បើកវគ្គបណ្តុះបណ្តាលស្តីពី កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យក្នុងពេលមានសម្ពាធអតិផរណា និងកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យដែលរងផលប៉ះពាល់ដោយទឹកជំនន់
ភ្នំពេញ៖ ឯកឧត្តម សុខ ប៊ុនថា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា អញ្ជើញបើកវគ្គបណ្តុះបណ្តាលស្តីពី កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យក្នុងពេលមានសម្ពាធអតិផរណានិងកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យដែលរងផលប៉ះពាល់ដោយទឹកជំនន់ ។
វគ្គបណ្តុះបណ្តាល ខាងលើក៏មានការចូលរួមពីឯកឧត្តម អ៊ុំ រាត្រី អភិបាលនៃគណៈអភិបាលខេត្ត លោកស្រី រស់ សុផានី អភិបាលរងខេត្ត លោក ឃុន វុទ្ធី ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត លោក -លោក លោកស្រី មកពីស្ថាប័នពាក់ព័ន្ធ ចៅសង្កាត់ទូទាំងខេត្តបានចូលរួមមានរយៈពេល១ថ្ងៃពេញ ធ្វើឡើងនៅសាលប្រជុំ ក្រុមប្រឹក្សា ខេត្ត នាថ្ងៃទី១៧ ខែវិច្ឆិកា ឆ្នាំ ២០២២។
មានមតិចូលរួមដោយឱកាសនោះឯកឧត្តម អ៊ុំ រាត្រី អភិបាលខេត្តបន្ទាយមានជ័យ ក៏បានថ្លែងអំណរគុណដល់ក្រសួងសង្គមកិច្ច ដែលបានរៀបចំវគ្គបណ្ដុះបណ្ដាលនេះឡើជូនដល់អ្នកពាក់ព័ន្ធ ពិសេស ចៅសង្កាត់ទូទាំងខេត្ត ដើម្បីសំដៅធ្វើ ក្នុងការចេះប្រើជាមួយនឹងកម្មវិធីឧបត្ថម្ភសាច់ប្រាក់ជូនដល់ពលរដ្ឋដែលងាយរងគ្រោះ។
ជាមួយ គ្នានោះ ឯកឧត្តម ក៏បានជំរុញដល់ចៅសង្កាត់នៅទាំងអស់ត្រូវផ្ដោតការយកចិត្តទុកដាក់ត្រង់ត្រាបស្តាប់គ្រូឧទ្ទេស ដើម្បីយកទៅអនុវត្តក៏ដូចជាប្រើប្រាស់ឱ្យត្រូវទៅតាមគោលដៅឧបត្ថម្ភសាច់ប្រាក់ជូនដល់ពលរដ្ឋក្រីក្រមានជីវភាពខ្វះខាត និងងាយរងគ្រោះ។
មានប្រសាសន៍បើកវគ្គបណ្តុះបណ្តាល ឯកឧត្តម សុខ ប៊ុនថា រដ្ឋលេខាធិការក្រសួងសង្គមកិច្ច មានប្រសាសន៍ថា ដើម្បីឆ្លើយតបនឹងស្ថានភាពដ៏លំបាករបស់ប្រជាពលរដ្ឋរាជរដ្ឋាភិបាលកម្ពុជា ក្រោមការដឹកនាំដោយសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តាមរយៈ ក្រុមប្រឹក្សាជាតិគាំពារសង្គម បានដាក់ចេញនូវវិធានការណ៍អន្តរាគមន៍គាំពារសង្គមដើម្បីជួយលើកកម្ពស់សុខុមាលភាពប្រជាពលរដ្ឋ បន្ទាប់ពីទទួលរងផលប៉ះពាល់ដោយសម្ពាធអតិផរណា និងរងផលប៉ះពាល់ពីទឹកជំនន់ ដើម្បីធ្វើការឆ្លើយតបឱ្យបានទាន់ពេលវេលា បានដាក់ចេញផែនការយុទ្ធសាស្រ្តកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យក្នុងពេលមានសម្ពាធអតិផរណានិងកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យដែលរងផលប៉ះពាល់ដោយទឹកជំនន់។
ឯកឧត្តមបន្តថា មូលនិធិជាតិជំនួយសង្គមនាពេលបច្ចុប្បន្នបានគ្រប់គ្រង និងអនុវត្តនូវកម្មវិធីជំនួយសង្គមដូចជា ៖ កម្មវិធីឧបត្ថម្ភសាច់ប្រាក់សម្រាប់ស្ត្រីមានផ្ទៃពោះ និងកុមារអាយុក្រោម២ឆ្នាំ និងកម្មវិធីឧបត្ថម្ភសាច់ប្រាក់ជូនគ្រួសារមានជីវភាពខ្វះខាត និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ ដែលកម្មវិធីទាំងពីរនេះពិតជាទទួលបានការសាទរ និងវាយតម្លៃខ្ពស់។
ឯកឧត្តមបានពញ្ជាក់ថា កម្មវិធីឧបត្ថម្ភសាច់ប្រាក់សម្រាប់ស្ត្រីមានផ្ទៃពោះ និងកុមារអាយុក្រោម២ឆ្នាំ បានលើកកម្ពស់សុខុមាលភាពមាតា និងទារក បានរួមចំណែកដោះស្រាយបញ្ហាកង្វះអាហារូបត្ថម្ភរបស់កុមារក្នុងគ្រួសារក្រីក្រ ចាប់តាំងកូនក្នុងផ្ទៃ រហូតដល់អាយុ២ឆ្នាំ និងជំរុញការលូតលាស់ទាំងកាយសម្បទា និងបញ្ញាស្មារតី និងផ្ដល់នូវកិច្ចគាំពារមួយយ៉ាងពិតប្រាកដ ដើម្បីរក្សាលំនឹងទាំងសេដ្ឋកិច្ចជាតិ និងសេដ្ឋកិច្ចគ្រួសារសម្រាប់គ្រួសារមានជីវភាពខ្វះខាត និងងាយរងគ្រោះ៕
