ក្រសួងមហាផ្ទៃបានអោយដឹងថា មនុស្សយ៉ាងតិច២១នាក់បានស្លាប់បន្ទាប់ពីមានអគ្គីភ័យឆាបឆេះអគារលំនៅឋាននៅហ្គាហ្សា
ហ្គាហ្សា៖យ៉ាងហោចណាស់មនុស្ស ២១នាក់ រួមទាំងគ្រួសារទាំងមូល និងកុមារត្រូវបានសម្លាប់ នៅពេលដែលអគ្គីភ័យបានឆាបឆេះអគារលំនៅដ្ឋានមួយកន្លែងនៅក្នុងជំរុំជនភៀសខ្លួននៅភាគខាងជើងហ្គាហ្សា កាលពីថ្ងៃព្រហស្បតិ៍ នេះបើយោងតាមអាជ្ញាធរប៉ាឡេស្ទីននៅក្នុងតំបន់ហ្គាហ្សា។ក្រសួងមហាផ្ទៃហ្គាហ្សាបានថ្លែងថា ភ្លើងបានឆាបឆេះនៅក្នុងជំរុំជនភៀសខ្លួន Jabaliya ។ការស៊ើបអង្កេតបឋមបានរកឃើញថាមានបរិមាណប្រេងសាំងជាច្រើននៅខាងក្នុងអគារ ដែលរួមចំណែកដល់ការកើនឡើងនៃអគ្គិភ័យ។
អ្នកនាំពាក្យក្រសួងលោក Iyad Al-Bazm បានថ្លែងថា មនុស្សគ្រប់រូបនៅក្នុងអគារត្រូវបានសម្លាប់។របាយការណ៍ប្រព័ន្ធផ្សព្វផ្សាយក្នុងស្រុកបានអោយដឹងថា អ្នកស្លាប់រួមមានក្រុមគ្រួសារទាំងមូល ដោយបានរាយបញ្ជីវេជ្ជបណ្ឌិត មន្ត្រីរដ្ឋាភិបាលក្នុងតំបន់ និងឱសថការី ព្រមទាំងប្រពន្ធ និងកូនរបស់ពួកគេក្នុងចំណោមជនរងគ្រោះ។លោក Hussein AlSheikh អគ្គលេខាធិការគណៈកម្មាធិការប្រតិបត្តិរបស់អង្គការរំដោះប៉ាឡេស្ទីន (PLO) បានអំពាវនាវឱ្យអ៊ីស្រាអែលបើកច្រក Erez ដើម្បីអនុញ្ញាតឱ្យអ្នករងរបួសត្រូវបានបញ្ជូនទៅមន្ទីរពេទ្យនៅខាងក្រៅតំបន់ហ្គាហ្សា។
រដ្ឋមន្ត្រីការពារជាតិអ៊ីស្រាអែល លោក Benny Gantz បានអោយដឹងថា វាជាការត្រឹមត្រូវសម្រាប់អ៊ីស្រាអែល ក្នុងការធ្វើដើម្បីជួយសង្គ្រោះជីវិតមនុស្ស ប៉ុន្តែវាហាក់ដូចជាមិនមានអ្នករបួសដែលនៅរស់រានមានជីវិតក្នុងការដឹកជញ្ជូននោះទេ។អ៊ីស្រាអែលគ្រប់គ្រងច្រកឆ្លងកាត់ Erez ដែលជាកន្លែងត្រួតពិនិត្យមួយក្នុងចំណោមច្រកមួយចំនួនដែលអនុញ្ញាតឱ្យមានចលនារវាងអ៊ីស្រាអែល និងហ្គាហ្សា។
ក្រសួងមហាផ្ទៃរបស់ហ្គាហ្សាបានអោយដឹងថា កងកម្លាំងប៉ូលីស ការពារជនស៊ីវិល និងក្រុមធ្វើកោសល្យវិច្ច័យនៅតែស៊ើបអង្កេតឧប្បត្តិហេតុនេះ។គ្រួសារជាច្រើនដែលរស់នៅក្នុងតំបន់ហ្គាហ្សាស្តុកទុកប្រេងសាំង និងម៉ាស៊ូតទៅកាន់ម៉ាស៊ីនភ្លើង ចាប់តាំងពីទឹកដីនេះមានអគ្គិសនីត្រឹមតែប្រាំបីម៉ោងក្នុងមួយថ្ងៃ ដោយសារវាមានស្ថានីយ៍ថាមពលតែមួយប៉ុណ្ណោះ។
ក្រុម Hamas ដែលជាចលនាសកម្មប្រយុទ្ធដែលគ្រប់គ្រងតំបន់ហ្គាហ្សាបានសម្តែងការសោកសៅចំពោះការស្លាប់នេះ ហើយបានអំពាវនាវឱ្យប្រជាជនប៉ាឡេស្ទីនចូលរួមក្នុងពិធីបុណ្យសពជនរងគ្រោះនៅថ្ងៃសុក្រ។
ប្រធានអាជ្ញាធរប៉ាឡេស្ទីនលោក Mahmoud Abbas បានប្រកាសមួយថ្ងៃនៃការកាន់ទុក្ខសម្រាប់ជនរងគ្រោះ។
