អ្នកនាំពាក្យប្រាប់ពីមូលហេតុ ដែលមេដឹកនាំអាស៊ានថតរូប មិនមានការព័ន្ធដៃគ្នាដូចពេលមុនៗ

ភ្នំពេញ៖ ឯកឧត្ដម គង់ ភោគ អ្នកនាំពាក្យកិច្ចប្រជុំកំពូលអាស៊ាន បានគូសបញ្ជាក់ពីមូលហេតុ ដែលប្រមុខដឹកនាំនៃបណ្តាប្រទេសអាស៊ានទាំងអស់ នៅពេលថតរូបជុំគ្នា មិនមានការព័ន្ធដៃគ្នាដូចមុនៗ តែបែរជាលើដៃស្តាំបង្ហាញបាតដៃម្រាមប្រាំទៅវិញ។

ឯកឧត្ដមគង់ ភោគ បញ្ជាក់ថា ការសម្រេចយកជម្រើសមិនកៀកដៃគ្នា មកជាលើកបាតដៃនេះ មានមូលហេតុតែមួយគត់ គឺបង្ហាញកូវីដ១៩ ត្រូវការកាត់បន្ថយការប៉ះពាល់គ្នា។

ឯកឧត្ដមបញ្ជាក់ថា​ ការសម្រេចយកជម្រើសលើកដៃនេះ ធ្លាប់បានប្រើប្រាស់កិច្ចប្រជុំផ្ទាល់ពីមុនមកដែរ ក្នុងពេលមានការរីករាលដាល ជំងឺកូវីដ១៩ ។

ការបញ្ជាក់របស់ឯកឧត្ដមអ្នកនាំពាក្យកិច្ចប្រជុំកំពូលអាស៊ាន ធ្វើឡើងក្នុងសន្និសីទសារព័ត៌មាន បង្ហាញពីលទ្ធផលនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនានា នៅសណ្ឋាគារសុខា នាថ្ងៃទី១១ ខែវិច្ឆិកា ឆ្នាំ២០២២។

ឯកឧត្ដមបញ្ជាក់យ៉ាងដូច្នេះថា ដោយសារតែបញ្ហារឿងកូវីដ យើងជៀសវាង តាមដែលអាចធ្វើទៅបាន ការប៉ះពាល់ ដូច្នេះក៏យកជម្រើសមួយនេះ អត់មានអ្វីប្រែប្រួលទេ គឺដោយសាររឿងកូវីដប៉ុណ្ណោះ។ ការលើកដៃនេះក៏ធ្លាប់ធ្វើម្តងម្តាលហើយ កាលពីពេលដែលមានការប្រជុំដោយផ្ទាល់ខ្លះ នៅពេលចំនួនករណីនៅខ្ពស់នៅឡើយ។ ។