សម្តេចតេជោ បន្តដឹកនាំកិច្ចប្រជុំកំពូលអាស៊ាន និងដៃគូសន្ទនាចំនួន៦ រួមទាំងជួបពិភាក្សាការងារជាមួយប្រធានាធិបតីអាមេរិក និងនាយករដ្ឋមន្ត្រីជប៉ុននៅថ្ងៃស្អែក

ភ្នំពេញ៖ នៅថ្ងៃសៅរ៍ ទី១២ ខែវិច្ឆិកា ឆ្នាំ២០២២ស្អែកនេះ កិច្ចប្រជុំកំពូលអាស៊ានលើកទី៤០, ៤១ និងកិច្ចប្រជុំកំពូលដៃគូពាក់ព័ន្ធ ដែលរៀបចំដោយកម្ពុជា ឈានចូលដល់ថ្ងៃទី៣ហើយ ហើយនឹងត្រូវបញ្ចប់នៅថ្ងៃអាទិត្យ។

កម្មវិធីនាថ្ងៃស្អែកនេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ាន នឹងបន្តធ្វើជាសហប្រធាន ជាមួយមេដឹកនាំប្រទេសដៃគូសន្ទនារបស់អាស៊ាន ដឹកនាំកិច្ចប្រជុំសំខាន់ៗចំនួន៦ទៀត។ កិច្ចប្រជុំសំខាន់ៗទាំង៦ កិច្ចប្រជុំកំពូលអាស៊ានបូកបី [ចិន ជប៉ុន កូរ៉េ] លើកទី២៥. កិច្ចប្រជុំកំពូលអាស៊ាន.ឥណ្ឌា លើកទី១៩. កិច្ចប្រជុំកំពូលអាស៊ាន.អូស្ត្រាលី លើកទី២. កិច្ចប្រជុំកំពូលអាស៊ាន.ជប៉ុន លើកទី២៥.កិច្ចប្រជុំកំពូលអាស៊ាន.អាមេរិក លើកទី១០ និងកិច្ចប្រជុំកំពូលខួបអនុស្សាវរីយ៍អាស៊ាន និងកាណាដា។

ក្រៅតែពីកិច្ចប្រជុំនេះទៅ នៅពេលរាត្រីថ្ងៃស្អែកនេះ សម្តេចតេជោ ហ៊ុន សែន. មេដឹកនាំអាស៊ាន. មេដឹកនាំប្រទេសដៃគូសន្ទនារបស់អាស៊ាន.អគ្គលេខាធិការអង្គការសហប្រជាជាតិ ព្រមទាំងថ្នាក់ដឹកនាំអង្គការដៃគូអភិវឌ្ឍន៍ដទៃទៀត ព្រមទាំងគណៈប្រតិភូជួបជុំគ្នាប្រារព្ធពិធីជប់លៀង។ មេដឹកនាំពាក់ព័ន្ធទាំងអស់នឹងស្លៀកសម្លៀកបំពាក់ឈុតប្រពៃណី ដែលកាត់ជូនដោយកម្ពុជា។

ក្រៅតែពីកម្មវិធីខាងលើនេះ សម្តេចតេជោ ហ៊ុន សែន នឹងមានជំនួបសម្តែងការគួរសម និងពិភាក្សាការងារជាមួយលោក ​ហ្វូមីអូ គីស៊ីដា នាយករដ្ឋមន្ត្រីជប៉ុន. ឯកឧត្ដម ចូ បៃដិន ប្រធានាធិបតីអាមេរិក និងលោក Charles Michel ប្រធានក្រុមប្រឹក្សាអឺរ៉ុប។។