀបវារៈ សំខាន់ៗចំនួន០៧រួមមាន៖
១. មតិបើកអង្គប្រជុំ ដោយលោក ពៅ ពិសិដ្ឋ អភិបាលរងនៃគណៈអភិបាលខេត្ត និងជាប្រធានលេខាធិការដ្ឋានត្រួតពិនិត្យគ្រឿងញៀនខេត្ត
២. សេចក្តីរាយការណ៍ នូវរបាយការណ៍ប្រចាំខែតុលា ឆ្នាំ២០២២ របស់ស្នងការនគរបាលខេត្ត
៣. មតិចូលរួម របស់ឯកឧត្តមប្រធានសាលាដំបូងខេត្ត
៤. មតិចូលរួម របស់ឯកឧត្តមព្រះរាជអាជ្ញា នៃអយ្យការអមសាលាដំបូងខេត្ត
៥. ពិនិត្យ និងកែសម្រួលសេចក្តីព្រាងសេចក្តីសម្រេច ស្ដីពីការបង្កើតក្រុមការងារត្រួតពិនិត្យចល័ត បង្ការ ទប់ស្កាត់ និងបង្ក្រាបបទល្មើសគ្រឿងញៀន និងសារធាតុគីមីផ្សំគ្រឿងញៀនខុសច្បាប់ ដើម្បីសុវត្ថិភាពទន្លេមេគង្គ ស្តីពីប្រតិបត្តិការត្រីកោណមាស ១៥១១/២១ តាមខ្សែបន្ទាត់ព្រំដែនខេត្តពោធិ៍សាត់
៦. ការពិភាក្សារួមរបស់សមាជិក សមាជិកា អង្គប្រជុំ
៧. មតិបូកសរុប ដោយលោក ពៅ ពិសិដ្ឋ។
នារសៀលក្នុងថ្ងៃដដែលនោះ លោក ពៅ ពិសិដ្ឋ អភិបាលរងនៃគណៈអភិបាលខេត្ត និងជាប្រធានលេខាធិការដ្ឋាន ក៏បានដឹកនាំកិច្ចប្រជុំជាមួយម្ចាស់អាជីវកម្ម រង្គសាល ក្លឹបកម្សាន្ត ខារ៉ាអូខេ ផ្ទះសំណាក់ និងសណ្ឋាគារ ដើម្បីឱ្យម្ចាស់អាជីវកម្មទាំងនោះ ចូលរួមសហការបង្ក្រាប ទប់ស្កាត់ ការចរាចរណ៍ជួញដូរ ប្រើប្រាស់ និងរក្សាទុកគ្រឿងញៀន៕
