សម្ដេច ស ខេង អញ្ជើញទទួលបដិសណ្ឋារកិច្ចសម្ដេចតេជោ ហ៊ុន សែន ដឹកនាំគណៈប្រតិភូជាន់ខ្ពស់កម្ពុជា ធ្វើដំណើរត្រឡប់មកកម្ពុជាវិញ

ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាល្ងាចថ្ងៃទី១៥ ខែវិច្ឆិកា ឆ្នាំ២០២២ បានអញ្ជើញទទួលបដិសណ្ឋារកិច្ចសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា អញ្ជើញដឹកនាំគណៈប្រតិភូជាន់ខ្ពស់ នៃរាជរដ្ឋាភិបាលកម្ពុជា ធ្វើដំណើរត្រឡប់មកកម្ពុជាវិញ។

សម្ដេចតេជោ ហ៊ុន សែន បានអញ្ជើញដឹកនាំគណៈប្រតិភូធ្វើដំណើរទៅកាន់កោះបាលី ប្រទេសឥណ្ឌូនេស៊ី កាលពីថ្ងៃទី១៤ ខែវិច្ឆិកា ដើម្បីត្រៀមចូលរួមក្នុងកិច្ចប្រជុំកំពូល G20 ក៏ប៉ុន្តែដោយសារតែការធ្វើតេស្តឃើញសម្ដេចមានវិជ្ជមានកូវីដ-១៩ ទើបសម្ដេចតេជោសម្រេចចិត្តដឹកនាំគណៈប្រតិភូមាតុភូមិនិវត្តន៍មកកាន់កម្ពុជាវិញ។

សម្ដេចតេជោនាយករដ្ឋមន្ត្រី ក៏បានអរគុណដល់មន្ត្រីនៃប្រទេស​ឥណ្ឌូនេស៊ី ដែលបានយកចិត្តទុកដាក់ចំពោះសម្ដេច និងគណៈប្រតិភូ និង​សូមអរគុណដល់មន្ត្រីរាជការ និងប្រជាពលរដ្ឋកម្ពុជាទាំងអស់ ដែលបាន​ព្រួយបារម្ភអំពីបញ្ហាសុខភាពរបស់សម្ដេច។

សម្ដេចតេជោ បានមានប្រសាសន៍ថា ទោះបីជាការធ្វើតេស្តបង្ហាញលទ្ធផលវិជ្ជមានយ៉ាងណាក៏ដោយ ក៏ប៉ុន្តែពេលនេះសុខភាពរបស់សម្ដេច គឺធម្មតា និងបានមានប្រសាសន៍ទៀតថា ទោះបីសម្ដេចវិជ្ជមាន​កូវីដ-១៩​ក៏ដោយ ក៏ការងារមួយចំនួន សម្ដេចនៅតែបន្តធ្វើជាប្រក្រតី លើកលែងតែការងារដែលត្រូវជួបភ្ញៀវតែប៉ុណ្ណោះ៕