ឧត្តមសេនីយ៍ឯក យឿង សុខុន អញ្ជើញសំណេះសំណាល បំពាក់ឋានន្តរស័ក្តិ និងគ្រឿងឥស្សរិយយស ជូនយោធិនចូលសោធននិវត្តន៍ ឆ្នាំ២០២២ នៅទីបញ្ជាការដ្ឋានយោធភូមិភាគទី៣
ភ្នំពេញ៖ ឯកឧត្តម ឧត្តមសេនីយ៍ឯក យឿង សុខុន មេបញ្ជាការរងកងទ័ពជើងគោក មេបញ្ជាការយោធភូមិភាគទី៣ តំណាងដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ មេបញ្ជាការកងទ័ពជើងគោក នាថ្ងៃទី១៨ វិច្ឆិកា បានអញ្ជើញសំណេះសំណាល បំពាក់ឋានន្តរស័ក្តិ និងគ្រឿងឥស្សរិយយស ជូនយោធិនចូលសោធននិវត្តន៍ ឆ្នាំ២០២២ កងឯកភាពយោធភូមិភាគទី៣ កងទ័ពជើងគោក ផ្ទេរចេញពីក្របខ័ណ្ឌក្រសួងការពារជាតិ ចំនួន ៥៤នាក់ ដែលពិធីនេះប្រារព្ធធ្វើឡើង នៅទីបញ្ជាការដ្ឋានយោធភូមិភាគទី៣ ។
ឧត្តមសេនីយ៍ឯក យឿង សុខុន បានមានប្រសាសន៍ស្វាគមន៍ និងពាំនាំមកនូវប្រសាសន៍ផ្ដាំផ្ញើសួរសុខទុក្ខពីសំណាក់ ឯកឧត្តម ឧត្តមសេនីយ៍ឯក ហ៊ុន ម៉ាណែត និងលោកជំទាវ ពេជ្រ ចន្ទមុន្នី ដែលតែងតែគិតគូរ ចំពោះជីវភាពរស់នៅ និងសុខទុក្ខរបស់បងប្អូនយោធិនចូលនិវត្តន៍ យោធភូមិភាគទី៣ ទាំងអស់ ។
ក្នុងឱកាសនោះផងដែរ ឯកឧត្តម យឿង សុខុន សូមគោរពថ្លែងអំណរគុណ និងសរសើរអំពីការខិតខំតស៊ូ ប្រើប្រាស់អស់កម្លាំងកាយចិត្ត ក្រោកឈរដើម្បីការពារជាតិមាតុភូមិចេញពីរបបប្រល័យពូជសាសន៍ និងប្រយុទ្ធពីសមរភូមិមុខឆ្លងផុតពីគ្រោះថ្នាក់ជាច្រើនតាមគោលនយោបាយឈ្នះ ឈ្នះ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងថែរក្សាអត្តសញ្ញាណ ភាពថ្លៃថ្នូររបស់កងយោធពលខេមរៈភូមិន្ទ ។
ឧត្តមសឹនីយ៍ឯក យឿង សុខុន គូសបញ្ជាក់ថា គំរូវីរភាពដ៏ល្អផូរផង់របស់បង ប្អូន ពិតជាបានដិតជាប់ក្នុងក្រអៅបេះដូងអ្នកជំនាន់ក្រោយយ៉ាងពិតប្រាកដ។
ថ្វីត្បិតអស់លោកជាយោធិនបានផ្ទេរចេញពីកងយោធពលខេមរភូមិន្ទ ទៅក្រសួងសង្គមកិច្ចអតីតយុទ្ធជន និងយុវនីតិសម្បទាក៏ដោយ ក៏ប្រមុខរាជរដ្ឋាភិបាលដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅតែបន្តយកចិត្តទុកដាក់គិតគូរជួយដោះស្រាយគ្រប់កាល:ទេស:ដល់បងប្អូនអតីតយុទ្ធជនជានិច្ច។
ឯកឧត្តម ក៏បានផ្តាំផ្ញើដល់យោធិនចូលសោធន៍និវត្តន៍ ទាំងអស់ពេលវិលត្រឡប់ទៅរួមរស់ជាជនស៊ីវិលត្រូវបន្តថែរក្សានូវតំលៃថ្លៃថ្នូររបស់កងទ័ព និងចូលរួមសហការជាមួយអជ្ញាធរដែនដី រក្សាសុខសន្តិភាពឲ្យបានដាច់ខាត ។
ក្នុងពិធីសំណេះសំណាល បំពាក់ឋានន្តរសក្តិនោះផងដែរ យោធិនដែលត្រូវចូលសោធននិវត្តន៍ ទាំង ៥៤ នាក់ ទទួលបានថវិកាឧបត្ថម្ភ ក្នុងម្នាក់ៗ ២០០.០០០រៀល ដែលជាអំណោយរបស់ មេបញ្ជាការកងទ័ពជើងគោកចំនួន ២០០.០០០រៀល ឯកឧត្តម មេបញ្ជាការយោធភូមិភាពទី៣ និងមានអង្ករ ២៥គីឡូ ត្រីខ២យួរ មី១កេស ក្រមា១ សារ៉ុង១ សាប៊ូ និងច្រាស់-ថ្នាំដុសធ្មេញផងដែរ ៕
