សម្តេចតេជោ ហ៊ុន សែន ផ្ញើសារលិខិតជូនពរ ឧបនាយករដ្ឋមន្ត្រី ហោ ណាំហុង ក្នុងឱកាសខួបចម្រើនជន្មាយុ
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ញើសារជូនពរ លោកកិត្តិបរិរក្សបណ្ឌិត ហោ ណាំហុង ឧបនាយករដ្ឋមន្ត្រី ក្នុងឱកាសខួបចម្រើនជន្មាយុគម្រប់ ៨៦ឆ្នាំ ឈានចូល ៨៧ឆ្នាំ។
សម្តេចតេជោ បានថ្លែងបញ្ជាក់ថា៖ [រូបខ្ញុំ និងភរិយាសូមជូនពរជ័យ បវរសួស្តីសិរីវឌ្ឍនា វិបុលសុខជូនឯកឧត្តម សូមមានសុខភាពល្អបរិបូរណ៍ កម្លាំងមាំមួន ប្រាជ្ញាស្មារតីភ្លឺស្វាង មានអាយុយឺនយូរ]។
សម្តេចតេជោ ក៏បានកោតសរសើរ និងវាយតម្លៃខ្ពស់ចំពោះ ឧបនាយករដ្ឋមន្ត្រី ហោ ណាំហុង ដែលបានបំពេញការងារទំនាក់ទំនងការទូត និងកិច្ចសហប្រតិបត្តិការអន្តរជាតិ និងលើកស្ទួយអត្តសញ្ញាណជាតិ ដើម្បីការពារអធិបតេយ្យ បូរណភាពទឹកដី ស្ថេរភាពសេដ្ឋកិច្ច។
សម្តេចតេជោគូសបញ្ជាក់ថា លោកឧបនាយករដ្ឋមន្ត្រី ជាឥស្សរជនមួយរូប ដឹកនាំនិងគ្រប់គ្រង វិស័យការបរទេសនិងសហប្រតិបត្តិការអន្តរជាតិសំដៅធានានិងការពារផលប្រយោជន៍របស់រាជរដ្ឋាភិបាល បម្រើដល់ឧត្តមប្រយោជន៍ជាតិ និងមាតុភូមិនាពេលកន្លងមក ។។