សម្ដេចតេជោ សោកស្តាយ ដែលភរិយាសម្ដេចមិនអាចចូលរួម ទទួលភរិយាថ្នាក់ដឹកនាំ នៃប្រទេសនានាបាន ដោយសារបញ្ហាសុខភាព

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្ដែងការសោកស្តាយ ដោយភរិយារបស់សម្ដេច មិនអាចចូលរួមទទួលភរិយាថ្នាក់ដឹកនាំ នៃប្រទេសនានាបាន ដោយសារបញ្ហាសុខភាព ។

តាមរយៈបណ្ដាញសង្គមហ្វេសប៊ុក នៅថ្ងៃទី៩ វិច្ឆិកានេះ សម្ដេចតេជោ បានមានប្រសាសន៍ថា តាំងពីចូលរួមអាស៊ាន ១៩៩៩ មកភរិយាសម្ដេច មិនដែលខកខានក្នុងការចូលរួម ប្រជុំអាស៊ានប្រចាំឆ្នាំជាមួយសម្ដេចឡើយ។ សម្ដេចថា ពេលធ្វើប្រធានអាស៊ានឆ្នាំ២០០២ និងឆ្នាំ២០១២ ភរិយាសម្ដេចបានបំពេញកិច្ចការដ៏ល្អ ក្នុងនាមភរិយាប្រធានអាស៊ាន ។

សម្ដេចតេជោ បន្តថា មិនត្រឹមតែអាស៊ានទេ ដែលភរិយាសម្ដេចចូលរួមអមដំណើរសម្ដេច គឺគ្រប់វេទិកាអន្តរជាតិតែម្តង ដែលភរិយានៅជាមួយសម្ដេចរហូតមាន អង្គការសហប្រជាជាតិ ចលនាមិនចូលបក្សសម្ព័ន្ធ ត្បូង ត្បូង អាស៊ី អឺរ៉ុប។ល។

សម្ដេចបញ្ជាក់ថា «សូម្បីតែការចរចារកសន្តិភាពរវាងភាគីកម្ពុជាក៏មានវត្តមានភរិយាទៅចូលរួមជាប់ជានិច្ចដែលគេអាចមើលឃើញក្នុងខ្សែ
ភាពយន្តគេនិងឃើញភរិយាខ្ញុំឈរពីក្រោយខ្ញុំពេលចុះហត្ថលេខាលើកិច្ចព្រមព្រៀងប៉ារីសតាំងពីក្មេងពាលនៅស្រាតនៅឡើយ» ។

សម្ដេចតេជោបន្ថែមថា នៅមានទៀតភរិយាសម្ដេច នៅបានធ្វើសកម្មភាពដោយឡែកផ្សេងទៀត នៅតាមទីកន្លែងនិងប្រធានបទខុសៗគ្នារាប់ ទាំងទៅថ្លែងការណ៍នៅអង្គការសហប្រជាជាតិ តាមការអញ្ជើញពីអគ្គលេខាធិការអង្គការ សហប្រជាជាតិទៀតផង។ សម្ដេចក៏បានផ្តាំទៅក្មេងពាលពីកំណើតថា ឈប់បានឈប់ទៅរឿងបោកប្រាស់ ៕