លោក ពុយ គា បង្ហាញទស្សនះ៥ចំណុចសម្រាប់អ្នកសារព័ត៌មាន ដើម្បីយកព័ត៌មាន ក្នុងពិធីកិច្ចប្រជុំកំពូលអាស៊ាន

ភ្នំពេញ៖ លោក ពុយ គា អ្នកសារព័ត៌មានជំនាញអាស៊ាន និងជាទីភ្នាក់ងារព័ត៌មានជប៉ុន Kyodo ប្រចាំកម្ពុជា បានចែករំលែកនូវគន្លឹះមួយចំនួនដល់អ្នកសារព័ត៌មាន សម្រាប់ចូលរួមផ្ដិតយកខ្លឹមសារព័ត៌មានក្នុងកិច្ចប្រជុំកំពូលអាស៊ាន លើកទី៤០ និងទី៤១ និងកិច្ចប្រជុំពាក់ព័ន្ធ ឆ្នាំ២០២២ ដែលកម្ពុជាធ្វើជាម្ចាស់ផ្ទះ ។

ចំណុចគន្លឹះសំខាន់ៗអ្នកសារព័ត៌មានជើងរូបនេះ ធ្វើឡើងនៅរសៀលថ្ងៃទី០៤ ខែវិច្ឆិកា ឆ្នាំ២០២២នេះ ក្នុងវិធីជំនួបអ្នកសារព័ត៌មានស្តីពី [ការត្រៀមយកព័ត៌មានស្តីពីកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ] ។ កម្មវិធីនេះ មានការចូលរួមជាវាគ្មិនពី តំណាងក្រសួងព័ត៌មាន និងក្រសួងការបរទេស និងសហប្រតិបត្តិការអន្ដរជាតិ ព្រមទាំងអ្នកសារព័ត៌មានជាច្រើនរូបទៀតផងដែរ។

ទាំង៥ចំណុច ដែលចេញពីបទពិសោធន៍ផ្ទាល់ខ្លួនរបស់លោក ពុយ គា ដែលបានលើកមកបង្ហាញនោះរួមមាន៖

ទី១/ ត្រូវដឹងអំពីកម្មវិធី នៃដំណើរការកិច្ចប្រជុំ ពោលត្រូវដឹងអំពីពេលវេលាជាក់លាក់ និងកម្មវិធីទូទៅតាំងពីថ្ងៃចាប់ផ្ដើមដំបូង រហូតដល់កិច្ចប្រជុំត្រូវបានបិទបញ្ចប់ ដើម្បីងាយស្រួលក្នុងការតាមដាន និងផ្ដិតយកខ្លឹមសារសំខាន់ៗចេញពីកិច្ចប្រជុំ។

ទី២/ ត្រូវដឹងថា តើនរណា ជានរណា? ចំណុចនេះលោកបានពន្យល់ថា អ្នកសារព័ត៌មានត្រូវដឹងច្បាស់ថា តើអ្នកដែលចូលរួមក្នុងកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ទាំង៣៤រូបនោះ គឺជានរណាខ្លះ ហើយមានតួនាទីអ្វី។

ទី៣/ បញ្ហាក្ដៅ។ ចំណុចនេះលោកបានធ្វើការបែងចែកជាពីរ ដោយមួយសម្រាប់អ្នកសារព័ត៌មានក្នុងស្រុក និងមួយផ្នែកទៀត សម្រាប់ឆាកអន្ដរជាតិ។ ការផ្សព្វផ្សាយនៅក្នុងស្រុក គឺសំដៅទៅលើអ្វីដែលផលចំណេញរបស់កម្ពុជាពីកិច្ចប្រជុំនេះ។ ខណៈសម្រាប់ឆាកអន្ដរជាតិវិញ ត្រូវបានបែងចែកជា៥មុំសំខាន់ៗ រួមមាន៖ បញ្ហាមីយ៉ាន់ម៉ា ឬភូមា, បញ្ហាសមុទ្រចិនខាងត្បូង, បញ្ហាកូរ៉េខាងជើង, បញ្ហាចិន និងតៃវ៉ាន់ និងបញ្ហាសង្គ្រាមរវាងរុស្ស៉ី និងអ៊ុយក្រែន។

ទី៤/ ឯកសារពាក់ព័ន្ធក្នុងកិច្ចប្រជុំ។ លោកបានបង្ហើបថា តាមអ្វីដែលលោកទទួលបាននោះ ឯកសារសំខាន់ៗពាក់ព័ន្ធកិច្ចប្រជុំនេះ គឺមានរហូតដល់៩៩ឯកសារឯណោះ ដែលទាមទារឲ្យអ្នកសារព័ត៌មានស្វែងយល់ឲ្យបានច្រើនពីវា។

ទី៥/ អង្កេតទូទៅនៃការរៀបចំរបស់វិស័យឯកជន ទាំងសេវាកម្សាន្ដ ភោជនីយដ្ឋាន និងសេវាផ្សេងៗទៀត ដើម្បីចង់ដឹងថា តើថ្នាក់ដឹកនាំបណ្ដាប្រទេស ឬស្ថាប័នណាខ្លះបានទៅ។

សូមបញ្ជាក់ថា ប្រទេសកម្ពុជា ធ្វើជាម្ចាស់ផ្ទះក្នុងកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ក្នុងឆ្នាំ២០២២ ហើយកិច្ចប្រជុំឆ្នាំ២០២២នេះ នឹងមានថ្នាក់ដឹកនាំកំពូលៗពិភពលោក និងស្ថាប័នអន្តរជាតិចូលរួម។ នេះជាមោទនភាពជាតិដ៏ធំធេង ដោយសារវានឹងឆ្លុះបញ្ចាំងឲ្យតំបន់ និងសកលលោកទទួលស្គាល់ និងដឹងអំពីសក្តានុពលរបស់កម្ពុជា យើង។។