អគ្គលេខាធិការរងទី១ កាកបាទក្រហម ចុះសួរសុខទុក្ខនិងនាំយកអំណោយជូនលោកយាយ ជិន ភឿន អាយុ៨៥ឆ្នាំ រស់ស្រុកមេសាង
ភ្នំពេញ៖ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសហការី រួមជាមួយសាខាកាកបាទក្រហមកម្ពុជា ខេត្តព្រៃវែង នៅថ្ងៃទី ១៨ ខែវិច្ឆិកា ឆ្នាំ២០២២ បានចុះសួរសុខទុក្ខជាលើកទី២ និងនាំយកអំណោយមនុស្សធម៌ជូនដល់លោកយាយ ជិន ភឿន អាយុ ៨៥ឆ្នាំ រស់នៅភូមិចេកធ្លក ឃុំត្រពាំងស្រែ ស្រុកមេសាង ខេត្តព្រៃវែង។
លោកយាយមានក្តីរំភើបរីករាយដោយបានជួបជាមួយក្រុមការងារកាកបាទក្រហមកម្ពុជាសារជាថ្មី និងថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានគិតគូរពីជីវភាពរស់នៅ ផ្តល់អំណោយជាស្បៀងអាហារ-ថវិកា និងបានជួយជួសជុលផ្ទះឱ្យបានសមរម្យទៀតផង។
អំណោយកាកបាទក្រហមកម្ពុជា ដែលផ្តល់ជូនលោកយាយជាលើកទី២នេះ រួមមាន ៖ អង្ករ មី ត្រីខ ទឹកស៊ីអ៉ីវ ទឹកដោះគោ ផ្លែក្រូច ប្រេងកូឡា មុង ភួយ សារុង ក្រមា សម្ភារចានឆ្នាំង និងថវិកាមួយចំនួន។
សូមបញ្ជាក់ថា កាលពីថ្ងៃទី ២៤ ខែតុលា ឆ្នាំ២០២២កន្លងទៅ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ ចុះសួរសុខទុក្ខ និងនាំយកអំណោយ មនុស្សធម៌ជាគ្រឿងឧបភោគបរិភោគ សម្ភារប្រើប្រាស់ សំលៀកបំពាក់ និងថវិកាផ្តល់ជូនលោកយាយ ជិន ភឿន ម្តងរួចមកហើយកាលនោះ លោកជំទាវ បានណែនាំដល់អនុសាខាកាកបាទក្រហមកម្ពុជា ស្រុកមេសាង ធ្វើការសហការជាមួយអាជ្ញាធរមូលដ្ឋាន ភូមិឃុំ ដើម្បីជួយជួសជុលកែលម្អផ្ទះលោកយាយឱ្យបានសមរម្យរហូតបានសម្រេចជាស្ថាពរ៕
