ក្រសួងឧស្សាហកម្ម ប្រកាសអំពីគម្រោងផ្គត់ផ្គង់ទឹកស្អាតនៅតំបន់និរតី នារាជធានីភ្នំពេញ
ភ្នំពេញ៖ ក្នុងរយៈពេលប៉ុន្មានឆ្នាំចុងក្រោយនេះ រាជធានីភ្នំពេញមានការរីកចម្រើនយ៉ាងខ្លាំង ទាំងការអភិវឌ្ឍហេដ្ឋារចនាសម្ព័ន្ធនានា ការអភិវឌ្ឍទីក្រុងរណប ការកើនឡើងនៃទំហំពាណិជ្ជកម្ម ។ នៅឆ្នាំ២០១១ រាជរដ្ឋាភិបាលសម្រេចពង្រីកតំបន់រដ្ឋបាលរាជធានីភ្នំពេញដោយផ្ទេរឃុំ មានចំនួន២០ នៃស្រុកពញាឮ មុខកំពូល កៀនស្វាយ កណ្ដាលស្ទឹង និងស្រុកអង្គស្នួល នៃខេត្តកណ្តាល ឱ្យមកស្ថិតនៅក្រោមរដ្ឋបាលរាជធានីភ្នំពេញ។
ភាពរីកចម្រើន និងការពង្រីកដែនដីរដ្ឋបាលនៃរាជធានីភ្នំពេញ បានផ្ដើមឱ្យការផ្គត់ផ្គង់ទឹកស្អាតនៅក្នុងរាជធានីភ្នំពេញ ជួបបញ្ហាយ៉ាងខ្លាំង ជាក់ស្តែង បច្ចុប្បន្នតម្រូវការប្រើប្រាស់ទឹកស្អាតនៅក្នុងរាជធានីភ្នំពេញទាំងមូល មានប្រមាណ ៧៤៦,០០០ ម៣ក្នុងមួយថ្ងៃ នៅពេលដែលសមត្ថភាពរោងចក្រប្រព្រឹត្តកម្មសម្អាតទឹក របស់រដ្ឋាករទឹកស្វយ័តក្រុងភ្នំពេញទាំង ៤ទីតាំង មានត្រឹមតែ ៦៣០,០០០ម៣ក្នុងមួយថ្ងៃប៉ុណ្ណោះ។។
